नेपालभाषाया संगीत क्षेत्र लिसें नेपाली भजन क्षेत्रया वरिष्ठ संगीतक:मि जगमोहन वाःमि (कायस्थ) वादेय् थ:गु हे निवासय् मन्त । छुं कथंया स्वास्थ्यय् समस्या मवयेकं हे आकाझाकां हे वय्क: मदुगु ख: । वय्क: हरेक दिं चापागांया भजनय् वनाच्वंगु ख: । तर मदुगु दिं धा:सा वय्क: भजनय् वने मफयेक हे मन्त । वय्क:या अन्यष्टि वय्क:या हे इच्छा कथं पशुपतिया आर्यघाटय् जूगु ख: । अझ वयकलं हे मेपिन्त थाकु मजुइमा धैगु वा: चायेका पशुपतिया विद्युत शव दाहगृहय् अन्त्यष्टि या:गु ख: ।
जगमोहन वा:मियात पेजथ्री पत्रिकाया न्ह्यब्वयाय् पेजथ्र पिपल्स च्वइस अवार्ड ११३३य्, अशोक हलय् लाइफटाइम एचिभमेन्ट अवार्ड ल: ल्हा:गु ख: । वय्क:यात ईलोहं प्रकाशनया संरक्षक धर्मवीर शाक्यं दोसल्ला न्ययेका: सम्मान या:गु ख: ।
वय्कलं हालादिगु म्ये लिसें नेवा: मौलिक लोकम्येय् वयेकलं यानादिगु योगदानया लुमंका: पेजथ्री पिपल्स च्वइस अवार्ड ११३३ ल: ल्हा:गु ख: । वय्क:या म्ये झिंन्यान्हु मानि व्या: यायेगु, छं दुख: स्युगु खनां, वारी मथ्यं पारी मथ्यं कालजयी म्ये ख: ।
जगमोहन वामि ८६ दँय् मदगु ख: । वय्क:या निक्व: जंक्व क्वचाये धुंकल । वय्क: ८३ दँ दु बलय् वा:मि एकल साँझ झ:झ: धायेक: क्वचा:गु ख: । स्थानीय सरकार गोदावरी नगरपालिकाया ग्वाहलिइ गोदावरी साहित्य परिषदया ग्वसालय् थुगु ज्याझ्व: येँया नाचघरय् जूगु ख: ।
विसं २०१८ सालय् रेडियो नेपालय् जीवनदबू ज्याझ्व: वय्कलं न्ह्याकादिइ । वय्कलं रेडियो नेपालय् भ्वाइस टेष्ट नं पास यानादीगु ख: । ज्याझ्व: न्ह्याकेत नं वय्क: छतिं हे उसिं चाया मदिइ । वादेय् च्वंम्ह जगमोहन वामि साइकलया भरय् येँ रेडियो नेपालया ज्याकु तक वइगु । वय्कलं दँ दँ तक हे जीवन दबू ज्याझ्व: न्ह्याका दिल । थुकथं वय्क छम्ह म्ये हालामि वा संगीतकार जक मखुसे छम्ह आर जे कथं नं वय्कया:त लुमंकेमा: । तर रेडियो नेपालं २०२२ सालय् जीवन दबू ज्याझ्व: लिकाल । थुगु खँ वय्क:यात ज्या यायेगु उलि ल:ल:मधाल, छाय्की नेपालभाषा थें मेगु भाषा मजुल ।
वय्क: झिदँ दुबलय् हे बा: नं मदुगु ख: । तर नं वय्क:यात मांम्हं आख: ब्वंका दिल । छेँय् किजापिं स्वम्ह स्वम्ह दुगुलिं छेँया आर्थिक अवस्थां साथ मब्युगु इलय् नच्चागु झिदँ थ्यंबलय् हे ज्या नं चू लाके माल लिसें आख: नं ब्वने माल । आख: ब्वं वनेगु इलय् स्कुल नापं हे छम्ह मुस्मांया पस: दुगु जुयाच्वन । थुम्ह मुस्मां नं हार्मोनियम थाइगु जुया च्वन । व थानाच्वंगु खनां वय्क:या मन साला काल । वय्कलं सरगम अनं हे सयेकादिल । तर वय्क:या मांयात धा:सा नच्चाम्ह जगमोहनं म्ये हाले सयेकेगु य: मता:गु जुयाच्वन । छाय्की म्ये हालेत ताकत मा: । अले आर्थिक स्थीति कमजोर जुगुलिं वय्क:यात ताकतया खाना नयेमखंगु जुयाच्वन । तर नं मा:म्हं मसिइक सुला: सुला: वय्कलं संगीत सयेका हे च्वन ।
वय्कलं निम्ह स्वम्ह गुरुपिंथाय् वनां म्ये हालेगु सयेका दिल अले तिनि वय्क:या सांगीतिक यात्रा न्ह्यात ।
सांगीतिक यात्रा लिपा नं वय्कलं भजनपाखे नुग: यक्व क्वसायेका दिल । भजनयात नं वय्कलं थ:गु नित्य कर्म दयेका दिल । गथे नित्यकर्म कथं झीसं न्हिया न्हिथं ज्या याइ अथेहे वय्कलं संगीतया थ:गु दैनिकी दुथ्याका दी । वय्कलं थ:गु जीवनयात गुलि फु उलि सादा तरिकां न्ह्याका दिइ ।
वय्कलं थ: मांया हे विचा:यात क:धा:सें थ: मस्तय्तनं उच्च शिक्षा हासिल याकादिगु दु । अझ वा देय् उच्च शिक्षाया लागी कलेज निस्वनेगु ज्याय् तकं वय्क न्ह्यचिलादीगु दु ।
जगमोहन वामिया जीवनीं झीसं छुं थुइकेगु ख:सा वय्कलं जीवनय् थ:त: य:गु व न्ह्यागु ज्याखँ, संगीतयात नं त्वतामदी अले थ:म्हं यायेमा:गु कर्म कथं आख: ब्वनां सक्षम जुइगु नं त्वता: मदी । तर थुलि जक नं मखुसे वय्कलं शिक्षायात महत्व थुइका: स्कुल संचालनय् थ:नं न्ह्यचिलादिगु दु ।
अथे हे जीवनयात छगू अनुशासनय् तया: झी न्ह्यचिले मा: धैगु सन्देश नं वय्क:या जीवनी पाखें नालेबह:गु पक्ष ख: । न्हिंया न्हिथं यायेगु नित्यकर्म थें संगीतयात नं उकि दुथ्याका: थ:गु जीवन न्ह्याके ज्यु धैगु हे थौंया कला जगतं नं सेयेका व नाला: यंकेमा:गु खँ ख: ।
जगमोहन वा:मिया जीवनया उत्तरार्धय् दु:खं कयेमाल। वय्कया जीवन अर्धाङ्ग्निि मैंया काय्स्थ वय्क: मदुगु मिति सिबें दच्छिति न्ह्य: साथ त्वता: वन ।
जगमोहन वा:मि थौंया ईलय् छम्ह प्रेरणादायिक व नेवा: हस्ति कथं सकस्यां हे नालेबह:म्ह ब्यक्तित्व ख: । वय्कया: प्ररेणादायिक जीवनी यल नगरपालिकां स्थानीय पाठ्यक्रमय् दुथ्याका न्हूगु पुस्तायात ब्वंके बहःम्ह व्यक्तित्व कथं का:ग् दु । वय्कयात धात्थेंया श्रद्धाञ्जलि थुकथं हे बिइ मा: ।
