थौंकन्हे सकसितं हे प्राज्ञ जुइ मास्तिवः । तर जुइ धाःसा थाकु नं मजू खःनि । उच्च शिक्षां दिक्षित जुयाः मात्र भचा मन तया अध्ययन याये फयेमाः । अध्ययन याना थःगु छगू बिचार प्वंके माः । थःगु अध्ययनया लिधंसाय् छुं नं न्ह्यसः वःसा लिसः बिइमाः। मस्यूसा जिं मस्यू धाये ज्यू वा थ्व विषयलय् अध्ययन पू मवंनि धाये ज्यू। तर प्राज्ञिक वा प्राज्ञ धैगु शब्द तसकं हे मायावी थें ताः। सकसितं हे प्राज्ञिक धायेके मास्ति वः सकसितं। सन्दर्भ खः – नेपालभासा एकेदमिया जर्नल ‘नेवाः प्रज्ञा’या।
नेपालभासा एकेदमि छगू प्राज्ञिक संस्था खः। नेपालभासाया प्राज्ञिक संस्था तसकं म्हो। थ्व हे कारण सकल नेवाःतय्गु प्राज्ञिक संस्था प्रतिया आस्था थुगु हे संस्थाय् तक्यनाच्वंगु दु। नेपालभासा ख्यःयात प्राज्ञिक रूपं सक्षम यायेगु निंतिं नेपालभासा एकेदमिं च्वछायेबहगु कुतः नं यानाच्वंगु दु। नेपालभासा ख्यलय थौंकन्हे दकलय् म्हो जुयाच्वंगु छगू विधाकथं जर्नलयात निरन्तरता बिइगु कुतः नेपालभाषा एकेदमिं यानाच्वंगु दु। ‘नेवाः प्रज्ञा’या नामं नेसं ११३८ बछला निसें ११४०गुँला तक्कया दुने मुक्कं ४गू अंक पिदंने धुंकुगु दु। खुलाय् छगू ल्याः पिथनेगु ताःतुना खः। थुकीयात निरन्तरता बियाच्वंगु नं तःधंगु हे खँ खः। तर निरन्तर जक बिइगु नामय् जर्नलया स्तर झन कुहांवनाच्वंगु जुल ।
निरन्तरताया नामय् जर्नलयात छगू साहित्यिक पत्रिकाय् हिइकेगु धयागु छगू असफल व अदुर्दशीताया खँ खः। नेपालभासा प्राज्ञिक संस्थां पिकाइगु जर्नलय् साहित्यं जायेके माःगु खँ नेपालभासा ख्यलय् एकेदेमिक मनूत हे मन्तला धैगु संकेत बिइ। वा दनिसा नेपालभासाया एकेदेमिक मनूतय्त नेपालभासा एकेदमिं कःघाये मफूतला धैगु खँ थन कुलेमाःगु अवस्था वइ। एकेदेमिक संस्था धैगु छुं स्थानीय खलः पुचः थें जाःगु संस्था मखु। थन थःगु क्षमताया आधारय्, थःगु विवेकया आधारय् थःगु तार्किकताया आधारय् थःगु खँ तयेगु खः। थःके तथ्य व थ्योरी दुसा व सकस्यां हे नाली। यदि सुयांगु बिमती दुसा तार्किक रूपं प्रतिवाद जुइ न कि व्यक्तिगत रूपं। आः ‘बकस’ बियाः जुइगु प्राज्ञ व ‘अध्ययन’ याना जुइगु प्राज्ञया लिच्वः पाः धैगु खँ बुलुहुँ थुयावये माः थें च्वं।
नेपालभासा एकेदमिपाखें पिदनाच्वंगु नेवाःप्रज्ञा प्रति आस्था दयाः हे थौं थुकथंया खँ न्ह्यब्ये माःगु खः।
बागमती प्रदेशया सरकारं निश्चित बजेत बिइ धुंकाः नं जर्नलया नामय् थज्योगु ल्याः पिकयाच्वेनेगु खःसा नेपालभासा एकेदमिया स्तरय् सकस्यां हे न्ह्यसः थनिं। मेमेगु भाषीतय्सं झीगु जर्नल स्वल धाःसा झीगु एकेदेमिक क्वालिफिकेशन नांगा जुइ। जर्नलया मूल्य व मान्यतायात न्हूगु परिभाषा बिया लिचिलेगु कुतः एकेदमिपाखें मयायेत नं इनाप याना। नेपालभासा ख्यलय् बजेटया निंतिं हे च्वसु च्वइपिं तसकं म्हो। छगू रिसर्च आर्टिकल च्वयेत म्होतिइ नं प्यला निसें न्याला खुला माः। व ल्याखँ पारिश्रमिक नं एकेदमिं बिइफइगु अवस्था मदु। उकिं खँ पारिश्रमिकया जक नं मखु।
प्राज्ञिक क्षत्रय् थुकथंया जोर्नल पिदंगु बिषयलय् चर्चा जूगु नं तायेमदु। प्राज्ञिक मनूतय्सं थुगु बिषयलय् खँ ल्ह्वने माःथें ताः। सदां सुम्क च्वनां थुकीयात निरन्तरता बिइगु धयागु बांलागु खँ अवश्यं मखु। प्राज्ञिक संस्था आर्दशया संस्था खः, थुकिं हे नं मिसा वा मिजं च्वमि धकाः ब्वथलेगु गुलित बौद्धिकरूपं पाय्छि खः ? थुकियात एकेदमीया जर्नल धकाः प्रचार यायेगुया औचित्य हे छु दत ? थ्व खँ नेपालभासा ख्यःया हे प्रतिष्ठाया खँ खः।
पाय् छि ताल