सुरज ब्यंजनकार
ताः ई लिपा थौं इमेल चायेका । नेसं ११३९य् वयाच्वंगु ईमेल खनिं । ईमेल उजुं चा हे मचा । छु जुल जुइ धका च्यूता जूल । पलख लिपा चाल । बाफ रे बाफ । बाजिं बाजिं तमं तमं छ्वया हयातःगु email त ला वालछ्याल हे का । तयां तयेथाय् हे मदु । प्रकाशित जक याःसा दच्छियंक न्हियां न्हिथं प्रकाशित यायेत गाइ सायद । उकि मध्ये छम्हुति email प्रकाशन ब्वने क्वचाल । छम्हू इमेल चायेका ब्वनाबले थूकथं लुल ।
TO : झोक्कन मनिपिं नेयवा न्ह्यलुवा त
अःखतं ज्वंज्वं ला……पा,
न्ह्याक्व हे ज्यान मारा धाःसां, बांमला धाःसां छुयाय ? निसःत्या दँ न्ह्यवःनिसें नेवाःतय्त क्वह्यंका तःगु धकाः फुकस्यां स्यू । तर छिमिसं थ्व मुद्दा ल्ह्वने भाःमखंगु मखु ।
देसय दुने जातीय उत्पीडन नापं नेवाः मुद्दा ल्ह्वनेत पायेछि जुइक ह्वता व लकस चूलाका ब्यूपिं माओवादी उर्फ खाओबादी त हे खः । दुःखया खँ, १७ द्व नेपाली जनता बलि बिल अय्नं संबिधान सभाया निक्वः निक्वःतक चुनाव यायेमाःगु अवस्था ब्वल्हंका बिल ।
छिपिं थःथःगु स्वार्थया हुनि खस चप्पले ब्रम्हुंतय्गु ……. कुतुंवलकि च्याप्प ज्वने दइला धका ल्यूल्यू जुल ।
पार्टी फरक फरक कल्लर कल्लरयागु ध्वाँय् ज्वना ब्वाँय् जुल । उमित दुई तिहाई बहुमत मुनाबिल । तर छिमिके नेवाः तयेगु मुद्दा ज्वना सकल नेवाः तयेत छपाँय् छधिइ यायेगु ल्याकत मदु ।
कमसेकम न संविधान सभाया चुनावय् बहुसंख्यक नेवाः सभासद त दयेकेगुला गन खः गन खः कुतः तकं हे मयाःपिं झोक्कन मनिपिं नेवाःतनेयवाः न्ह्यलुवा त थुइक्क । छिमिगु गुबलें जय जुइमखु ।
from – छखेलाःगु नेवाःराज्य@खत्तम भविष्य.com
TO : म्वाःक म्वाकं नर्क वनिपिं भ्वासिपिं नेवाः मां बौपिं
फःस्वया ज्वज्व ला….पा….,
नसा त्वंसाय् तःमि, पुंसाय् तःमि संस्कार व संस्कृतिइ तःमि, रहनसहनय् तःमि, साँस्कृतिक जात्रापात्राय् तःमि नेवाः त छुकि जक तःमि मजू ।
व हे नेवाः भाषंयाना संयुक्त राष्ट्र संघय् नेपाः दर्ता जुयाच्वंगु सकसिन स्यू । थुज्वःगु आपलं आपलं आपा जानकारी दयेक दयेकं माःसां म्वाःसां जान्या जुया साःप स्टायण्डर्ड जुगु धका क्यनेत थःमस्तयत मांभाय् नेवाः भाय् मस्यंसे मेमेगु भाय् स्यना जुइपिं नेवाः अस्तित्व न्हंकेत च्वःकापिं भ्वासिपिं नेवाः मां बौ छिमित फुक्क नेवाः तयेगु श्राप लगे जुइमा ।
from भासा म्वाःसा जाती म्वाई@नाराजक.com
TO : माःगु सिबें म्वाःगु ज्याय् तक्यना च्वंपिं नेवाः खलःपुचःया नायोपिं
सम्बोधन याये ला हे मन मदु । थ्व तालं छिमित न्हू पुस्तां सहयाइ मखु,
जातीय खलः, भाषिक खलः साँस्कृतिक खलः नापं आपलं खलः पुचः गुपिन्सं समग्र नेवाः ख्यःयात थपु याये धका नायखिं च्वय्का, पानाका पाना बयँ हे तये नुगःस्याक्क प्रस्तावनाय् तातुना त, मनतुना त च्वया, खःथें च्वंक बेइमान खसब्रम्हु तयसं थें उमिगु हे पहःवयेक अनेतने भाषण याना थःथःपिं हे घ्वराघ्वर जक ल्वाना खलः पुचःयात NGO INGOपह वयेक पलिस्था याना थःगु स्वार्थ सिद्ध यायेत बाजिं बाजिं नायो जूपिं हे असक्षम नेयवा अदक्ष पिं छिमिगु असक्षम नेतृत्व व छिमिके थःथःगु संस्थाया सहि कार्यदिशा व कार्यनीति मदया नेवाः जाती, भाषा व साँस्कृतिक ख्यः बुलुहुं बुलुहुं तनिगु अवस्थाय दु धैगु खँ याकन वाः चायेकी । मखुसा नेवाः त आवंलि दइमखुत । थ्व दोष फुक्क छिमिगु खः । पूर्खाँ छिमित कदापि सहयाइ मखु । खःका धका कुतःयासा आःन लानि । होस न्हि होस या ।
from: जुइमफुगु नेवाः एकता@छ्यालबछ्याल.com
TO : देया चौथो अंगला खःहे मखु ध्यबा गन गन दु अन जक माःगु सिबें अप्पो इन्ट्रेष्ट तइपिं नेयवा अलपत्रकार
छिमित सम्बोधन याये मल्वः,
मूखँ – नयद्यः अलपत्रकार छिपिं सहि लँय् मदु न्हां ।
नेवाः भाषा, कला, संस्कार व संस्कृति नापं जातीय समृद्धि, जीवन शैली, जातीय एकता, समाज विकासया आपलं अल्याख ज्याखं त तःधंक चिधंक जुयाच्वंसां समाचार दयेके बहःगु विभिन्न घटना परिघटना व दुर्घटना तक हे समाचारया रूपय काइमखुपिं च्याःखर्च, लंखर्च, कमिशन आदि इत्यादी दैगु व मदैगु खँय अनुसन्धान यानालि खनखनचा वइमखुगु मजुलकि न्ह्याग्गुसां त्वहःतया पला हे तःवइ मखुपिं बरु ब्यापारिक कम्पनीपिनिगु ल्यूल्यू वनी अले ध्यबा बिइपिं व चाँजोबाजो यानाबिइपिं जयमाँपिं ल्यूल्यू जुया च्वंपि नेयवा अलपत्रकार पिं छिमिसं यक्व हे माकःफुँइ यासां छिपिं सहि लयँ मदु न्हि ।
from नेवाःसमुदाय२नेयवा पत्रकार पीडित.com
TO बरिष्ठं निसें कनिष्ठ नेवाः संकिपाः कःमि
क्षमता दयां न ल्यूने लाना च्वंपि नेवाः संकिपाः ख्य न्ह्यलं चायेकि,
नेपाःया संकिपाः इतिहासय् न्हापांगु आदिवासी संकिपाः सिलु पिकायेत ताःलाःगु गर्वया खँ ला छिमित कना च्वने म्वाःजुइ । नेवाः संकिपाः ख्यः व संकिपाःकःमि न्हियाँ न्हिथं प्रगति जुजूं वनेमाःथाय् खासा न्ह्याँ वनेथें बुलुं न्ह्यानाच्वंगु धकाः न छिमित कनेम्वाः जुइ । नेपाःया समग्र संकिपाः ख्यलय् मूमू भाला कया संकिपाः कःमि कथं ज्यायाना च्वंपि नेवाः त आपलं दु ।
बाँलागु भिंगु बस्तु बजार हलकि मात्तु माला न्याः वइ । बाँमलागु स्यंगु बस्तु सुना नं न्याइमखु । थ्व बजारया छगू नियम खः । बाँलागु फुक्क चीज बस्तु त थिके हे जुइमा धैगु मदु । दंगु भिंगु पोष्टिक जुगु आपलं ज्याखले वःगु सामान न दु । मारामार विक्रि जु । तनातन ध्यबा कमे जु । तर नेवाः ख्यलय् च्यारिटी हे जक याये धका चिधंगु सोच तथा नेवाः संकिपाः दयेका च्वंगु छाय् खः उकिया लिसः मालां माले हे मफु ।
सःपिं स्यूपिं आपलं दु तर थवं थवय् मान सम्मान व सहलहया लसक मदु । मै हुँ धैगु भावना अप्पो । छ्वकः वायेगु ज्या आपा । कलाकार तये अभिनय सिबें फेशन अप्पो । फेसबुकय् सेक्सी व सेक्सो किपाःत ब्वय् दतकि बराय् । अभिनय् क्षमता गथेयाना बाँलाके धैगु च्यूता म्हो हे जक ।
जिपिं स्वकुमि पिन्त धोति संकिपाः व गैर नेवाः भायया संकिपा व टेलिसिरियल स्वयत बाध्य यायेमते बिन्ति धाये । नसें मनसें मुंका तयागु ध्यबां बाप्वः दुरूपा व पिलाक्व स्वयेत मखु वख्वाः थ्वख्वा मदुगु मछालेपुसे च्वंगु अभिनय् स्वयेत मखु, च्वप्व मदुगु संकिपाः स्वयेत मखु,नेवाः भाषा, कला संस्कार संस्कृति जीवन शैलीया बारे स्तरीय नेवाः संकिपा बाय् टेलिसिरियल स्वया मनोरञ्जन याये धैगु आशिका ।
नेवाःजुया न विदेशी संकिपाःस्वये बाध्य छता यायेमते ।
from स्तरीय नेवाः संकिपा स्वये @आमूजामू.com
मेमेगु इमेल त चायेके हे लिमला नि । बुलुहुं चायेकेगु जुइ । मेमेगु पालय् उज्वःगु इमेल तयेके छुछु खँ दु छिकपिं लिसे यःसां मयःसां न्यनेकने याये ।
सापारूया लसताय्
