न्हूगु नेपालभाषाया मतिना म्ये ‘थिकु थिकु’या म्यूजिक भिडियो कीर्तिपुर सिनेप्लेक्सय् प्रिमियर जूगु दु । ज्याझ्वः ज्यापु महागुथि नेपाः, कीर्तिपुर नगर समितिया ग्वसालय् जूगु खः ।
थुगु म्येय् सतीश महर्जन व रत्नशोवा महर्जनया सः दुथ्याना च्वंगु दु । थुगु म्ये कुलबहादुर महर्जनं च्वयादीगु खःसा लय सतीश महर्जनं चिना जीवित जल्मिं संगीत संयोजन यानातःगु दु । म्यूजिक भिडियोया निर्देशक रजिन महर्जन खः ।
‘थिकु थिकु’ निम्ह न्हूपिं मतिनामिपिनिगु मतिनाया बाखनय् आधारित म्ये खः । भिडियोलय् मनोज महर्जन व नेरिश महर्जन अभिनय दु थ्यानाच्वंगु दु।
म्यूजिक भिडियो सार्वजनिक ज्याझ्वलय् मूपाहां कथं ख्यालि जुजु मदनकृष्ण श्रेष्ठ उपस्थित जुयादीगु खः । रामभोला महर्जनया सभापतित्वय् उगु ज्याझ्वः जूगु खः ।
म्यूजिक भिडियोया समीक्षा दर्शनवीर शाक्यं यानादीगु खः । वय्कलं गीतकार कुलबहादुर महर्जनया कुतःयात च्वछानादीगु खः । ७८ दँया उमेरय् नं न्हूगु मतिना म्ये च्वयादीगुलिं वय्कःया प्रशंसा यानादिसें न्हापा च्वयातःगु पुलांगु म्येया शब्द मछ्यसे न्हूगु म्ये सिर्जना यायेगु बांलाःगु कुतः जूगु धयादिल । लिसें शाक्यं भिडियो निर्देशक रजिन महर्जनया प्रशंसा नं यानादीगु खः । भिडियोय् कलाकारतय् दथुइ बांलाःगु केमेस्ट्री क्यनेत निर्देशक सफल जूगु वय्कलं धयादीगु दु ।
ज्याझ्वलय् लोककवि राजभाई जकःमिं कुलबहादुर महर्जनं थःगु म्ये नियमित रुपं पिथनेमाःगु सुझाव बियादीगु खः । थःगु सिर्जनालिसे निष्क्रिय जुयाच्वनेवं कुलबहादुर महर्जनयात यक्वस्यां म्हसिइ मखु धकाः वय्कलं धयादिल । नियमित रुपं म्ये पिथनाः जक अप्वः मनूत दथुइ वय्कः याकनं भ्यलय् पुनिगु खँ न्ह्यथनादिल ।
उगु ज्याझ्वलय् म्येया कलाकार व प्राविधिकपिन्त मतिनाया चिं लःल्हाःगु खः । म्ये व भिडियो निर्माणय् ग्वाहालि यानादीपिं सकसितं नं हंगु खः ।
‘थिकु थिकु’ पिदनेवं नेपालभाषाया संगीत ख्यलय् मेगु छगू न्हूगु मतिना म्ये थप जूगु दु । थुगु म्येय् न्हूगु पुस्ताया कलाकारपिनिगु सिर्जनशीलताया लिसें छम्ह वरिष्ठ सर्जकया नं न्ह्यब्वःगु दु ।
