जनकवि दुर्गालाल श्रेष्ठया च्वसाय् जुजुकाजी रंजित व रत्न शोभा महर्जनया सलय् मनराजा नकःमिया संगीत व जुगल डंगोलया संयोजनय् चखुंया पलाः म्येया भिजुअलया प्रिमियर किर्तिपुर सिनेप्लेक्सय् जुल। ज्योति म्यूजिकया न्ह्यब्वयाःय् बिजन राज बज्राचार्यया निर्देशनय् थुगु म्येय् रुबी लाकाया कोरियोग्राफी दु । म्येयात दिपक कपाली व रुबी लामां सह निर्माण यानातःगु दु । थुगु म्येय् रुबी लामा व अनुज शाक्यया जोडी न्ह्यब्वयातःगु दु ।
प्रिमियर लिसें छगू बःचा हाकःगु ज्याझ्वः नं जूगु खः । ज्याझ्वलय् म्येहालामि जुजुकाजी रंजितं नेवाः म्येया संरक्षण व सम्बद्र्धन राज्यया दायित्व खःसां राज्य मौन च्वनाच्वंगु खँ न्ह्यथनादिल । वरिष्ठ सिने पत्रकार बिजय रत्न असंबरें थुगु म्ये दुर्गालाल श्रेष्ठं च्वयातःगु व म्येया टाइटल स्वइबलय् मचा म्ये जुइ धकाः तायेकाःगु तर थःगु बिचाःयात निर्देशक बिजनराज बज्राचार्यं गलत साबित यानां मन त्याकल धकाः तारिफ यानादील ।
