नेपालभाषा केन्द्रीय विभागया ग्वसालय् चैन लाकौल सिरपाः लःल्हात । नेसं. ११४४ गुंलागा द्वादशी शुक्रवाः नेपालभाषा केन्द्रीय विभाग, यलध्वाखा यलय्, बागमती प्रदेश सरकारया समाजिक विकास मन्त्री माननीय हरिप्रभा खड्गी श्रेष्ठजुपाखें प्रा. प्रेमशान्ति तुलाधरयात बैकुण्ठ लाकौल सिरपाः व नेपालभाषा एम.ए.य् मिसापिं मध्ये दकलय् आपाः ल्याः हयादीपिं कृष्णप्यारी श्रेष्ठ, पद्मा खयरी गोलि व रजनि श्रेष्ठयात चैन लाकौल सिरपाः लःल्हानादिगु खः ।
विभागिय प्रमुख सह-प्राध्यापक डा. राजनलाल जोशीया सभापतित्वय् जूगु ज्याझ्वलय् मूपाँहा हरिप्रभा खड्गी श्रेष्ठ, प्रा. डा. सुन्दरकृष्ण जाशी, पाटन क्याम्पसया प्रमुख लक्ष्मण सिंह कुँवर, प्रा. प्रेमशान्ति तुलाधर, सिरपाःया दाता श्रीकण्ठलाल लाकौल, उप-प्राध्यापक वज्रमुनि वज्राचार्य, उप-प्राध्यापक जीवनकुमार महर्जनपिंसं सिरपाः व नेपालभाषा केन्द्रीय विभमगयात कयाः थःपिनि नुगः खँ तयादीगु खः ।
