स्वनिगःया वासिन्दा मानौं वासिन्दा हे मखु, लुँया ख्येँ थ्वइपिं हेँय् लात थें च्वं, नेपाल सरकारया निंतिं । जब जब सरकारयात स्वनिगःवासिन्दाया आवश्यक जुइ माःकथं अपुक्क हेयेका, ख्याना गः दुने स्वथनातल तर सरकारं धाःसा लुँयागु ख्येँ काये धाःसा ल्वमं मजू । लकडाउनया कारणं स्वनिगःयात प्यला धयाथे हे लकडाउन यात । नेपाल सरकारं लकडाउनया भरपाइ कथं राहत इन तर धात्थेंया स्थानीय स्वनिगःवासीयात धाःसा राहतया ‘र’ तकं वथ्यं । स्वनिगःवासी प्यला तक्क थःगु व्यापार व्यवसाय थप्प याना नं सरकारयात मतया ध्येबा लिसें कर नं पुलाच्वना तर नं सरकारपाखें थुकियात न्ह्यथनेमाःगु ग्वहालि मतायेकू । १२० दिं तक्क जूगु लकडाउनया अन्तिम इलय् सरकारपाखें नाका पने मफूगु व पूवंक जाँच याये मफूगु अवस्थाय् स्वनिगलय् कोरोना संक्रमिततय्गु ल्याः नाका चायेकुनिसें सिइदयेक हे अप्वया वल । लाचारीपन क्यंसें सरकारं ल्हाः ल्ह्वंगु हे अवस्था आः नं दु ।
कारोना ल्वय् ग्यानापूगु अवस्थाय् थ्यंसां नं सरकारी व गैर सरकारी थी थी ज्याझ्वः जुयाच्वंगु दु । तर जब जात्रा नखःचखःया खँ वइ सरकारं बन्देज तयेत स्वइ । जात्रा नखःचखः थौंया इलय् छगू कथंया वैकल्पिक ज्याखँ जुइ धुंकल । मछिंगु अवस्थाय् मनूतय्सं थःत माःगुकथं छिंका ज्या याइ । यक्वसिया बुँ मदयेधुकुगु कारण नखः चखः हनेगु खँय् एड्जस्टमेन्ट याः। मनूत थः हे नं हिलाच्वंगु दु । तर जात्राया सवालय् गुथि संस्थान पाखें ज्या न्ह्याके धुंकाः नं जात्रा दिकी धायेगु व साया नखःयात नं सावधान जुयाः जक हे हँ धायेगु याः जबकी जनै पुन्हिया बारे सरकारं छुं कथंया धापू नं न्ह्योने महः की थुगु नखः झन तप्यंक छम्हेस्यां मेम्हेसित थियाः जनै चिके माःगु जुयाः कारोना सरे जुइ थुगुसी छक्व मचिके धकाः मधाः । थुकथं स्वयेगु खःसा सरकारं नेवाःतय्त छुं कथं उत्तेजित यायेगु नीति नालाच्वंगु दु ला धयाथे च्वं । यदि सरकारं स्वनिगःया नाका कडाइ यानातःजु जुसा थुकथंया नखःत विशेष सावधानी विना झंझट हने फइगु खः। तर थथे मजू ।
सरकारया वाः वः फय् वः रवैयाया कारण मनूत स्वनिगलय् चान्हे चान्हे हे दुहांवयाच्वन । सरकारया लाचारीया कारण न्ह्याब्लें सरकारं स्वनिगःवासीयात हे जक थथे याये मते, अथे याये मते धकाः अंकुश तयेत स्वयाच्वंगु दु । जबकी थ्व सरकारयात स्वनिगःवासीं हे भोट बियाः ल्यःगु सरकार खः । उकिं थुगु सरकारया दायित्व धैगु स्वनिगःवासीया निंतिं जुइ मा न की स्वनिगः पिने च्वंपिंनिगु निंतिं ।
कोरोनाया थज्योगु कष्टकर इलय् नं नेपालसरकार हाकनं छक्व चुके जुयाच्वंगु दु । लकडाउन धुंकाः आ हाकनं शट डाउन धकाः थी थी सरकारी सेवाः बन्द यानाच्वंगु दु । स्थानीय सरकारया उपस्थीति जुइमाःगु वा खनेदयेमाःगु नगरपालिका तकं सुरक्षाया काराणं बन्द याःगु दु । मछाः मजुसे कर पुवाः धकाः लकडाउन चायेकेगु तर दायित्वया इलय् जिमिसं मफूत धकाः बिस्युं जुइगु रवैयाया कारण सरकारया धात्थेंया ज्याखँ छु धयागु खँय् सकस्यां न्ह्यसः थने आवश्यक जू ।
पेजथ्री दँ १६ ल्याः ४ (श्रावण ३२ गते प्रकाशित)
