राष्ट्रिय विभूति शंखधर साख्वाःया सालिक न्ह्योने शंखधर उद्यानय् नेपाल सरकारया सूचना प्रविधि तथा संचार मन्त्री एवं सरकारया प्रवक्ता पृथ्वी सुब्बा गुरुङ्गयात मू पाहाँ याना पद्मरत्न लुमन्ति गुथिं शंखधर दिवस हंगु दु । ज्याझ्वः नेपालभाषा मंकाः खलःया नाय पद्मरत्न तुलाधरया लुमन्ति नीस्वनातःगु पद्मरत्न लुमन्ति गुथिया नायः पूर्वमन्त्री डा. केशवमान शाक्यया सभापतित्वय् जूगु खः ।
नेपाल संवत्या प्रणेता शंखधर साख्वाःयात नेपाः सरकारं ने.संं. ११२० (वि.संं २०५६) स राष्ट्रिय विभूति घाेषणा याःगु खः । राष्ट्रिय विभूति शंखधर दिवस हनेगु प्रचलन ने.संं ११२५ (वि.सं.२०६१) निसें नेपालभाषा मंकाः खलः न्हूदँ समारोह समितिया ग्वसालय् न्ह्याःगु खः ।
राष्ट्रिय विभूति शंखधर साख्वाः दिवसया लसताय् संचार मन्त्री पृथ्वी सुब्बा गुरुङ्गं नेपाल संवत्यात राष्ट्रिय मान्यता कायेगु झ्वलय् नेपालभाषा मंकाः खलःया नायः पद्मरत्न तुलाधरं यानादीगु योगदानयात लुमंका दिल । लिसें वय्कलं जनताया अधिकार प्राप्तिया निंतिं सकल आदिवासी जनजाति हे सजग जुइमाःगु खँय् बः बियादिल । पूर्व मन्त्री सांसद कृष्णगोपाल श्रेष्ठया ब्वति दुगु ज्याझ्वस येँ महानगरपालिकाया उपमेयर सुनिता डंगोेल, येँ महानगरपालिकाया न्हापाया मेयर विद्या सुन्दर शाक्यं नं नुगः खँ तया दीगु खः । लुमन्ति गुथिया न्वकू सुम्निमा तुलाधरं लसकुस व गुथिया छ्याञ्जे नरेशवीर शाक्यं ज्याझ्वः न्ह्याकादीगु खः ।
राष्ट्रिय विभूति शंखधर साख्वाः व नेपालभाषा मंकाः खलःया नायः पद्मरत्न तुलाधरया सालिकय् मूपाहांपाखें स्वांमा व उपस्थित सकसिनं स्वां देछाःगु खः ।
