त्रिभुवन विश्वविद्यालय नेपालभाषा केन्द्रीय विभागया ई-लाइब्रेरीया उलेज्या येँ महानगरपालिकाया उपमेयर सुनिता डंगोलं यानादिल । नेपालभाषाया कला, साहित्य, संस्कृतिलिसें नेपाललिसे स्वानाच्वंगु हरेक क्षेत्रया अध्ययन विश्वया गननं थासय् च्वनाः यायेफइगु खँ न्ह्यथनादिल । ‘थौंया २१औं शताब्दीया विकसित प्रविधिं झी संसारया हरेक विषयवस्तु संसारया छुं नं थासय् च्वनां स्वये फुगुलिं झीगु बारे च्वयातःगु सामग्री, अध्ययन, अनुसन्धानयात नं विश्वव्यापीकरण यायेमाः धकाः उपप्रमुख सुनिता डंगोलं धयादिल । येँ महानगरपालिकाया आर्थिक ग्वहालिइ विभागं ई–लाइब्रेरी संचालनय् हःगु खः । येँ महानगरपालिकां ई लाइब्रेरी दयेकेत ५० लाख तका उपलब्ध याःगु व थुकीया अपग्रेड अले अपडेट यानां यंकेगु निंतिं थप बजेट उपलब्ध यायेगु प्रतिवद्धता नं वय्कलं प्वंकादीगु खः ।
त्रिभुवन विश्वविद्यालय नेपालभाषा केन्द्रीय विभागया प्रमुख सहप्राध्यापक डा. राजनलाल जोशीं आः थ्यंमथ्यं ४००० सफूत ई–लाइब्ररिइ अपलोड जुइधुंकुगु व थुकी नेपालभाषा, नेवाः व नेपाःया हे भाषा, कला, साहित्य, संस्कृति सम्वन्धि च्वयातःगु सफू, पुलांगु थ्याःसफू व ऐतिहासिक लिखित सामग्री अपलोड यायेगु जानकारी बियादील ।
ज्याझ्वलय् उपप्राध्यापक डा. वज्रमुनि वज्राचार्य, पाटन संयुक्त क्याम्पसया प्रमुख डा. लक्ष्मण वीर सिंह कुवँर, रत्नराज्यलक्ष्मी क्याम्पसया प्रमुख प्रा.डा. जीवनधर ज्ञवाली, नेवाः देय् दबूया अध्यक्ष पवित्र बज्राचार्य, नेपालभाषा केन्द्रीय विभागया विद्यार्थी संगठन लुमन्ति दबूया अध्यक्ष रामेश्वर श्रेष्ठपिसं थःथःगु नुगः खँ तयादीगु खः ।
ज्याझ्वलय् पुष्पदेवी छात्रवृत्ति, खैगुलि छात्रवृत्ति, योगवीर सिंह विद्वत्वृत्ति छात्रवृत्ति लःल्हाःगु खः । अथे हे नेपालभाषा स्नातकोत्तर विषयस उत्कृष्ट ब्वनामिपिंत, सत्यहिरा पुरस्कार, पियूष पदक, श्रेष्ठ पदक सिरपा नं लःल्हाःगु खः ।
