उच्च शिक्षा
नेवा: शर्ट मूभी निर्माण यायेगु ख्यलय् थौं कन्हे चर्चा वयाच्वंगु नां ख: मगन इन्टरटेन्मेन्ट । नेपालभाया टाइम्स चिहा: संकिपा: कासाय् म्युजियम शर्ट मूभी निर्माण याये धुंका: नेवा: मनोरंजन ख्यलय् म्यूजिक भिडियो लिसें गैर नेवा: भाय्या शर्ट मूभी नं निर्माण यानाच्वंगु थुगु संस्थाया गतिविधी तसकं हे आशा यायेबह जू । मगन इन्टरटेन्मेन्ट पाखें सुदय्, व मनू सु मनू (म्युजिक भिडियो) लिपा आ: उच्च शिक्षा नां या शर्ट मूभी निर्माण यानां पूवंक हे पब्लिसिटी या:गु नं दु । अथेहे मगन इन्टरटेन्मेन्टया मेगु छगू विशेषता धैगु थुगु संस्थां देयेकेगु कृतिइ छुं कथंया सम्झौता मया:से प्याखं दयेकीपिं कथं थ:गु दसू नं न्ह्यब्वया: वया:च्वंगु दु ।
बाखं
समय सान्दर्भिक बाखं नाला उच्च शिक्षा संकिपा: दयेकात:गु दु । थौंया युवा पुस्ताया समस्यायात केन्द्रीत याना दयेकात:गु बाखं तसकं मार्मिक जु । मां अबुयात पिरे यायेथें विदेश वनां आख: ब्वं वनेत मस्तय्सं बौपिन्त पिरेयाइगु व छम्ह लाचारम्ह अबुं गथे याना: थ:गु काय्या म्हगस पुवंकेगु निंतिं बलिदान बिइ धैगु बाखं मार्मिक हे जुइ । गुलिं दृष्य स्वस्वं हे मिखाय् ल: जाया: वइगु तकं अवस्था ब्वलं । काय् व बौया स्वापू धैगु सदां हे मर्मशपर्शी जुया: च्वनिं । छखा हे छेँ निम्ह च्वनानं संवाद हे मदुसां काय् व बौया संवाद धा:सा प्याखनय् खने दयाच्वनिं । बाखनय् थज्योगु दृष्य आपलं हे दु । संवेदनशील बाखं निर्देशक एवं लेखक रजेन महर्जनं ल्य:गु दु । प्याखँ स्वइबलय् नं थुगु घटना थ:गु हे छेँय् वा थ:गु हे छेँ ज: ख: जुया:च्वंगु घटना थें ताया: वइ ।
कलाकर
कलाकार कथं लक्ष्मी कुमार महर्जनया अभिनय् बांला जू । वय्कया अभिनय् स्वये बलय् पत्या: याये बह जू । छम्ह लाचारम्ह अबु कथं थ:त न्ह्यब्वयेत लक्ष्मी कुमार ता: लानाच्वंगु दु । कृष्णभक्त श्रेष्ठया अभिनय् नं बांला जु । छम्ह सपोर्टिंग कलाकार कथं कृष्ण भक्त महर्जनं थ:गु भुमिकायात न्याय्या:गु दु । निम्हं कलाकार धकिंमय् खनेदइगु इलय् स्कृनय् उपस्थीति खने दु । काय्या भूमिकाय् कृषल श्रेष्ठ नं पाय्छि जु । पासापिं लिसें थ: नं विदेश वनेगु प्रतिवद्धता ब्वंलकाच्वंम्ह थौंया पुुस्ताया प्रतिनिधित्व जुया: च्वंगु वा: चाइ । अथे हे शर्टमूभी दुथ्या:पिं मेमेपिं कलाकारया क्षमता गनं नं कुँखिनेथाय् खनेमदु ।
बांलागु पक्ष
उच्च शिक्षाया बांला:गु पक्षय् कलाकार खनेदु । बाखं नं बांलागु हे पक्ष ख:सा थुकी मेगु शसक्त पक्ष छायाँकन ख: । प्याखनय् छुं छुं दृष्य तसकं हे मार्मिक जुया:च्वंगु दु । अथे गुलिं दृष्य निर्देशकं स्क्रीन प्ले पाखें न्ह्यब्वयात:गु दु । गथेकी बौम्हेस्यां तिसा मिया: ध्येबा ज्वनावइगु इलय् अय्ला त्वना व:गु खनेदु तर प्याखनय् धा:सा अय्ला त्वनाच्वंगु दृष्य मदु । ध्यबा: मदया तसकं हे तनाव फयाच्वंम्ह मनुखं तिसा मिइ धुंका: थ:के भचा ध्येबा दयेवं अय्ला नं त्वना: ध्येबा: ज्वना:व:गु खँ प्याखँ स्वया:च्वंपिंसं अथें अनुमान याये फइगु स्थति दु । प्याखंया बाखंनं स्वकुमिया मन ज्वने फूगु हे थुगु प्याखंया बांला:गु पक्ष ख: ।
आलोचना
उच्च शिक्षाया बाखं गुलि समय सान्दर्भिक जू प्याखँया स्क्रीनप्ले व हे कथं धिसि ला: धायेत भचा मछिं । उच्च शिक्षा छगू शर्ट फिल्म ख:सां थुकी स्क्रिनप्ले धा:सा छगू प्याखँया थें न्ह्यानाच्वंगु दु । संवादं न्ववाका: हे चरित्र स्टाय्ब्लिस यायेत स्वयाच्वंगु दु गुगु शर्टमुभि वा प्याखँया निंतिं सशक्त पक्ष मखु । प्याखनय् अबुम्ह स्टाय्ब्लिस यायेगु निंतिं यक्व हे इ खर्च यानात:गु खने दु । तर प्याखँ अबु काय् निम्ह जा: नइगु दृष्यं निसें जक शुरु या:सां छुं मपाइगु खनेदु । कलाकार लक्ष्मी कुमार छम्ह प्रतिनिधी पात्र जक ख: । बाखँया माग कथं थुकी पुवंक कलाकार स्टाय्ब्लिस यायेगु आवश्यकता खने मदु ।
उच्च शिक्षाया बांला:गु पक्ष थुकीया बाखं ख:सां बाखनय् नं छुं छुं समस्या दु । विदेश वनेत थिक्क जुइ धुंकुम्ह छम्ह काय्या मन उलि याकनं हिली धैगु प्याखनय् जक संभव जुइ । घटनाय् नाटकीय पनया कारणं उच्च शिक्षाया क्लाइमेक्स फ्यासु । बौम्ह लाचार जूगु कारण काय्म्ह विदेश मवनीगु ख:सा थुकीं झन नकारात्मक सन्देश वनी । काय्म्हं नेपालय् च्वनां हे गथे यानां विदेशय् थें उच्च शिक्षा हासिल याइ वा ध्येबा हे कमे याइ धैगु खँ वाखंया माग ख: । प्याखंया नां उच्च शिक्षा जूगु ल्याखँ काय्म्हं थन नेपालय् हे उच्च शिक्षा हासिल यायेत कुत: यायेमा:गु ख: तर काय्म्हेस्यां उच्च शिक्षा हासिल मया:से बौम्हेसित ज्याय् ग्वाहलि यानां प्याखँ क्वचायेकी । थुगु ल्याखँ उच्च शिक्षा हासिल यायेगु सिबें विदेशय् सिबें नेपालय् हे ध्येबा कमेयायेज्यू धैगु सन्देश वनाच्वंगु दु । थुकी बाखँ च्वमि रजिन महर्जनं वा:चायेकेमा:गु नं खने दु । लिसें उच्च शिक्षा हासिल यानां हाकनं नेपालय् हे लिहाँ वया: बांला:गु ज्या नं याये ज्यू धैगु विकल्प नं दनिं । उच्च विदेशय् शिक्षा हासिल यानां नेपालय् लिहांवया: ज्या यानाच्वंपिं नं दु ।
लिखँ ।
उच्च शिक्षाया बाखं थौंया परिवेशय् झीगु हे समाजय् खने दयाच्वंगु बाखँ ख: । प्याखँया भावं झीगु संवेदनशीलतायात गाक्कं ज्वनात:गु दु । मूल खँ ला विदेशय् सिबें नेपालय् नं अवसर दु धैगु खँ ख: । थुगु अवसरयात मचां निसें हे मां अबुं थ: मस्त लिसे परिचित याकातये फुसा उच्च शिक्षा कायेगु निंतिं विदेश हे वने मा: धैगु मदु । तर मूल रूपं थुगु प्याखनं छम्ह निम्न आय् दुम्ह मनूया जीवनय् केन्द्रीत जुया:च्वंगु दु । थुगु वर्गया निंतिं थ्व प्याखँ तसकं हे संवेदनशील जुइगु खँय् छुं शंका मदु ।
