जेनिथ इङ्गलिस मोडल स्कूलं मंसिर २९,२०८१ निसें न्यू जेनिथ दिवस हनेत्यंगु दु । स्कुलया ब्वनामिपिनिपाखें हे व्यवस्थापन याना हनेत्यंगु थुगु दिवस पाखें ब्वनामिपिंके ज्याझ्वः व्यवस्थापनया गुण विकास यानाः यंकेगु ताःतुनागु खँ स्कुलया संस्थापकलिसें प्रधानाध्यापक राजु महर्जनं छगू प्रेस मीट् यानाः जानकारी बियादील ।
वंगु दँय् न्यू जेनिथ स्कुलया रजत दँ हंगु खः । अले थुगु दँ निसें हे दिवस कथं हनेगु खँ वय्कलं कनादिल । थुगु दिन ब्वनेकुथिइ सुथसिया ११ निसें १ बजे तक ब्वनेकुथिया ब्वनामिपिं पाखें थीथी सांस्कृतिक ज्याझ्वः न्ह्यब्वइगु, ब्वनामिपिनिपाखें अर्केष्ट्रा प्रस्तुती लिसें नांजाःम्ह म्ये हालामि समीर श्रेष्ठ व सुरज एण्ड द अल्लारेज ब्याण्डया नं विशेष प्रस्तुति दइगु खँ कनादिल । दिवसया लसताय् थीथी नेवाः नसात्वँसा व देछा ज्वलंया स्टलत, फेस पेन्टिङ्ग, थीथी सिरपाःलिसेंया कासा, विज्ञान प्रदर्शनी, कला व हस्तलेखन प्रदर्शनी दइगु खँ कनादीगु दु । सुथसिया ११ बजेनिसें न्ह्याइगु दिवसया लसताय् थीथी न्ह्यइपुगु ज्याझ्वःतलिसें थीथी कासा व ब्वनामिपिनि प्रतिभा प्रदर्शन याइगु जूगु दु ।
दिवसया लसताय् जुइगु ज्याझ्वलय् सुरक्षा व्यवस्थाया निंतिं नेपाल प्रहरी व ट्राफिक व्यवस्थापनया निंतिं ट्राफिक प्रहरीलिसे समन्वय जुयाच्वंगु व अझ ज्याझ्वः ब्यवस्थीत यायेगु नितिं ज्याझ्वलय् झाइपिंन्त फयांफछि सवारी साधन मछ्यलेत वयेकलं इनाप यानादीगु दु ।
स्कुलं दिवसया जानकारी मूलक पर्चा नं जारी याःगु दु । गुगु पर्चा ज्वनाःवःपिन्त निःशुल्क प्रवेश जुइसा मेपिनिगु निंतिं १० तका प्रवेश शुल्क क्वःछिनातःगु दु ।
