लाखे अ डिफरेन्ट मि, छगू न्हूगु प्रयाेग

लाखे
शर्टमूभीया छगू विषय लाखे जुया:च्वंगु दु । आदिवासी जनजातीया प्याखँनय् आदिवासी जनजातीया हे विवषयवस्तु दयेमा: धैगु मान्यता नं दु । लाखेया विषयलय् जक हे निगु स्वंगु शर्ट मूभी तयार जुइधुंकुगु दु । द मिथ, लाखे, प्याखनय् लाखेयात पात्र दयेका न्ह्यब्वयात:गु दुसा लाखे, अ डिफरेन्ट मि नांया शर्ट मूभी आ: पिदंगु दु । इन्टरटेन्मेन्ट नेपाली टिभिइ लाखे अ डिफरेन्ट मि शर्ट मूभी स्वयेगु दु । थुगु हरर थ्रिलर व रोमांचक एक्शन शर्टमूभीया निर्देशक ख: प्रदीप खड्गी । प्रदीप खड्गी शर्टमूभी ख्यलय् छम्ह सकृय निर्देशक कथं म्हस्यु । प्रदीप खड्गीया सागा:, न्हेका सिं, द राइड थें जा:गु शर्टमूभी दयेके धुंकुगु दु सा किर्तिपुर द लिजेण्ड अफ किर्तिलक्ष्मी थें फिचर फिल्म दयेके घुंकुगु दु । अले बिग् बजेट संकिपा च्वापूफय् नं निर्माणाधीनय् लानाच्वंगु दु । प्रदिप खड्गीया निरन्तरता मनोरंजन ख्यलय् छगू सेल्लागु उपस्थीति ख: ।

बाखँ
लाखेया बाखं तसकं हे रोमांचक अले रहस्यमय । छक्व स्वयेवं थुगु प्याखंया बाखं थुइके थाकुइ । प्याखँया विशेषता धैगु छक्व स्वये धुंका: हाकनं छु जूगु धका: दोहरेयाना: स्वये हे मा: । बाखँनय् छम्ह मनूया न्ह्यलं चाइ । न्ह्यलं चायेवं न्ह्योने लाखे वइ । लाखे वया: उम्ह मनूयात स्यायेत स्वइ । उम्ह मनू बिस्युं वनिं तर विस्युं वनां समस्याया समाधान मजुइगु तायेका उम्ह मनुखं लाखेलिसे प्रतिवाद याइ । अन्तय् व लाखेयात स्याइ तर मेगु छगू मोड वइ ।

कलाकार
शर्ट मूभिइ म्हो हे जक कलकार दइ । थुकि नं निम्ह हे जक पात्र दु । छम्ह सामान्य मनू अले मेम्हे लाखे । तर प्याखंया बाखँकथं पात्र धा:सा छम्ह हे जक । प्याखनय् विक्रम महर्जन व बिनय श्रेष्ठया अभिनय दु । निम्हं पात्रया अभिनय् स्वभाविक खने दु । निम्हं पात्र छम्ह हे ख: वा मखु धैगु खँय् नं विवाद ब्वलने फु तर थज्योगु विवादं छुं मपा: । प्याखँया प्रस्तुति बिस्कं जुया: च्वंगु दु । छगू टाइम लूपय् लानाच्वंगु दु । नेवा: स्वकुमिपिंत टाइम लूपया विषय न्हूगु तायेफू । छगू साइ–फाइ जनरया प्याखं दयेका प्रस्तुति यानात:गु दुसा प्याखंया बाखं धा:सा नेवा: पौराणिक पात्र व मिथया लिधंसाय् च्वयात:गु दु । प्याखँ गन सिधइ अनं हे शुरु जुइ । टाइम लूपया अवधारणा नं थथे हे ख:, गनं अन्त जुइ अनं हे प्याखं शुरु जुइ । थज्योगु अवधारणाया प्याखं संभवत थ्व न्हापांगु हे जुइ । सुशिल राजोपाध्याय थुगु प्याखनय् छम्ह निर्माताया रूपय्र दु । पिज्व:गु लाखे प्याखँ छगू परम्परागत बाखं थें हे ख:सां थुकीया अन्त बिस्कं हे दु । सुशिल राजोपाध्याय्या छम्ह च्वमि कथं सकस्यां म्हस्यु । थ्व सिबें न्हापा नं वा:चा: नांया शर्ट मूभि पिदंगु दु । उगु प्याखँ नं छगू हरर प्याखँ ख: । शुशिल राजोपाध्याय्या च्वसाय् न्हूगु सवा:या बाखँ व ट्वीस्त न्हूगु मखु  । छम्ह निर्माताया भुमिकाय् नं वय्कः न्ह्याेने दँ वःगु दु ।

बांला:गु पक्ष
लाखेया बांला:गु पक्ष थुकीया प्लट ख: । टाइम लूपया सप्राइज इलिमेन्ट ख: । स्टोरी लाइन ख: । कलाकारया अभिनय् व थ्रिल्सय् नं यक्व मेहनत यानात:गु दु । छगू शर्ट मूभी थुगु कथं एक्शन दृष्य दुथ्याकात:गु तारिफ योग्य जु ।

विश्लेषण
लाखे शर्टमुभी कलाकार विक्रम महर्जनया होशय् वयेवं मोबाइल चेक याइ । मोबाइल डेड जुइ । थुगु दृष्यं मुक्कं छगू टाइमलाइनयात न्ह्यब्वयात:गु दु की थुगु प्याखँया टाइम लाइन आ: यागु ख:, न कि पुलांगु पौराणीक ई । थुगु टाइम लाइनय् विक्रम महर्जनं फिनात:गु वसलं नं प्याखँया टाइमलाइन थौं या ई धका: क्यनिं तर प्याखनं विक्रम महर्जनं व थौंया युगय् लाखय्या स्वापू छु धैगु क्यनात:गु मदु । छगू फाय्न्टासी प्याखँ वा थौंया इलय् व लाखे गनं गथे वल धैगु स्टाय्ब्लिस मया: । प्याखँया मू कम्जोरी हे प्याखँया पात्रतय्गु स्वापू छु दु धैगु क्यने मफु । निम्हं छगू बाखँया पात्र च्वमिं च्वया: थने थें जक न्ह्यथनात:गु दु । स्टोरी लाइनय् भचा ध्वाथुके फुसा प्याखँ अझं न्ह्यइपुइगु ख: । तर थुगु हे प्याखँयात भचा आध्यात्मिक रूपं स्वल धा:सा न झी होशय् दइबलय् झी दुने नं अनेक कथंया असुर, अमानवीय तत्व त दया:च्वनिं (यद्यपि लाखेयात छगू मभिंगु तत्वया रूपय् प्रतिनिधित्व याकात:गु दु:सां झीगु संस्कारय् लाखेयात द्य:या रूपय् नं पुज्यायेगु या:) । झी थ: दुने दुगु असुरीय शक्ति पाखें न्ह्याक्व बिस्युं वंसां बिस्युं वने फइ मखु । झी दुने दुगु अमानवीय तत्व झीसं हे त्वा: ल्हाना: छ्वयेमा: । तर थज्योगु अमानवीय गुण झीके हाकनं हाकनं ब्वलना: च्वनिं । उकिं झी छगू टाइम लूपय् लानाच्वंगु दु । झीसं हरेक पटक थ: के मनय् बुया: वइगु अमानवीय गुण विरुद्ध संधर्ष यानाच्वने मा: । छगू अमानवीय गुण लिनां छ्वल धा:सा हाकनं मेगु अमानवीय गुण बुया:वइ । थ्व हे जीवन संधर्ष ख: धैगु खँ थुगु शर्ट मुभीं न्ह्यब्वयात:गु दु । प्याखँ अमूर्त रूपं थुइकेत थाकुइ तर छम्ह निर्देशकया ज्या धैगु हे थथे हे अमूर्त बिचा: न्ह्यब्वयेगु जुया:च्वनिं व जुइ नं मां ।

आलोचना
लाखेया इन्ट्रो शटय् भचा मेहनत याये ज्यूगु ख: । लाखेयात स्टाय्ब्लिस यायेत छुं भचा फूटेज बिया: हरर व थ्रिलया पक्ष बल्लाके ज्यूगु ख: । तर लाखे क्येने सातकं हे एक्शन शुरु जुइ ।
प्याखँया संवादय् मोनोलग दुथ्यानाच्वंगु दु । मोनोलग खसभासं दु । थ्व हे भाय् छगूलिं प्याखँयात नेवा: प्याखँ मखु धैगु आभाष बिइ । तर नेवा:तय्गु संस्कार, सम्पदाय् लाखेया वर्णन दु । गैर नेवा:तय्गु संस्कारय् लाखे मदु । मोनोलगया खस् भाषां यानां प्याखँया सवा: भचा खल्ल मिं । मोनोलग छगू नेवा: भासं तया: सबटाइटल तयां छुं मपाइगु ख: ।
लाखेयात मेकअप यानात:गु नं मेहनत खनेदु । तर लाखेलिसेया ल्वापुया दृष्यय् मेकअप नं भचा च्वतुला: वं ।

लिखँ
लाखे प्याखँ मनोरंजन क्षत्रय् छगू न्हूगु सवा: ख: । प्याखँया सवालं न्हूगु सोचया सवा: ब्युगु दु । निर्देशक प्रदीप खड्गीया मेहनत न्ह्याब्लेंथें तारिफ यायेबह जु । प्याखँयात सकस्यां हे स्वया: प्रतिकृया बिइगु यायेमा: ।