येँ महानगरपालिकाया उपमेयर सुनिता डंगोलया, एआई प्रविधि छ्यलाः नक्कली किपा व भिडियो दयेकूपिन्त कारवाही यायेत माग यासें नेपाल प्रहरीया साइबर ब्यूरोयात पौ च्वगु दु । प्रविधिया दुरुपयोग यानाः नक्कली फोटो व भिडियो दयेकाः चरित्र हत्या याःगु धासें वय्कःया सचिवालयं थौं ब्यूरोयात सामाजिक संजालं अज्याःगु सामग्री चिइकेत व कानून कथं कारवाही यायेत माग याःगु दु ।
उपमेयर डंगोलं न्हापा नं थःगु नां तयातःगु अनधिकृत सामाजिक संजाल (फेसबुक पेज) चायेकाः ए आइ प्रविधि छ्यला च्वंगु व अज्याेगु पेज चीकाः अज्याःपिं प्रयोगकर्तातय्त कारवाही यायेत इनाप याये धुंकुगु खः तर थाैं तक्क नं थुकी छुं अज्याेगु कन्टेन्टय् दिइपा मवःगु वय्कःया धापू दु ।
येँ महानगरया उपमेयर सुनिता डंगोलया नामं दयेकूगु अनधिकृत सामाजिक संजालया फेसबुक पेज चीकेगु व अज्याःपिं प्रयोगकर्तातय्त माःगु कारवाही यायेगु सम्बन्धय् २०८१/०२/१३ व २०८१/०३/२५ य् साइबर ब्यूराेयात पत्राचार वय्कलं यायेधुंकुगु दु ।
