१०७७ दँ पुलांगु हरसिद्धि भवानी जलद्यःया झिंनिदँया मेला चैत्र १७ गते सनिबार खुन्हु समापन जुइत्यंगु दु । थुगु मेला फुल्चोकी माईया पुजा यानाः समापन याये त्यंगु खः । दँय्दसं यःमरि पुन्हि व फागु पून्हि खुन्हु हरिसिद्धि भवानीया प्याखँ क्येना वयाःच्वंगु खःसां १२ वर्षय् छक्व जुइगु फुल्चोकीमाईया मेला थुगुसी विशेष तयारी यानाच्वंगु खः । धुलिखेल, पशुपति, दोलखा व पन्तिइ प्याखं क्येने धुंकाः थुगु प्याखं समापन यायेत्यंगु खः ।
श्री हरसिद्धि १२दँया फुच्व माजु पर्व ग्वसाः खलया कथं थुगु सनिबार हरसिद्धि भवानी या २९म्ह देवगण परम्परागत कां बाजं, धिमे बाजं लिसें फुल्चोकी वनेत्यंगु खः । थुकीया निंतिं सुथसिया ४ ताइलय् हे वनेत्यंगु खः ।
थुगु परम्परा हरसिद्धि भवानी व फुल्चोकीया जंगलय् धार्मिक व सांस्कृतिक स्वापू लिसें महत्व दु धकाः क्यनेगु निंतिं नं खनेदु । हरेक १२ वर्षय् जुइगु गोदावरीयन सिंहअष्ट मेलाया शुभारम्भ नं हरसिद्धिया देवगण पाखें हे जुइगु खःसा देवगणपिं नं गोदावरी कुण्डय् खापा चायेका म्वःल्हुइ धुंकाः जक हे मेला शुरुजुइगु खः । अले देवगणपिंसं लुखा तिइ धुंकाः मेला नं समापन जुइगु खः । हरिसिद्धया स्थानीयपिं मन्त धाःसा नं दाहसंस्कारया निंतिं फुल्चोकी जंगलं हे सिँ हइगु परम्परा दु । हरेक वर्ष असार १५ गते तक्क नं वा मवल धाःसो फुल्चोकी माई (गुराहिटीइ) वनां द्यःपुज्यायत धाःसा वाः वइगु जनविश्वास दु ।
फुल्चोकीमाईया दर्शन व पुजा यानां गोदावरीया हरसिद्धिइ ख्यलय् हरसिद्धि भवानीया प्रतीकया स्वरुप कलश विराजमान यानां देवगणपिन्त प्रसाद ग्रहण याकेगु परम्परा नं दु ।
