नेपालभाषा ख्यलय् मद्दिक्क हे म्ये निर्माण यानाःच्वनादीम्ह मोहन शाक्यया निपू म्ये सरी धैब्यू व झ्यालं झ्यालं बिश्वज्योति सिनेप्लेक्सय् प्रिमियर जुल । वरिष्ठ संगीतकःमि मनराजा नकःमिया सभानायः जुयाःदीगु ज्याझ्वलय् वरिष्ठ सिनेमेटोग्राफर गौरीशंकर धुँजु, जुुजुकाजी रंजीत विशिष्ट पाहाँ कथं झायादीगु खः । निपुं म्येय् मोहन शाक्यया सः दुथ्यानाच्वंगु खःसा सरी धैब्यु म्येय् मोहन शाक्ययात कुन्जनी महर्जनं साथ बियातःगु दु ।
विशिष्ट पाहाँ कथं झायादीम्ह गौरी शंकर धुँजु थौंकन्हे नेवाः म्येया स्तर न्हापा थःपिंसं ज्या याना सिबें यक्व हे च्वये थहाँ वनेधुंकुगु खँ कंसें निपूं हे म्ये बांलाःगु प्रतिकृया बिया दिल । अथेहे वरिष्ठ म्ये हालामि जुजुकाजी रंजितं न्हापाः नेवाः म्येया बजार मालेत स्वन्तिया न्हू दँ पिइ माःगु तर थौंकन्हे म्ये प्रिमियर यायेगु निंतिं अवसर माले म्वाःगु अवस्थाय् थ्यने धुंकुगु खँ कुलादील ।
निपुलिं हे म्ये निल शाक्यं लसय् हनातःगु खः सा जीवित् जल्मिं एरेन्ज यानातःगु दु । झ्यालं झ्यालं म्ये रामकृष्ण खड्गीं निर्देशन याःगु खःसा म्येय् सोहित मानन्धर व भिंतुना जोशीं अभिनय यानातःगु दु । म्येया छायाँकन रक्कि महर्जनं यानातःगु दु ।
अथे हे सरी भैब्यू म्येय् विशुम राज शाक्य व स्नेहा महर्जनं अभिनय यानातःगु दु । म्येया निर्देशक सुरज नापित खः । थुगु म्ये सोहन मानन्धरं छायाँकन यानातःगु दु । ज्याझ्वलय् प्राविधिक व कलाकारपिंत सम्मान नं याःगु खः ।
