कलाकार स्वतन्त्र संसार महर्जनया दकिलायाय् नेपालभाषा ख्यलय् वय्कलं यानादीगु योगदानया कदर यासें ईलोहं प्रकाशन प्रा लि पाखें पिदनाच्वंगु पेजथ्री बाःछिपौया ग्वसालय् स्वतन्त्र संसार महर्जन लुमन्ति ज्याझ्व किपूया कीर्तिपूर सिनेप्लेक्सय् जुल ।
पेजथ्री पत्रिकाया सम्पादक दर्शनवीर शाक्यं नुगःखँ न्ह्यब्वयेगु झ्वलय् कलाकार महर्जनया गतिशील जीवनी न्ह्यब्वसें पेजथ्री बाःछि पौ सदां हे नेवाः कलाकारपिनिगु निंतिं पिदनाच्वंगु पत्रिका खः धैगु खँ बः बिल । थ्व हे झ्वलय् स्वतन्त्र संसार महर्जनया विशेषांक पत्रिका व योवन शाक्यया निर्देशनय् स्वतन्त्र संसार महर्जनयात देछानाः दयेकातःगु ‘फर्कि आउ प्रिय’ म्यूजिक भिडियाे नं पितब्यूगु खः ।
ज्याझ्वलय् यल २१ वडाया अध्यक्ष रविन्द्र महर्जनं, स्वतन्त्रया संसार महर्जन पुचः दयेकाः ज्या याये न्ह्याःम्ह व थः जक न्ह्यां मवंसें मेमेपिन्त झन न्ह्योने यंकिम्ह छम्ह व्यतित्व जूगु खँ कनादील ।
उडानया अध्यक्ष एवं वरिष्ठ फोटोग्राफर राजभाइ सुवालं स्वतन्त्र संसार महर्जन छम्ह कर्मठ कलाकार लिसें थःम्ह याःगु ज्या बांलाकेत न्ह्याब्लें कोशिस यानाच्वनिम्ह कलाकार कथं लुमंकादीगु खः । कलाकर स्वतन्त्र महर्जनं न्ह्याकुगु ज्याझ्वत पुवंकेगु निंतिं वय्कःया जहान प्रेमा महर्जनयात नं सकस्यां ग्वाहलि याये माःगु खँ कनादिल ।
चलचित्र विकास बोर्डया अध्यक्ष दिनेश डिसिं नेपालभाषाया ख्यलय् स्वतन्त्र संसार महर्जनं न्ह्याकाच्वंगु म्यूजिक भिडियो अवार्ड यात नियमित रुपं न्ह्यंकेमाःगु खँय् बः बियादील ।
नुगःखँ तयेगु झ्वलय् भिडियोया कलाकार एवं स्वतन्त्र संसार महर्जनया जहान मय्जु प्रेमा महर्जनं स्वतन्त्रं न्ह्याकुगु लँपुइ न्ह्यायेत थः परिवार पाखें हःपा दुगु खँ कनादिल । थुगु म्येया कलाकार कथं स्वतन्त्र संसार महर्जनया काय् सम्बत महर्जन, सुरेन्द्र तापाख्यःमि, लजना महर्जन व निर्भेष श्रेष्ठ दु । थुगु म्ये सुरेन्द्र श्रेष्ठं लसय् हनां दीपा महर्जनं हाःगु खः । भिडियो रक्की महर्जनं छायाँकन लिसें सम्पादन याःगु खःसा योवन शाक्यं निर्देशन याःगु खः ।
ज्याझ्वःलय् किर्तिपूर नगरपालिकाया मेयर कृष्णमान डंगोलं छपू म्ये बांलाकेगु निंतिं छम्ह जक मनूया योगदान मखुसे यक्वसिया योगदान दइगु व थुगु भिडियोस दक्वसिगु उतिकं हे मेहनत व योगदान दुगुलिं कलाकारपिं शोकय् दुसां उकियात साहसय् हिइके फुगु खँ यानाः स्वतन्त्र संसार महर्जनं थःगु जीवनय् याःगु कुतः सार्थक जूगु खँ तयादील ।
ज्याझ्वय् ईलोहं प्रकाशनया प्रबन्ध निर्देशक नरेशवीर शाक्यं कलाकारपिं प्रति कृतज्ञ जुइमाःगु मान्यताय् ईलोहं प्रकाशन न्ह्यानाच्वंगु खँ कनादिल । स्वतन्त्र संसार महर्जन थः अशक्त जुसां नेपालभाषा मनोरंजन ख्यःयात सक्रिय यायेगु ज्या समस्त ख्यःयात ब्यूगु योगदान सकलसिया निंतिं लँपु जूगू खँ कनादिल । ज्याझ्वः विराजकाजी राजोपाध्याय्ं न्ह्याकुगु खः ।
