छुं दिं न्ह्य:या खँ ख: फिल्म जर्नालिज्म इन् मोडर्न एरा छ्यं छुना छगू वर्कशप जुल । उके ब्वति कया । उके छम्ह प्रशिक्षार्थी कथं ब्वति कया अले छम्ह प्रशीक्षक कथं नं ब्वति कया । प्रशिक्षक धका छुं स्यनेकने याइम्ह प्रशिक्षक मखसे छगू पाय्नल डिस्कशसनय् छगू विचा: प्वकीम्ह न्ह्यलुवा फिल्म पत्रकार कथं नं ब्वति कया । उगु बहसय् विदुर गिरी, शान्तिप्रिय नं ब्वति का:गु ख:सा डब्बु क्षेत्रीं उगु बहसयात सहजीकरण या:गु ख: ।
उगु वर्कशपय् फिल्म पत्रकारिताख्यलय् थीथी हाथ्यायात कया नं सहलह जुल । उकि मध्ये छगू धइगु कलाकार व पत्रकार दथुया कचवं अले फिल्म निर्माता व पत्रकार दथुया कचवं नं सहलहया विषय जुल । फिल्म व कलाकार अझ धायेगु ख:सा फिल्मक:मि धइगुृ हे फिल्म पत्रकारिताया मू स्रोत जुया च्वनि । उकिं फिल्मक:मियात कया जुइगु पत्रकारिता स्वाभाविक हे ख:सा अजागु पत्रकारिताया झ्वलय् फिल्म वा फिल्मक:मिया बारे बाँबाँलागु खँ जक वयेमा अले उमिसं द्वंकुसां वा स्यंकुसां अजागु मिडियाय् वइगु उमित मयइगु हे मू चर्चाया खँ जुल ।
थीथी मिडियाय् पत्रकारिता याना वया च्वंपिन्सं प्वंकुगु अनुभव कथं फिल्म वा फिल्मक:मिपिनिगु बारे बाँलागु खँ वा पोजिटि खँ पिहाँ वइबले अज्यागु खँ बुखँ सम्बन्धित सरोकोरवालातसें मस्वइगु वा स्वसाँ छुं कथंया प्रतिक्रिया मयाइगुृ ख:सा छुं भतिचा नेगेटिभ खँ वा बाँमलागु खँ पिहाँ वल कि प्रतिक्रिया वइगु जक मखसे ल्वा तकं वइगु दसुया यक्व: चर्चा जुल । थज्यागु चर्चा स्वयेबले फिल्मक:मितसें यायेबले न्ह्यागुया:सां जिउ । अबाय्ति धाइल्हाइ धका मति मतइगु तर वहे खँ मिडियाय् पिहाँ वल कि उमित मयइगु ।
उगु वर्कशपय् जूगु चर्चा धइगु कलिउड धका धयात:गु खस नेपाली फिल्मख्य:या खँ जुल । फिल्मख्य: खस नेपाली फिल्म वा बलिउड धका धयात:गु हिन्दि फिल्मख्य: थ:मजुइमा फिल्मक:मि या पत्रकारिताख्य: प्रतिया धारणा छगू हे जुया च्वंगु खनेदु ।
हिन्दि फिल्मख्य: छगू तसक. पुलांगु जक मखसे तसकं त:धंगु विशाल ख्य: ख: । अन कलाकार पिनिगु बारे पिदना च्वनिगु नेगेटिभ खँया ल्या:चा:या हे मदु । विशेष याना अन गसिप बुखँ धइगु मिडियाया छगू तधंगु अंश जुया च्वनि अले अज्यागु खँया बजा: नं यक्व: दु ।
थौंकन्हेया पत्रकारिता धइगु अनलाइन पत्रकारिता व य्ट्युव मिडियाया युग ख: । उकिं गसिप न्युज अले स्क्याण्डल धइगु पत्रकारिताया छगू तधंगु अंश जुयाव:गु दु । थुकिया. याना विकृति नं पिदना वया च्वंगु दु तर थुकियात नियन्त्रण वा नियमन यायेगु कुत: जूगु खनेमदुनि ।
बलिउड धइगु थासय् पोर्न स्टार सनि लियोनि नं छम्ह स्टारया रूपय् स्विकार याइगु थाय् ख: तर नेपालय् अथे जुइ मखु । छगू पत्रिकाय् पचिनांगा फोटो पिदंगु हुनिं श्रृषा कार्किं आत्महत्या या:गु खँ उलि पुला. मजूनि । अले नांजाम्ह लोकंह्वाम्ह हिरोइन् नम्रता श्रेष्ठया अश्लील भिडियो पिहाँ व:बले वयागु एक्टिंग क्यारियरय् बामलाक्क घा: लात । बलिउडय् गसिप वा नेगेटिभ खं उलि असर परे यागु खनेमदु । अझ उलिजक ला न्यनेदुगु हुइना भुइना कथं अनं फिल्मक:मि तयेसं थ:गु फिल्मया चर्चा याकेत नं नेगेटिभ खँया लिधंसा कायेगु या धइगु दु । आ: नकतिनि हे रिलिज जूगु हिन्दि फिल्म “पठान” बायकट या खँ नं छगू अज्यागु हे पला: ख: धका धाइपिं नं मदुगु मखु। आ: वया “पठान” फिल्मं गज्यागु बजा: काल धइगुला सकसिन. खँगु हे जुल । न्हापा नं “पद्मावति”, “रामलीला”, “दंगल” लगायतया फिल्म पिदने न्ह्य: ब्वलंगु विवाद वा नेगेटिभ खँ प्रायोजित वा पूर्व नियोजित खँ जक ख: हुइना भुइना दु ।
गनतक नेवा: फिल्म ख्य:या खँ दु, थन आ: तक निं गसिप पत्रकारिता वा स्क्याण्डल चर्चां उलि थाय् का:गु मदुनि । खय्तला दुनेदुनें छुं छुं नेगेटिभ खँ न्यनेद:सां अज्यागु खँ छापा वा छुं कथंया मिडिययय् व:गु धा:सा मदुनि । थुकिया छगू कारण धइगु थन आ: तक फिल्म पत्रकारिताख्य:या हे उलि विकास मजूनिसा मेगु धइगु चिधंगु ख्य: जूगुलिं नं अज्यागु खँयात उलि थाय् बिइगु याना च्वंगु मदु ।
विशेष याना फिल्म पत्रकारिताया मू पक्ष धइगु फिल्म समीक्षा ख: । थन फिल्म समीक्षा याइपिं उलि खनेमदुनि । फिल्म वा म्युजिक भिडियो या छुं कथं समीक्षा जुइबले नं सम्बन्धित पक्षं सकारात्मक खँ जक च्वया बिउसा जिउ थें जागु स: तायेदु । गुलिसिनंला समीक्षक जक छु स्य्म्ह धका , वं धा:गु जक हे ठीक जुइमा धइगु्ला धाइपिं तकं दु । न्हापा छगू इलय् “गुरुमापा” नांयागु फिल्म पिहाँव:बले जूगु समीक्षायात उगु फिल्मया निर्देशक शान्तराज शाक्य व उगु फिल्मया समीक्षा या:म्हेसिया दथुइ छापाय् युद्ध जुल । थथे हे “आदर्श नारी” नांयागु नेपाली फिल्मया समीक्षा या:म्ह नांजाम्ह सन्चारक:मि दुर्गानाथ शर्मायात उगु फिल्मया निर्देशक हेम लामां लित्तुहे लिउगु खँ लुमंके बहजु ।
समीक्षाया खँय् बुद्धकालिन नेवा: संकिपा दयेका वया च्वंम्ह फिल्म निर्देशकं थ:गु फिल्मय् छ्य:गु भेषभुषा व थाय्बाय यात बुद्धकालिन थें मच्वन नि धका न्ह्यस: त:बले बाँमलाक तंचाल धइगुृ न खँ दु ।
थन न्ह्याथेंज्यागु फिल्म दयेका नेवा: फिल्मख्य:या न्हापांगु आर्ट फिल्म धका: धाल धा:सा ख: खनि धका सुम्क च्वनाबिइमा:गु अवस्था दु ।
समीक्षाया खँ थथे दु धा:सा “सर्ग: मिला” फिल्मया हिरो राजेश महर्जन व उगुहे फिल्मया हिरोइन् सुमिका बज्राचार्यया य:त्य: जुया लिभिंग टुगेदरय् च्वंबले नं उकिया बारे नं स्क्याण्डल हे न गसिप कथं हे सुनां च्वल । उमिसं थ्व खँ यात फयाफत्तले गोप्य यायेगुृ कुत: यात । थथे गोप्य यायेमा:गु या छता कारण धइगु इमिगु जागिरया कारण नं ख: । एअर होस्टेस् जुया ज्या यायेबले इहिपा जूइमज्यु धइगुुलिं याना नं इमिसं थ्व खँ गोप्य तल । लिपा वना दँबदँ न्ह्य: तिनि इमिसं इहिपा भ्वय् धका भ्वय् हे नकल ।
नेवा: फिल्मख्यलय् गसिप या मज्जा कायस:पिं स्टार पिहाँ मवनि । गसिपं स्टारया चर्चा हे जुइगु ख: धइगु आपासिनं मसिउनि । खयतला कलिउडय् नं उलि स्युपिं मदुनि । छगू पत्रिकाय् “हुइंया” धइगु गसिप कोलम दु । व कोलम या कारणं गुलिखे फिल्मक:मि त अफिसय् हे ल्वा व:गु वा ब्वबिउगु दसु यक्व: दु । नेवा: पत्रकारिता ख्यलय् नं छगू इलयु भाजु म्हुतु छुच्चा वा हिसिनास: धका गसिप च्वयेगु कुत: जुगु ख: तर नेवा: फिल्मख्यलं थ्व कोलमयात बाँलाक मकाबले बन्द हे जुया वन ।
“बहिदार बाबु” फिल्मय् आराध्यालक्ष्मी खडगीयात छगू रोल म्हितेत अफर या:गु इलय् वया मलाना च्वंगु ई जुया:च्वन, उकिं जिं विचा: याये धका लिस: बिल खनि । थ्वहे झ्वलय् “बहिदार बाबु” या निर्देशक बासु शाहीं मेम्ह छम्ह हिरोइन् लिसे नं खँल्हाना स्वल तर वयाला नकतिनि बूम्ह मचा स्वयेमागुलिं उगु अफर स्वीकार मयात । लिपा वना उगु रोलय् आराध्यलक्ष्मीयात काल । थ्व खँ छापाय् ब:बले आराध्या व उम्ह हिरोइन् निम्हेसिनं मछिं तायकल । थुके सनां मछिं चायेका:गु छुं मदु । थ्व छगू स्वाभाविक प्रक्रिया ख? । थुकियात स्वाभाविक रूपं कायेमा ।
फिल्म पत्रकारिताख्यलय् थज्यागु खँयात गम्भीर रूपं मकागु दसुया रूपय् सुरज व्यन्जनकारया यात कायेज्यु । “आसकुति” फिल्मया शुटिंग जुया च्वंगु इलय् सुरज व्यन्जनकारं निम्ह इहिपा यात धका छापे जूबले थुकियात स्वाभाविक रूपं का:गु खनेदसा: छगू छापाय् आराध्य लक्ष्मी व रूपेन्द्र श्रेष्ठ या इहिपा धका छापे जूबले नं इमिसं थ्व नं छगू कथंया न्यूज ख: धका स्वाभाविक रूपं काल । नेवा: फिल्म पत्रकारिताख्यलयु छुं छुं थज्यागु गसिप यात स्वाभाविक रूपं का:गु नं दसु दु धा:सा छुं छुं बुखँ वा छापे जूगु खँया कारणं मछिं तायेकुग दसु नं दु । मू खँ धइगु छम्ह फिल्मक:मि थ: अनुशासित व ज्याय् इमान्दार जुया च्वने फत धा:सा जक पला: सुथां लाइगु खँय् धुक्क जुइमा थें च्वं ।
