न्ह्यः खँ
नेपालभाषा ख्यलय् मांया विषयलय् आपलं हे म्ये श्रृजना जुयाच्वंगु दु । थ्व हे झ्वलय् मां लुमना वइ बोलया म्ये पिदंगु दु । पेजथ्री पिपल्स च्वइस अवार्डय् उत्कृष्ट मिजं उदीयमान सः त्याकेत ताःलाम्ह म्ये हालामि बिजेन्द्र चवाल खः । थुगु म्ये ज्याझ्वःया भव्य प्रिमियर जूगु खःसा नेपालभाषा ख्यःया आपलं हे उर्जाशील जनशक्ति मुनां थुगु म्ये तयार जूगु खः । म्ये च्वमि अनिश शाक्य खःसा म्ये लय्चिनादीम्ह वरिष्ठ संगीतकार अमरराज शर्मा, संगीत संयोजक जुगल डंगोल लिसें निर्देशनय् नं उर्जावान निर्देशन योवन शाक्य दु।
संगीत
अनिश शाक्य नेपालभाषा साहित्य ख्यःया निंतिं न्हूगु नां मखु । अकसर काव्य विधाय् वय्कया च्वसू न्ह्यानाच्वं । मांयात गुलि लुमंकाच्वना वा मांया अभाव गथे जुइ धैगु भाव थुगु म्येय् अनिशं प्वंकातःगु दु । मनय् दुःखं जालकी जित मां लुमना वइ थें सामान्य भावया खँ तर तसकं हे दुग्यंगु भाव म्यें बियातःगु दु । संगीतकार अमरराज शर्माया सुमधुर संगीतं म्येयात झन हे जीवन्त यानाब्यूगु दु। जुगल डंगोलंया संगीत संयोजनं म्ये झन हे कर्णप्रिय दुसा विजेन्द्र चवालया सलय् छगू कथंया स्याःचाः लुयाःच्वंगु महसुश नं जुया वइ । समग्रय् धायेगु खःसा थुगु म्ये नेपालभाषाया निंतिं छगू अतिकं हे बांलाःगु म्ये कथं नाले माः ।
भिजुअल
मां लुमना वइ या भिजुअल मिखाया निंतिं छगू याउँसे च्वंगु लू कथं नालेमाः । थुकी छुं कथंया तडकभडक मदु । छगू परिवारया दृष्टिकोणयात नुगलय् छाप लाइगु कथंया भिजुअल तयार जूगु खनिं । स्वतले हे म्येय् गनं नं मछिंगु थें जाःगु लु खने मदु । थुकीया निंतिं छायाँकनया पुचः लिसें लाइट्सया संयोजन अतिकं यइपुक्क यानातःगु दु । भिजुअलया निंतिं दिनेश महर्जनया कुतः मिखायात स्वये हे यइपुगु जु । निर्देशक योवन शाक्यं नं कलाकारपिंत थःगु निर्देशय् हे तयातःगु खने दु । मस्तय्गु मनोविज्ञानयात अतिकं हे सरल ढंग न्ह्यब्वयातःगु दु ।
मचा कलाकार कथं आरभ महर्जन, ओस्मी रंजीत व सेद्रिना महर्जनपिं अतिकं हे प्राकृतिक रूपं न्ह्यब्वयातःगु दु । अले कलकार कथं सुजाना मानन्धर व रूपा महर्जनया नं अभिनय बांला जू । समग्रय् थुगु म्ये छायाँकन व कलाकारया अभिनय अले संगीत पक्ष नालेबलय् छगू तसकं हे स्वयेबहगू म्ये कथं नाले छिं ।
विश्लेषण
मां लुमना वइ म्ये छम्ह मचां थः मांयात गुलि लुमंकाः च्वनी धैगु मनोबिज्ञानयात न्ह्यब्वयेत स्वयाच्वंगु दु । तर थुगु म्ये धाःसा मचा म्ये मखु । निर्देशकं थुगु म्येयात मचाम्ह पात्र दुथ्याकाः वहे मचायात तःधि यानां निगू टाइमलाइन न्ह्यब्वयातःगु दु । म्येया शुरुइ हे छम्ह मचां मांयात लुमंकाःच्वंगु क्यनातःगु दु । तर म्यें धासा छम्ह वयस्क मनूया सः तायेदयाःच्वंगु दु । थुकिंयानां म्ये न्यनिबलय् भचा अलमल खने दु । म्येया शब्द तसकं हे गहिराइलय् वनाच्वंगु दु तर छम्ह मचायात न्ह्योने न्ह्यब्वयातःगु भाव स्वयेगु इलय् कलाकार व म्ये दथुइ समन्वय् मगाः थें तायेफु । थुकीया निंतिं मिजंम्ह कलाकारयात लिनियर सिबें नन् लिनियर रूपं न्ह्यब्वःगु जुसा अझनं प्रभावकारी याना यंकेफइगु खइ ।
छम्ह मचां थःत समान रूपं व्यवहार जुयाःमच्वंगु वाः चायेकीबलय् गज्योगु आभाष जुइ धैगु भाव थुगु म्ये क्यनातःगु दु सा यदि मां दुगु जुसा थुज्योगु याकसूया आभाष मजूइगु खइ धैगु भाव थुकी क्यनातःगु दु । मांया अभावया कारणं मचा ब्वलनिगु इलय् यक्वं हे खँ असर याइ । वैगु व्यक्तित्व विकासय् नं असर जुयाच्वंगु थुगु म्येय् खने दु । उम्ह हे मचा तःधि जुइ धुंकाः नं थः मचा दुसां वैके नैराश्यपन ब्वलनाच्वंगु खंके फइ ।
म्यूजिक भिडियोलय् दिवंगतम्ह मां कथं दिवंगत् सरोजा शाहीया हे किपाः ब्वयातःगु दु । व्यक्तिगत म्हसीकाया कथं वय्क नेपालभाषाख्यःया नांजाम्ह निर्देशक राजन शाहीया दिवंगत् मां खः । थथे मदयेधुंकुम्हेसित नं म्यूजिक भिडियोस छम्ह चरित्र कथं न्ह्यब्वयातःगु दु । तर म्येया छगू ब्वय् फ्लाय्स ब्याक कथं मचां थं मांलिसे नापं न्यासिवनाच्वंगु लु दु । तर उम्ह कलाकारया ख्वाः धाःसा न्ह्यब्वया तःगु मदु । संवेदनशीलताया आधारय् थुकथं मदयेधुंकुम्ह मनूयात नं पात्रया श्रपय् थनेबलय् संवेदनशील बिषय जुयाच्वनिं तर थुकीं कलाकारीता वा प्याखँया बिषययात भचा अस्वभाविक थें नं तायेकाच्वनिं । आपलं के कलाकारपिं प्याखनय् दिवंगत जूगु भुमिका म्हिते धुंकुगु जूगुलिं थज्योगु भुमिकाय् कलकारपिंत हे दुथ्याके दःसा झी संवदेनशील जुइगु सिबें कलाकारीता पाखे धेचुइमाःगु खनेदु ।
आलोचना
मां लुमना वइया ओपनिंग शटय् छम्ह मिसाम्ह योगा यानाच्वंगु क्यनी तर व सु मिसा मिसा धैगु भिडियोलय् स्पस्ट मजू । उमेरया ल्याखं निनि वा तता थें खने दु। अझ डे«स अप नं छम्ह मां थें खने मदु ।
भिडियोया टाइम लाइन कथं स्वयेगु खःसा उम्ह हे मचा तःधि जुयाः वयाः थः हे मचा नं दये धुंकुगु दु । थ्व ल्याखँ ओपनिंग शट थौं सिबें २५ ३० र्बष न्ह्यः या जुइमाःगु खः तर निर्देशकं अथे न्ह्यब्वयातःगु मदु । थुकींयानां म्येया भावय् दुहांवनेगु इलय् अडियो व भिडियो स्वानामच्वंगु हे आभाष जुइ ।
भिडियोलय् मां लुमना वइ धकाः धयाच्वंगु दुसां मचाया मां ला मदये धुंकुगु हे जुल तर अनं बाः नं मदु । मां लुमनां वइसा बाः जक छाय् लुमना मवःगु धैगु नं न्ह्यसः थने छिं । आखिर छम्ह मचा ब्वलंकेत मां जक मखु बाः नं माःगु हे जुल । बाःया भुमिकायात थथे गौण यानां क्यने नं मछिं।
म्येया मू पात्र मचाम्ह तःधि जुइ धुंकाः नं वयाः म्ह्याय् व बौम्ह जक हे खने दु । थन नं मू पात्राय कलाम्ह खने मदु । परिवार गुब्लें हे पुवनाच्वंगु खने मदु। थुकथंया परिवेश छुं फिल्म वा टिवि सिरियलया बिचय्या ब्व थें जक खने दयाःच्वंगु दु । तर छगू म्यूजिक भिडियो यदि बाखँ न्ह्यब्वयेगु खःसा छगू पूवंगु शर्ट फिल्म थें शुरुवात व अन्त नं क्यने आवश्यक जु ।
लिखँ
नेपालभाषाया म्यूजिक भिडियो ख्यलय् थुलि टेक्निकल रूपं सशक्त म्यूजिक भिडियोया निर्माण म्हो हे जक जुइगु याः । योवन शाक्यं अकसर थःगु म्यूजिक भिडियो वा प्याखनय् टेक्निकल रूपं सम्झौता यायेगु मयाः । थुकीया हे दसू मां लुमना वइ म्युजिक भिडियो खः । म्येय् स्वतले कर्णप्रिय लिसें मिखायात याउँसे च्वं । तर विश्लेषणात्मक रूपं स्वयेगु इलय् आपलं खँय् यक्वसिया थथःगु हे बिचार ब्वलनिगु नं स्वभाविक रूपं जक कायेमाः । मांया बिषयलय् म्ये धैगु छगू कथं बिषयगत म्ये खः । थुगु म्ये नं मां दिवंगत जुइधुंकुपिनिगु नितिं बिशेष हे जुइ । मां धैगु शब्द हे थज्योगु खः । म्ये निर्माणय् याःगु कुतः सकसिगु हे च्वछायेबह जू ।
