थः अजिया हःपालं हे कला क्षेत्रय् पलाः न्ह्याकुम्ह आराध्या लक्ष्मी खड्गीया स्वपू म्यूजिक भिडियाेया प्रिमियर विश्वज्याेति सिनेप्लेक्सय् जुल । आराध्यायात हःपा बिइगु निंतिं अजि बिजुलिमाया खड्गी व्हिलचियरय् च्वनाः हलय् थ्यंबलय् पलख मन चिइ थाकुल आराध्याया परिवारयात हे । पलखया निंतिं म्यूजिक भिडियाेया प्रिमियरया लकस सिबें छगू पारिवारीक ज्याझ्वः थें हे च्वन तर स्वपू स्वपू म्ये छक्वलं हे प्रिमियर जूगु इलय् व पाहाँपिं लोक कवि राजभाई जकःमि, वरिष्ठ कलाकार चैत्यदेवी, वरिष्ठ म्येहालामि जुजुकाजि रन्जित, वरिष्ठ कलाकार नारायणदेवी प्रधान, राजमति संकिपाया नकिं हिसिला महर्जन, कला व साहित्य अन्वेषक प्रकाश सायमि व नेपालभाषाया वरिष्ठ सिनेपत्रकार विजयरत्न असंबरे पिनिगु उपस्थीतिं छगू न्ह्यइपुगु प्रिमियरया लकस ब्वलन ।
मतिना इन्टरटेंटमेंटया ग्वसालय् जूगु प्रीमियर ज्याझ्वः विजयमान सिंया सभानायसुइ जूगु खःसा सुर्जलक्ष्मी खडगीं लसकुस यानादीगु खः । प्रीमियर जूगु निपू म्येय् छंगु मतिना , पानबति मैंचा व लिक्क लिक्क पिदंगु खः । छंगु मतिना म्ये राजकुमार मानन्धर व निशा देशारया सलय् दु । थुगु म्येया च्वसा व संगीत राजकुमार मानन्धरं बियातःगु खःसा संगीत संयाेजन जुगल डंगाेलं यानतःगु खः । थुकी आराध्या व विजय मान सिंया जाेडी दु । म्येया परिकल्पना, काेरियाेग्राफी व निर्देशन आराध्या लक्ष्मी खड्गीं यानातःगु दु ।
पानबति मैंचा म्येय् नं आराध्या लक्ष्मी व विजयमान सिंया हे जाेडी दु। थुगु म्ये आनन्द बज्राचार्यं च्वयातःगु खःसा संगीत अनिल तुलाधरं बियातःगु खः । म्येय् निशादेशारया सः दु । लिक्क लिक्क ” म्युजिक भिडियो या निर्देशन राजेशमान सिं भाजुं यानादीगु खः । थुगु म्येय् डबल शाक्य व रत्नशोभा महर्जनं हालातःगु खः ।
