मछालेगु बानीया 1m भ्यूज पुवंगु लसता हना ज्याझ्वः नेपाः ब्यांक्वेटय् जुल । ज्याझ्वःलय् मू पाहां कथं सामाजिक विकास मन्त्री हरिप्रभा खड्गी श्रेष्ठ झायादीगु खःसा म्ये लिसे आवद्ध कलाकार एवं प्राविधिकपिन्त नं सम्मान याःगु खः । जापान निवासी सुनिल कुमार शाक्यं निर्माण याःगु थुगु म्ये मछालेगु बानी थौंसिबें ६५ बर्ष न्ह्यः हनेबहम्ह प्राध्यापक सुवर्ण शाक्यं च्वयातःगु खःसा थुगु म्येयात सदाबाहार म्येहालामि मय्जु निशा देशारं हालातःगु खः। म्येया संगीतकार न्ह्यु बज्राचार्य खः अले म्येया संगीत संयोजन गोपाल रसाइलिं यानातःगु दु ।
म्येया निर्देशक सुजन बज्राचार्य ‘ख्वप’ खःसा थुकी लोकंह्वाःपिं कलाकार मनोज महर्जन, नेरिसा महर्जन लिसें वरिष्ठ कलाकार रवि डंगोललिसें आपलं कलाकार दुथ्याः । थुगु म्येया परिकल्पना व निर्माण व्यवस्थापन केभिएस लुभुं (केभिएस प्राेडक्शन हाउस, लुभुं) यानातःगु खः ।
ज्याझ्वलय् केभिएस लुभुं थुगु म्येया भ्यूज् दश लाख पार जुयाः मन तसकं हे हर्षित जूगु लिसें थुगु म्येय् प्रा.सुवर्ण शाक्य, न्ह्यु बज्राचार्य, निशा देशार थें सकलें हे दिग्गजपिं दुथ्यानाःच्वंगुलिं थःम्हं यक्व हे हाथ्याः नालाः म्ये दयेकाःगु खँ तयाःदिल ।
वरिष्ठ कलकार रवि डंगोलं थौं कन्हे सकस्यां हे म्ये बुष्ट यानाः भ्यूज थकयाः च्वनिं तर थुगु म्ये च्यालाः धैथे ई बीकाः १० लाख भ्यूज् पू वंगुलिं थुगु म्ये छतका दां नं खर्च मयासे अग्र्यानिक भ्यूजं १M थ्यंगुलिं गर्व याना धकाः धयादिल ।
मू पाहाँ माननीय हरिप्रभा खड्गी थुगु म्येया तारिफ याःसें लोकतन्त्र वयेधुंकाः स्थानीय म्ये चकनाः वनाच्वंगु खँ तयादील । लिसें स्थानीय ब्वनेकुथिइ मस्तय्त सामाजिक मुल्य मान्यता मचां निसें स्यने माःगु खँय् जोड बियादिल ।
ज्याझ्वःया ग्वसाः खलः पाखे सुनिल कुमार शाक्यं नेवाः त न्ह्याथाय् नं म्हाः म्हाः धायेगु बानी जुगुलिं थःम्हं म्हाः म्हाः इभेन्टस् धकाः नेपाल वयेगु इलय् छगू ज्याझ्वः यानाः वयाच्वनागु खँ तयादिल । राजनीतिइ नं म्हाः म्हां धायेगु, म्ये छपू हाः धाःसां म्हां म्हां धायेगु बानी यानाः झीगु पुलांपुलांगु म्ये तनावनीन धकाः हे थज्योगु ज्याझ्वः यानाच्वनागु खँ तयादील ।
