नेवाः म्येया सर्जक एवं संगीतकार लिसें वरिष्ठ गायक योगेश वैद्य विहीवाः चान्हसिया १२ः३० बजे मन्त । विहीवाः न्हिनय् उसाँय् मभिनेवं चान्हे तच्वःयाः अस्पताल यंकूगु खः तर अस्पतालय् हे वासः याकुयाकुं मदुगु खँ छेँजःपिं पाखें जानकारी वःगु खः ।वयकःयात चान्हय् १२ बजे अस्पताल यंकाः आईसीयुलय् भर्ना याःगु खःसा १२ः३० बजे वासः याकुयाकुं मदुगु खः।
गायक वैद्य ७७ दँ दुम्ह खः । वयकःया म्ह्याय् निम्ह व काय छम्ह दी । वंगु माघ १ गते घ्यःचाकु संल्हू कुन्हु तिनि वयकःयात गंकी धुस्वां–बसुन्धरा प्रतिष्ठानपाखें ‘धुस्वां सायमि सिर्जना सिरपाः’ लःल्हाःगु खः ।
शुक्रवाः पशुपतिइ वयकःया अन्तिम संस्कार यायेगु तयारी दुगु खँ छेँजःपिंसं कनादीगु दु ।
