ख्वप देशय् दयेकुगु छगू नेवाः फिल्म “गालय् वन” या चर्चा थौंकन्हे बुलुहुँ बुलुहुँ थहाँ वया च्वंगु दु । सिलु, राजमति, पःखाः व भिन्तुना थें हे मौलिक नेवाः सवाः दूगु फिल्म धका धायेबहगु फिल्म “गालय् वन” फिल्मया हिरोइन खः शोभा महर्जन । खय्तला बौद्ध कालिन नेवाः फिल्मत चाण्डालिका, पटाचारा निसें घोषक, कर्म फिल्म नं नेवाः सवाः वःगु फिल्म हे खःसा “स्वयेनगु” यात नं नेवाः सवाः दूगु फिल्म धकाः धायेमा । तर थ्व “गालय् वन” छगू विस्कं हे सवाः दूगु फिल्म खः ।
थीथी फिल्मय् थीथी कथंया बाखं न्ह्यब्वया तइ । ऐतिहासिक, धार्मिक व सामाजिक वा मतिनांजाःगु वा एक्शन सवाःया फिल्मत पिलू वया च्वनिसा “गालय् वन” फिल्मय् छम्ह मचा प्वाथय् दुम्ह मिसाया व्यथायात दुग्यंक्क क्यनातःगु दु । उम्ह मिसाया मेन रोलय् म्हिता च्वंम्ह कलाकार शोभा महर्जन खः । शोभा महर्जनं थ्व “गालय् वन”सिबें न्हापा “बसन्त ऋतु” म्हिते धुंकल । वयागु छगू मेगू न्हूगु फिल्म “बहिदार बाबु” पिहाँ वयेधुंकल सा आः यकनं हे “तिबः द सपोर्ट” नांयागु फिल्म वयेत्यंगु दु । शोभा महर्जनं आपालं फेशन शो या निंतिं फेशन डिजायनया ज्या याये धुंकम्ह प्रतिभा खः । शोभां बेस्ट फेशन डिजायनरया रूपय् गुलिखे सिरपा नं त्याके धुंकल । वय्कःया सिरिपाया धलखय् बेस्ट मोडलया नं सिरपाः दुथ्याना च्वंगु दु ।
शोभा महर्जन छम्ह कलाकार खःसा छम्ह मोडल नं खः । वयागु आपालं म्युजिक भिडियो पिदने धुंकल । सरोज खनाल, धिरेन शाक्य थेंज्यापिं नेपाःया स्टारत लिसे म्युजिक भिडियो लगायत विज्ञापन फिल्म म्हिते धुंकुम्ह शोभा महर्जन छम्ह नांजाम्ह फेशन डिजायनर खः । येँदय्या सुन्दर साँस्कृतिक नगर किपुलिइ च्वंम्ह शोभा महर्जनया “गिफ्ट” (गर्जियस ईस्टिच्यूट अफ फेशन टेक्नोलजि) नांयागु फेशन हाउस यलया कुमारीपाटिइ दु । फेशन डिजायनया तालिम कया थुखेपाखे पलाः न्ह्याकाच्वंम्ह शोभां थोैंकन्हे मेमेपिन्त फेशन डिजायनया प्रशिक्षण न बिया वया च्वंगु दु ।
उलिजक मखसे शोभा महर्जनया ल्हा चिनाखँय् नं न्ह्याः । शोभां शर्ट फिल्म नं च्वंगु दु । “घात” नांयागु शर्ट फिल्म शोभां हे च्वःगु खः । नेवाः युट्युबय् पिदंगु “जिगु बाखं”या निंतिं नं शोभां चिनाखँ च्वःगु दु । “जिगु बाखं” या छुं छुं इपिसोडय् वं थःम्हेसिनं हे अभिनय नं याःगु दु । शर्ट फिल्म “घात” शोभां हे च्वःगु खःसा वयागु शर्ट फिल्मय् “स्वन्हू” नांयागु शट फिल्म साइलेन्ट शर्ट मुभिया रूपय् दयेकुगुलिं उगु फिल्मया चर्चा आपालं जूगु खः । “स्वन्हू” शर्ट फिल्मय् अभिनय यानाबले भचा बिस्कं हे अनुभव जूगु खँ न्ह्यथसें शोभां थुके छुं नं खँ मल्हासे भावंजक अभिनय याना क्यनेमाःगुलिं छगू बिस्कं अनुभव जूगु खः धाल । शर्ट फिल्म व म्युजिक भिडियो आपालं म्हिते धुंकुम्ह शोभा महर्जनया विचारय्, “शर्ट फिल्म व म्युजिक भिडियो धइगु अथेअथे थें च्वं । छायधाःसां निगुलिं चिहाक जुइ । निगुलिं बाखं दया च्वनि ।”
स्कुलय् आखः ब्वना च्वंगु ईलं निसें हे ब्याँचुली साँस्कृतिक पुचः लिसे स्वापु दुम्ह शोभा महर्जन मचाबले निसें हे कलाकारिता ख्यलय् पलाः न्ह्याका वया च्वंम्ह खः । गुंपुन्हि, ञया पुन्हि वा कीपुलिइ जुइगु जात्रापात्राय् थासंथासय् वना साँस्कृतिक ज्याझ्वः क्यंवनिगु पुचलय् दुथ्याना हुलाप्याखं, दबू प्याखनय् थःगु कला न्ह्यब्वया वया च्वंम्ह खः शोभा महर्जन । दबू प्याखं धका चर्चा यायेबले निदँति न्ह्यः कोरोनाया लकडाउन कालय् नेपालभाषा एकेडेमिं ग्वसाः ग्वःगु छधा प्याखं ब्वज्याय् “लिथु” नांयागु छधा प्याखँ नं शोभां म्हितल ।
थथे कलाकारिताय् नुगः क्वसायेका वया च्वंम्ह शोभा महर्जनया कला प्रतिभा अनयाम्ह हे न्ह्यलुवा प्याखँकःमि पवन जोशीं स्वया वया च्वंगु हे खतसा वय्कलं “बसन्त ऋतु” निर्माणया इलय् शोभा महर्जनयात उगु फिल्मया छम्ह हिरोइन कथं म्हितेत इनाप याःगु जुया च्वन । उबलेसिया खँ लुमंका “पवन दाइ नं जित न्हापानिसें हे म्हसिउ । दाइ नं जित फिल्मय् हिरोइन जुइगु अफर याःबले जिंला म्हा म्हा धया । उकिसनं नच्चाम्ह ल्यासेनिसें ज्याथिम्ह बुह्रि जुयाः म्हितेमालिगुलिं जिं आँट मयाना । जित एक्टिंग याये मवः धकाः पवनदाइयात धया । उबले वय्कलं थ्व रोल हे छन्त स्वया च्वयागु उकिं छ म्हितेमाः धकाः धयादिल । छन्त थथे याना बाँलाक्क याकेगु धइगु सकतां जिम्मा जिगु हे जुल धका भलसा बिया दिल । वयकलं उलि धयादिसेंलि जिं व रोल म्हितेत तयार जुयागु खः ।” धका खँ कंसे थः गुकथं फिल्मय् थ्यन धइगु स्पष्ट यात ।
थुकथं शोभा महर्जन “बसन्त ऋतु” या हिरोइन जुया नेवाः फिल्म ख्यलय् दुहाँ वःम्ह खःसा लिपा वना वकलं मेमेगु फिल्म नं म्हितल । म्युजिक भिडियो ख्यःयाला वय्कः छम्ह लोकंंह्वाम्ह मोडल खः । म्युजिक भिडियो म्हितेगु झ्वलय् भावपूर्ण अभिनय नं याना धकाः धयादिम्ह शोभा महर्जनं यानादीगु थज्यागु हे भावपूर्ण अभिनय स्वया “गालय् वन” म्हितेत इनाप वःगु जुया च्वन ।
शोभा महजनं नेपाली व नेपालभाषाया आपालं म्युजिक भिडियो म्हिते धुंकल ।
भुतुमलि पौ च्वया, थौं हाकनं छंगु लुमन्ति, गज्यागु कासा म्हिता अले खस नेपाली भाय्या “टाढा नजाउ” या चर्चा आपालं जूगु खनेदु । उकि मध्ये नांजाम्ह पौभा च्वमि प्रेममान चित्रकारं च्वयादीगु “जित स्वया मिखा भाय् याना” धाःगु म्ये वयात तसकं यःगु म्ये जुया च्वन । “छाय्धाःसां थ्व म्येया शब्द रचना तसकं बांला । विशेष याना थ्व म्येया म्युजिक भिडियो छगू प्रेममान दाइ दुबले हे पिकायेगु धकाः यानागु खः तर दुखःया खँ छु धाःसां वय्कः मत्यवं मदुबले थ्व ईच्छा धाःसा पूमवन ।” धका शोभां प्रेममान चित्रकारयात लुमंकल ।
खस नेपाली भायया म्युजिक भिडियोया खँय् “टाढा नजाउ” यात छगू यःगु म्युजिक भिडियो खः धाल । उगु म्येया निर्देशक स्वतन्त्रसंसार महर्जन थः शारिरीक रूप अशक्तम्ह कलाकार खः धासे थौंकन्हे थःगु शारिरीक रूपं भतिचा असक्त जुया च्वंसा कलाख्यलय् दिपा मदिक्क ल्हाः न्ह्याकावया च्वंम्ह खःसा थुके मू मिजं पात्रया रूपय् स्वतन्त्र थम्हेसिनं हे म्हिता शारिरीक अशक्तता छुं मखु मानसिक रूपं सबल जुइगु हे मू खँ खः धका दसु जुया क्यंगुलिं थःयात तसकं यःगु खः धका शोभां धाल ।
