गुरुपुन्हीया छगू विशेष न्हिं । स्येनामि व ब्वनामि दथुया विशेष दिं । थुगु दिनय् स्थानीय विषयया स्येनामिपिनिगु उपस्थति, नेपालभाषा ख्यःया निंतिं गर्व लिसें सम्मानया मिखां स्वये आवश्यक जू । विशेषत ब्वनामिपिनिगु उज्जवल भविष्ययात चकंकेगु निंतिं थःत समर्पित याःपिं न्ह्यथनेबहःगु स्थानीय विषया स्यनामिपिंत थौं हरेक ख्यलं उचित सम्मान व कृतज्ञता देछाय्माःगु दिं कथं नं कायेमाः। स्थानीय पाठ्यक्रम स्यनेगु निंतिं स्यनामिपिंसं न्ह्यब्वयाच्वंगु अटूट प्रतिवद्धतां शैक्षिक प्रदर्शन अप्वयेकूगु जक मखु, ब्वनामिपिनिगु आत्मविश्वास, सृजनात्मकता लिसें स्यनामि व ब्वनामिया स्वापूया समृद्ध लकस नं ब्वलंकूगु दु ।
स्थानीय पाठ्यक्रमया स्यनामिपिनिगु दकलय् महत्वपूर्ण उपलब्धि ब्वनामिपिनिगु रचनात्मकता न्ह्यब्वय्गु निंतिं छगू स्येल्लागु दबू जुया ब्यूगु दु । शिक्षण विधिया माध्यमं स्थानीय पाठ्यक्रमयात छगू बल्लाःगु ढाँचाय् रुपान्तरण याय्वं ब्वनामिपिं लिसेंं स्कूल तकं नं थुगु हे पाठ्यक्रमया जवंखवं हे गतिशील जुयाः न्ह्यानाच्वंगु वाःचायेक फइ । हरेक नखःचखःबलय् सांस्कृतिक गतिविधिं यानां स्थानीय एवं नीजि ब्वनेकुथि नं सामाजिक रुपान्तरण जुयाच्वंगु वाःचाइ । गुकिया लिच्वः ब्वनामिपिनिगु परीक्षाय् नं उल्लेखनीय वृद्धि जूगु दु । शिक्षकपिंसं जटिल अवधारणायात थुइकाः आकर्षक ढंगं न्ह्यब्वयेगु क्षमतायात क्यनाच्वंगु दु ।
आत्मविश्वास हे सफलताया आधारशिला खः । स्थानीय विषयया शिक्षकतय्सं थः विद्यार्थीतय्के थ्व महत्वपूर्ण गुण ब्वलंकेगु निंतिं भूमिका म्हिताच्वंगु खंके फइ। व्यक्तिगत लगनशीलता व रचनात्मक प्रतिक्रियाया माध्यमं शिक्षकतय्सं विद्यार्थीपिनिगु ग्याःचिकु पह व हाथ्या पार यायेत ग्वाहालि याःगु खंके फइ ।
स्याथीन बिषयया स्यनामिपिंसं ब्वनामिपिं लिसे क्वातुगु, सकारात्मक स्वापू दयेकेगु, विश्वास व थःथवय् सम्मानया वातावरण ब्वलंकेगु ज्याय् उत्कृष्टता क्यनाच्वंगु दु । थ्व स्वापू ब्वनेक्वथा स्वयां नं पिने वनाः समुदाय व स्वापूया भावना ब्वलंकी । ब्वनामितसें थःत मूल्यवान व थुइकातःगु महसुस याइ, गुकिं इमित थःगु सयेकेगु ज्याय् सक्रिय रुपं संलग्न जुइत प्रेरित याइ । खुल्ला खँल्हाबल्हा व शिक्षकतय्सं क्यंगु धाथेंया हेरचाहं ब्वनामिपिनिगु जीवनय् स्थायी लिच्वः लाकूगु दु ।
थौंया निरन्तर विकास जुयाच्वंगु संसारय् सिर्जनशीलता छगू अतिकं महत्वपूर्ण सीप खः । ब्वनामिपिंके थ्व प्रतिभायात सफलतापूर्वक ब्वलंकेगु ज्या न्ह्यानाच्वंगु दु । कल्पनाशील बिचाःयात प्रोत्साहन बियाः रचनात्मक अभिव्यक्तिया निंतिं दबू बियाः इमिसं प्रत्येक विद्यार्थीया सम्भावना चायेका च्वंगु दु । कला परियोजना, विज्ञानया प्रयोग, साहित्यिक कृति, अभिनव समस्या समाधानया ज्याखँत इमिगु मार्गदर्शनय् सृजनात्मकता गुकथं लिच्वः वयाच्वन धैगु छुं छुं दसु जक खः । ब्वनामितय्सं थःगु प्रतिभा क्यनेगु आत्मविश्वास प्राप्त याःगु दु, गुकिया लिच्वः कथं छगू जीवन्त व गतिशील सयेकेगु वातावरण दयेकूगु दु ।
गुरुपुन्ही हनेगु झ्वलय् ब्वनामिपिनिगु जीवनय् हुइमफइगु छाप तयादीपिं स्यनापिन्त दुनुगलंनिसें सुभाय् देछाय्त पलख ई काये । स्थानीय पाठ्यक्रमप्रति इमिगु समर्पणं शैक्षिक प्रदर्शनय् सुधार जक मखु, आत्मविश्वास नं अप्वयेकूगु दु, क्वातूगु स्वापू दयेकूगु दु, अले सृजनात्मकता नं ब्वलंकूगु दु । अटल जोश व प्रतिबद्धतां लिपाया पुस्तायात प्रेरणा व मार्गदर्शन यानाः उकिया स्वयां नं च्वय् वनाः न्ह्याःवंगु दु ।
