म्यूजिक भिडियो धयाकथं थुइकेफइ म्येया भिडियो । साधारणत म्यूजिक भिडियो धालकि नन् फिल्मी म्येयागु भिडियो थुयाच्वनी । तर फिल्मयागु म्येयात नं म्यूजिक भिडियो धाये मफइगु धाःसा मखु । म्यूजिक भिडियो धायेबलय् फिल्मी अथवा नन फिल्मी म्येया भिडियो, आःयात थुलि धाये ।
मू विषयवस्तुइ दुहांवने स्वयां न्ह्यः छगू निगू दसुया चर्चा याये । हलिउडपाखे स्वयेबलय् फिल्मय् म्ये तयेगु चलन मदु । अथवा धाये अन फिल्मय् म्ये तये हे माः धयागु मदु । अथेसां दसु कायेत छगू निगू म्यूजिक भिडियो ला द हे दुनि । छगू बायोपिक पिहांवल, बोहेमन ¥यापसोडी । क्वीन बाय्न्डया मेन सिंगर फ्रेडि मर्करीयागु उगु बायोपिक भचा फिक्सनल भचा वृत्तचित्र, नन फिक्सनल पहःया संकिपा खः । म्येहालामिया बायोपिक दुने गुलिं म्यूजिक भिडियोया नं लू वइ, गुलिं लाइभ प्रोग्रामया नं लू वइ । तर व दक्वं लू संकिपा हे स्वयाच्वनागु थें जू, नन फिल्मी वा लाइभ प्रोग्राम स्वयाच्वने थें तकं मजू ।
आः झीसं आपाः हे स्वइगु हिन्दी संकिपा अथवा बलिउडपाखे स्वये । छपु म्येया दसु काये । धीरे धीरे से मेरी जिन्दगीमै आना । सन् १९९०य् पिहांवःगु तसकं नांजाःगु संकिपा आशिकीया छपु सुपर हिट म्ये । संकिपाय् थुगु म्येयात बाखंकथं फिल्मिङ यानातःगु ला द हे दु । उकिया नापं सन् २०१५य् यो यो हनि सिंहं थुकियात रीमिक्स यानाः हाकनं हाल व उकिया म्यूजिक भिडियो नं पिहांवल । म्यूजिक भिडियोया मोडलत नं बलिउडया नांजाःम्ह हिरो ऋतिक रोशन व नांजाःम्ह हिरोइन सोनम कपूर । म्यूजिक भिडियो स्वयाच्वनेबलय् न आशिकी संकिपाया भिडियो हे लुमनावः, न ऋतिक व सोनम दुबलय् न्हूगु संकिपाया म्ये खःला धइथें ताः । छपु म्यूजिक भिडियो हे खः धइगु सी दु ।
आः कलिउडपाखे हे वये । भूषण दाहाल नांजाःम्ह म्यूजिक भिडियो डाइरेक्टर । व हे नांजाःम्ह म्यूजिक भिडियो डाइरेक्टर भूषण दाहालं छगू संकिपा नं निर्देशन यात, कागबेनी । संकिपाया छम्ह प्रमुख कलाकार नं नांजाःम्ह पप गायक निमा रुम्बा । उकी छपु म्ये नं दु ‘जीबन खरानी बन्छ’ । १९७४ एडि बाय्न्डं हालातःगु उगु म्येया भिडियो स्वयेबलय् संकिपाया म्ये धकाः धायेफु । निमा रुम्बाया ख्वाः खनेदुसां उकिं संकिपा खःकि मखु धइगु अलमल मयाः ।
आः वये नेवाःउडपाखे । नेवाःउडपाखे धाःसा थुकथंया दसु बिइत काचाक्क छुं नं म्ये लुमनामवः । संकिपाया धाःसां, नन् फिल्मी धाःसां फिल्मिङ छगू हे पहः वः । म्ये जक स्वयेबलय् संकिपाया खः कि नन फिल्मी खः धाये हे थाकु । थुगु च्वसुया मुख्य विषयवस्तु नं थ्व हे खः । अज्याःगु छु पक्षं फिल्मी अथवा नन् फिल्मी म्यूजिक भिडियोयात फरक दयेकी । फिल्मी अथवा नन् फिल्मी म्यूजिक भिडियो दयेकेबलय् छु गज्याःगु पक्षं ज्या याइ अथवा छु गज्याःगु पक्षय् ध्यान बीमाः ।
वरिष्ठ सिने पत्रकार लिसें संकिपा निर्देशक विजयरत्न असंबरें वीर गणेशमान, मनको टुक्रा थज्याःगु संकिपात नं निर्देशन यानादीगु दुसा दक्कले न्हापांगु नेवाः म्यूजिक भिडियो निसें आपालं नेवाः म्यूजिक भिडियोत निर्देशन यानादीगु दु । वय्कःया ल्याखं नं फिल्मी म्यूजिक भिडियो व नन फिल्मी म्यूजिक भिडियो फरक खने दये हे माः । तर नेवाः म्यूजिक भिडियो ख्यलय् थुकथंया फरकपना खनेमदुगुलिइ क्यामेरा प्लेसमेन्ट दक्कले तःधंगु खँ खः । क्यामेरा गन तयाः गुकथं खिचे यायेगु उकिं हे म्यूजिक भिडियोया लुक्सयात पाकी व फिल्मी व नन् फिल्मी लुक्स बी । उकिया नापं सुटिङ वा प्रोडक्सनया झ्वलय् छ्यलीगु हार्डवेयर अथवा हलंज्वलनं नं पाकी । ‘क्यामेरा प्लेसमेन्टनिसें कयाः कन्सेप्ट, एक्टिङ, कोरियोग्राफी, भिडियो एडिटिङ वा कलर एनालाइजिङ छुं नं पक्षय् नेवाः संकिपा ख्यलं थुखेपाखे ध्यान हे मब्यूनि । फिल्मी वा नन फिल्मी म्यूजिक भिडियो पाकेमाः धयागु कन्सेप्ट हे डेभलप मजूनि’ विजयरत्नं धयादिल ।
संकिपा लिसें म्यूजिक भिडियो नं निर्देशन यानाच्वंम्ह थौंकन्हय्या व्यस्तम्ह निर्देशक देवकुमार श्रेष्ठं नं हार्डवेयरया खँय् बः बियादी । आपाः यानाः नेवाः फिल्मय् नं अले नन फिल्मी म्यूजिक भिडियोया सुटिङय् नं डिएसएलआर क्यामेरा हे छ्यलेगु यानाच्वन । संकिपाया नितिं धकाः अलग्ग हे क्यामेरा दयेकातःगु दुगु व अज्याःगु क्यामेरां सिनेमाटिक लुक्स हे बी, गुकिं यानाः फिल्मी वा नन फिल्मी म्यूजिक भिडियो फरक खनेदइ । उकिया नापं सिनेमाटोग्राफी नं मेगु महत्वपूर्ण पक्ष खः । डिएसएलआर हे छ्यःसां फरक खनेदयेकेज्यूगु वय्कःया धापू खः । ‘फिल्मया नितिं सिनेमाटोग्राफी छता कथं यायेमाःसा नन् फिल्मी म्यूजिक भिडियोया नितिं मेगु हे कथं यायेमाः । तर नेवाः फिल्मी म्यूजिक भिडियो व नन फिल्मी म्यूजिक भिडियोया सिनेमाटोग्राफीइ व बिचाः यानाच्वंगु खनेमदु’ निर्देशक देवकुमारं धयादी । थ्वलिसें म्येया कन्सेप्ट व आर्टिस्टया पर्फमेन्स नं छगू हे कथं जुयाच्वंगुलिं नं खनेदयेमाःगु फरकपना खनेमदुगु देवकुमारया धापू खः ।
गुलिसिनं म्यूजिक भिडियो स्पेसलिस्ट तक नं धायेगु यानातःम्ह सिनेमाटोग्राफर लिसें लुःजः सिंहं नं फिल्मी व नन फिल्मी म्यूजिक भिडियोयात दक्कले न्हापां क्यामेराय् हे पाकीगु खँ धयादी । छगू खँ ला हार्डवेयर हे जुल । फिल्मया क्यामेरा व म्यूजिक भिडियोया क्यामेरा हे पाइगु वय्कःया धापू दु । म्यूजिक भिडियो सुट यायेत नं व हे क्यामेरा छ्यःसां क्यामेराया ज्यां पाकीगु नं लुःजः सिंहं धयादी । ‘थौंकन्हय् फिल्म सुट यायेत रेड क्यामेरा छ्यलेगु याः, तर गुलिखे म्यूजिक भिडियो रेडं नं सुट जू । तर फिल्म व नन फिल्मया सिनेमाटोग्राफीं हे पाकी’ लुःजःया धापू खः ।
लुःजःया धापू कथं फिल्मया म्यूजिक भिडियोयात फिल्मया बाखनं सालाच्वनीगु जूगुलिं व हे ल्याखं फ्रेमिङ डिफाइन जुइ व तपाःगु पर्दाय् क्यनेगु ल्याखं हे उकिया फ्रेमिङ, बाय्कग्राउन्ड दक्वं डिफाइन जुइ । म्यूजिक भिडियो टिभिइ व यूट्युबय् स्वयेगु ल्याखं हे सुट जुइ । लिसें फिल्मय् बाखंया प्लटया ल्याखं उकी गज्याःगु कलर टोन जुइमाः धइगु दयाच्वनी । म्यूजिक भिडियोया सिनेमाटोग्राफी, कलर आदियात बाखनं सालीमखु, छपु म्यूजिक भिडियो हे मुक्कं छपु बाखं जुइ । व ल्याखं नं कलर नं पाइ । थज्याःगु हे खं फिल्मी व नन फिल्मी म्यूजिक भिडियो पाइगु व पाये नं माःगु लुःजःया धापू खः । थज्याःगु थीथी पक्षयात बिचाः मयाइगु, होमवर्कय् गाक्क ई मबीगु हुनिं हे नेवाः ख्यलय् फिल्मी व नन फिल्मी म्यूजिक भिडियो छगू हे कथंया खनेदयाच्वंगु लुःजःया बिचाः खः ।
खतुं क्यामेरा सुट यानाः खिचे जुइगु सनीगु किपा दक्वं हे फिल्म खः । तर साधारण अर्थय् फिक्सन अथवा कथानक संकिपा फिल्म खः धकाः थुइ । फिक्सनपाखे नं सर्ट फिल्म, फिचर फिल्म दयाच्वनी । उकी नं म्ये, अथवा धाये म्यूजिक भिडियो दयाच्वनी । उकिया नापं टिभि सिरीयल नं दयाच्वनी । टिभि सिरीयलय् नं म्ये दयेफु । अले नन फिल्मी म्यूजिक भिडियो दयाच्वनी । सकतांया थःथःगु कथंया थिम दयाच्वनी, उकिया स्क्रीनिङ गन जुइ धयागु ल्याखं, उकिया कथावस्तुया ल्याखं व मेमेगु थीथी पक्षया ल्याखं उकिया क्यामेरा वर्क, एडिटिङ, कलर आदिया बिचाः यायेमाःगु खनेदु । मूलधारया धयातःगु संकिपाया ख्यलय् थज्याःगु सकतां पक्षयात बिचाः यानाः ज्या यायेगु बानीया विकास जुइधुंकल । तर नेवाः संकिपा ख्यलय् बजेटया कारण क्यनाः, स्रोत साधनया कारण क्यनाः थज्याःगु पक्षयात बिचाः यायेगु याःगु खनेमदुनि । बजेट म्ह्वः जूसां, उपलब्ध श्रोत साधन सिमित जूसां सुटिङ सिबें न्ह्यः यायेमाःगु तयारी व कन्सेप्ट डेभलपमेन्टय् दुग्यंक बिचाः यानाः ज्या यायेगु खःसा नेवाः म्यूजिक भिडियोया स्तर थकाये फइगुलिइ शंका मदु ।
