बुद्ध धर्म कथं जीवन छु खः ? झी छाय् बूगु खः ? छाय् सिइगु ? मनू छु खः ? थ्व जीवन चक्र छाय् न्ह्यानाच्वन ? थुपिं फुक्क जीव छु खः ? थ्व ब्रम्हाण्ड छु खः ? स्वर्ग, नर्क आदि छु खः ? पूर्व जन्म छु खः ? कर्म छु खः ? अनित्यता, दुःख व अनात्मा छु खः ? कर्म विपाक जुइ कि जुइ मखु ? लोभ, मोह, तृष्णा आदि छु खः ? मन चेतना छु खः ? साधारण न्ह्यसःया लिसः सरल भाषां बीगु कुतः याना बाैद्ध विद्वान एवं च्वमि डाक्टर अजय क्रान्ति शाक्यया न्हूगु सफू बुद्धका माैलिक दर्शन बिमाेचन जुल ।
प्रधानमन्त्री केपी शर्मा ओलीं थुगु सफू सार्वजनिक यानादीगु खः । सफू पितब्वज्याया नापनापं भिक्षु भिक्षुणीपिन्त दान नं याःगु खः । ज्याझ्वलय् सम्बोधन यासें प्रधानमन्त्री केपी शर्मा ओलीं बुद्ध धर्म अन्धविश्वास मखु वैज्ञानिक तथ्यय् आधारित दर्शन खः धयादिल ।
थुगु सफू थुकिया न्हापांगु ब्वकथं पिदंगु धासें च्वमि शाक्यं याकनं हे निगूगु ब्व नं पिदनीगु जानकारी बियादीगु खः । च्वमि एवं बाैद्ध विद्वान शाक्यं ध्यानयात केन्द्रीत यानाः थुगु व्यापक ग्रन्थ तयार यानादीगु दु ।
सफू पितब्वज्या ज्याझ्वलय् १०० म्ह भिक्षुपिन्त अष्टपरिस्कार दान याःगु खः । अथे हे ५५ म्ह अनगारिका गुरुमांपिन्त वसः लगायत मेमेगु हलंज्वलं नं दान याःगु खः । संघदान दाताया कथं च्वमि शाक्य व पूर्वराजदूत एवं राष्ट्रिय सभाया सदस्य डाक्टर अन्जान शाक्य जुयादिइ ।
