नेपालभाषा मनोरंजन ख्यलय् शर्ट मूभिया बिस्कं हे थाय् दु धका: थुइके मा: । थौं सिबें ९ बर्ष न्ह्यो हे नेपालभाषाया शर्ट फिल्म फेस्टीभल जुया: छक्वलं हे १६ / १७गू शर्ट मूभि पिदंगु ख: । तर उगु फेष्टिभलं निरन्तरता मकायेवं हे शर्टमूभिया निरन्तरता मजुल । अनं ४ बर्ष लिपा हाकनं शर्ट फिल्म धेंधेंबल्लाकासा जुल । नेपालभाषा शर्ट मूभिइ हाकनं छगू लहर वल । तर थुगु हे शर्टमूभी कासां निरन्तरता कायेत स्व:गु इलय् थौंया दिनय् नेपालभाषा ख्यलय् शर्टमूभि दयेकीपिं हे म्हो जुया: वन ।
धेंधेंबल्लाया अवधारणाया कारण थौं शर्टमुभी धैगु हे कासाय् ब्वति कायेगु निंतिं हे जक निर्माण जुइगु यानाच्वंगु खनेदत जबकि शर्टमूभी छगू सशक्त सन्देश बिइमा:गु ख:। छम्ह शर्ट मूभीया निर्देशक नं छम्ह कवि वा छम्ह च्वमि कथं थ:गु सन्देश न्ह्यब्वयेत वयेमा:गु ख: । तर झीसं शर्टमूभीयात धेंधेंबल्लाया छगू तत्वया रूपय् जक कायेगु याना । छम्ह फिल्म मेकर धैम्ह तसकं हे गतिशिल व सशक्त जुइ मा: । नेपालभाषाया शर्टमूभी ख्यलय् मुद्दा, द मिथ, हास: मदुगु स:, इत्यादि तसकं हे सशक्त रूपं नेवा: मुद्दा व नेवा: स: ज्वनां न्ह्यां वनाच्वंगु ख: । तर थौंया इलय् धा:सा शर्टमूभि हे निर्माण जुइगु म्हो जुइ धुंकल । समसमायिक विषयलय् सशक्त स: ज्वनां वनेगु नेवा: शर्टमूभि छाय् म्हो जुया: च्वन धैगु खँ सकस्यां वा: चायेकेमा:गु ख: ।
थौंया इलय् नेपालभाषाया म्युजिक भिडियोया निर्माण तीव्रगतिइ न्ह्यानाच्वंगु दु । नेपालभाषाया म्यूजिक भिडियो दयेकेत नं लाखौं तका: खर्च यायेत लिफ: मस्व: तर नं नेपालभाषाया शर्टमूभि दयेके पाखे धा:सा नेपालभाषाया मनोरंजनक:मितय् ध्यान मवं । छम्ह फिल्ममेकर सिबें छम्ह इन्टरटेनरया रूपय् नेवा: संकिपा: ख्य: न्ह्यचिलाच्वंगु वा: चायेक फइ । छगू म्यूजिक भिडियो निर्माण यायेगु ध्येबां निगु स्वंगु हे समसमायिक विषय वस्तुया शर्ट मूभी दयेकेत बजेट गानाच्वंगु दइ तर नं नेपालभाषा ख्यलं धा:सा शर्टभूभि पाखे ध्यान तया च्वंगु खने मदु ।
शर्ट मूभि पाखें थी थी राष्ट्रिय एवं अन्तराष्ट्रिय जगतय् थ:गु नां तयेफइगु अवस्था नं ब्वलनाच्वंगु दइ । तर झी धा:सा थुकथंया छम्ह फिल्म मेकर जुया: न्ह्यचिलेगु सिबें छम्ह इन्टरटेनर जुइगु खँय् न्ह्यइपुका च्वना । थौं नं पखा: थें जा:गु शर्ट मूभिं अन्तराष्टिय अवार्ड त्याका देय्या हे न्हाय् तयेत ता: ला:गु प्याखँ दु । इन्द्रायणीं एनसिआइ एफएफ अन्तिराष्टिय जूरी अवार्ड त्याकेत ता: ला:गु दु । तर झीके अवसर व क्षमता दयां नं झी अन्तराष्ट्रियकरण पाखे पला: न्ह्याके मफुगु धैगु छखें झीगु हे कमजोरी ख: धका: थुइके मा:सा: थुगु ख्य:या न्ह्यलुवा:तय्सं नं न्हूगु पुस्तायात विषयवस्तुया हस्तानतरण याये मफूगु खँ झीसं थुइका: काये मा: ।
