नेपालभाषा ख्यलय् उदीयमान सः ज्वनाः वःम्ह प्रतिभाशाली कलाकार विरज महर्जनया सलय् थाैं जय नेपाल सिनेमाय् छ लिसे बाेलया नेपालभाषाया म्ये व साइली बाेलया नेपाली म्ये प्रिमियर जूगु दु । ज्याझ्वलय् गाेदावरी नगरपालिकाया मेयर भाजु गजेन्द्र महर्जन मू पाहाँ जुयाः झायादीगु ज्याझ्वलय् सकलें वक्ता पिंसं विरजया लगनशीलताया बिषयलय् खँ तःगु खः ।
ज्याझ्वलय् न्हापांगु म्ये साइलि क्यंगु खः । थुगु म्येया शब्द संगीत व संयाेजन जुगल डंगाेलं यानातःगु खःसा कृषल श्रेष्ठ व श्रीतिका श्रेष्ठया अभिनय थुकी दुथ्यानाच्वंग दु । म्येया निर्देशन रामकृष्ण खड्गीं यानातःगु दु अले छायाँकन रक्कि महर्जनं यानातःगु दु ।
नेपालभाषाया म्ये छ लिसेया म्ये ग्वः व संगीत रामकृष्ण खड्गीया खःसा संगीत संयाेजन जुगल डंगाेलं यानातःगु दु । म्येया निर्देशन रामकृषा खड्गीं यानातःगु खःसा छायाँकन रक्कि महर्जनं यानातःगु खः । थुगु म्येय् नं कृषल श्रेष्ठ व श्रीतिका श्रेष्ठया अभिनय दुथ्यानाच्वंगु दु ।
थाैं कन्हे अष्ट्रेलियाय् च्वनाः आखः ब्वनाच्वंम्ह विरज दच्छिइ छक्व धैथे नेपाः वयाः म्ये रेकर्डिंग यानाः वनिगु यानाच्वंगु खः । विरजं थेच्वय् नं १४दँ दुबलय् हे एकल साँझ याये धुंकुगु खः । विरज महर्जनं पेजथ्री पिपल्स च्वइस अवार्डया स्वंगूगु संस्करण नेसं ११३७य् उदियमान मिजं सःया अवार्ड त्याकेत ताः लाःगु खःसा प्यंगूगु व न्यागुगू संस्करणय् नं नामांकनय् दुथ्यानाच्वंम्ह प्रतिभा खःसा निर्देशक रामकृष्ण खड्गीं पेजथ्री पिपल्स च्वइस अवार्ड ११४६य् उत्कृष्ट म्यूजिक भिडियाे निर्देशकया सिरपाः त्याकेत ताः लाःगु खःसा नेसं ११३०, न्हापांगु संस्करणय् नं सिरपाः त्याकेत ताः लागु खः । अथे हे संगीतकार जुगल डंगाेलयात पेजथ्री अवार्ड ११४६य् पेजथ्री सम्मान लःल्हाःगु खःसा थ्व सिबें न्ह्यः नं निक्वः तक पेजथ्री अवार्ड त्याके धुंकुगु खः ।
