नेपालभाषाया मनाेरंजन ख्यलय् नेवाः मस्तय्गु चित्रण गुगु कथं जुयाः च्वन धैगु छगू सोचनीय विषय खः । नेवाः भाय्या म्ये व नेवाः वसः पुनातःपिं मस्तय्त झीसं भिजुअल रूपं छम्ह नेवाः मचा खः धकाः नाले छिं । नच्चापिं नेवाः मस्त तयाः हे नेपालभाषाया नं यक्व हे म्ये निर्माण जुयाःच्वंगु दु ।
छगू इलय् नेपालभाषाया मचा म्ये थें लोकंह्वाःगु म्ये हे मदु । चुलिचिया चं चं भाग १ व २या मचा म्ये, नानु, म्येचाः जक मखुसे इमू छम्ह लँय् दु थें जाःगु आपलं म्ये न्यनां हे मस्त तःधि जुयाच्वंगु खः अले गुलिं म्ये धाःसा थुगु हे मचाः म्येयात श्रव्य दृष्य कथं न्ह्यब्वयातःगु नं दु गुकि मस्तय्त हे यइपुक्क प्याखँ हुइका तःगु दु । तर थ्व हे दौरान नं छगू ई अज्योगु नेवाः म्यूजिक भिडियोया नं वयाच्वंगु दु गुकि मस्तय्गु मनोबिज्ञान सिबें वयस्क मनोबिज्ञानं निर्देशित जुयाच्वंगु म्यूजिक भिडियो पिदन ।
नच्चाम्ह मिजं मचां तःधिम्ह ल्यासेम्ह मिसा प्रति आकर्षण तइगु, नच्चा नच्चापिं मिजं मचा व मिसा मचाया दथुइ नं ल्याम्हसूया चिं थें हाउभाउ क्यनां मतिनाया म्ये हालीगु व मचा हे जुसां तःधि पहः क्यनां तःधिपिं थें व्यवहार यानां अभिनय यायेगु थी थी म्येया श्रव्य आः नं खने दयावयाच्वंगु दु ।
छम्ह मचाम्ह कलाकारयात थःगु ल्याय्म्हसूया ई सिबें न्ह्यः हे आशक्त मतिनाय् केन्द्रीत हाउभाउया अभिनय् न्ह्यब्वयेगु व, वहे दृष्य स्वयाः सुनां व मचाम्ह कलाकारयात स्याबासि बिल वा ब्वः हे बिल धाःसा उकिं उम्ह मचाया मानसिक विकासय् गज्योगु प्रभाव लाकी धकाः झीसं बिचाः यायेमाः ।
छम्ह मचाम्ह कलाकारं छम्ह ल्यासेयात लुमंकाः न्ह्यइपुका च्वनेगु इलय् वैत स्वयाच्वंपिं मेपिं मस्तय्सं गथे यानां नालाच्वंगु दइ धैगु खँ आः छम्ह निर्देशकं बिचाः यायेमाः । नेवाः म्ये सामाजिक संजालय् लोकंह्वानाच्वंगु छगू कारण धैगु मस्तय्सं स्वयाः हे नं खः । लोकलसय् वा लोकंह्वाःगु म्येय् मस्त प्याखँ हुलेगु याना हे च्वंगु दइ । छम्ह नच्चाम्ह मिजं मचा भाःतया भुमिकाय् म्हितिगु वा छम्ह मतिनामि जुयाः पार्कय् चाःह्यू वनेगु दृष्य अस्वभाविक ला ख हे खः तर तःधिपिं स्वकुमिपिंसं नं थज्योगु दृष्य स्वये मछिं धकाः म्हो हे जक तायेकीपिं दु ।
छम्ह मचाया न्ह्यपुइ मचां निसें थज्योगु म्वाः मदुगु मनोरंजनया राेल प्ले स्वयेगु इलय् मानसिक विकासया रूपं हे स्वयाच्वंपिं मस्तय्त तसकं हे नकारात्मक असर यानाच्वंगु दइ, गुगु खँ इमिसं नं वाः चायेके फयाच्वंगु दइ मखु। उकिं म्यूजिक भिडियोलय् मस्तय्गु चित्रण म्वाःसां म्वाःसां परिकल्पना यानां लोकंह्वाकेगु कुतः झीसं यानाच्वने मज्यु ।
बिडम्बनाया खँ आः तकं नं छपू म्ये लोकंह्वाकेगु निंतिं मस्तय्गु भूमिका गज्योगु दु धैगु खँ नेपालभाषा ख्यलय् आवद्ध जुयाःच्वंपिंसं ध्वाथुक्क थुइके मफूनी । अझ मस्त छ्यलाः दयेकातःगु आपलं म्ये मचा म्ये हे नं मखु । मस्त नाप स्वापू हे मदुगु म्येय् मस्तय्त तःधिपिनिगु भूमिका म्हितकेगु सोच निर्देशकतय्त गनं वयाच्वन धैगु खँ छगू अनुसन्धान हे यायेमाःगु विषय थें खने दयेधुंकल, यद्यपि मचा प्याखँम्वःया भूमिका धाःसा छुं नं बाखँ वा प्याखनय् उतिकं हे महत्वपूर्ण नं जुयाः च्वं । मस्तय्गु भूमिका स्वयाः हे जक नेवाः म्येय् मस्तय्त अभिनय याकेगु पाय्छि जुइ ।
दर्शनवीर शाक्य,
पेजथ्री, दँ १९ ल्याः १
एकदम पाय्छिगु खँ ल्ह्वनादिल।गुगु खँ व मचाया दिमागय् बनी हे मखुनि उजागु खँ व मचां न्ववाना म्ये हालाप्याखं हूगु क्येनिगु निर्देशकया दिवालिया पन खः।