न्ह्यः खँ
लोकलसय् हे नेवाः म्ये लोकंह्वाइ धैगु खँ नेपालभाषाया संगीत ख्यलं बुलुहुँ वाः चायेकाच्वंगु दु । ख्वपया भीम प्रजापतिं नेपालभाषाया लोकसंगीतय् आधारीत म्ये न्हापा नं हालाच्वंगु खः । वय्कलं थनिं खुदँ न्ह्यः पिकागु ‘हाइ हाइ रे कान्छी मय्जु’ थौं तक्क नं लोकंह्वाःगु म्ये खः । युट्य्बय् थुगु म्येया भ्यूज नं ६००k थ्यं मथ्यं दये धुंकल । तर भचा ताःईया अन्तराल लिपा न्हूगु म्ये ‘हाकुपर्सि तुयुगु गाचा’ बोलया म्ये पिदंगु खः । थुगु म्ये नं सामाजिक संजालय् लोकंह्वानाच्वंगु दु । नेवाः बस्ति ख्वप देय्यात आधार दयेकातःगु थुगु म्ये खः ।
म्येया बिषय
निशा देशार थुगु इलय् नेपालभाषा ख्यलय् तसकं हे बय्बय् जुयाच्वंगु नां खः । निशा देशारया मनमोहक सलं नेपालभाषाया सांगीतिक ख्यः थ्वयाच्वंगु ई खः । जूगल डंगोलया संगीत संयोजनय् थुगु म्ये तयार जूगु खः । म्येयया लय् भीम प्रजापतिं हे तयातःगु खःसा थुगु म्ये नं भीम प्रजापतिं हे च्वयातःगु खः । भीम प्रजापतिया सलय् छगू नेवाः पह लुयाः वःसा म्येहालामि निशा देशारया सलय् मिठास दु । थुगु हे म्येय् आराध्या लक्ष्मी खड्गीया निर्देशन व अभिनय् लिसें कोरियोग्राफि दु । आराध्या लक्ष्मीयात रवि सैंजुं अभिनय्लय् साथ बियाच्वंगु दु । म्येया छायाँकन लिसें सम्पादन सोहन मानन्धरं यानातःगु दु ।
निम्ह पात्र दथुया संवाद कथं म्ये न्ह्यानाच्वंगु दु । ख्वपया परिवेशय्, लाय्कुलिइ थुगु म्ये छायाँकन यानातःगु दु । कलाकार कथं रवि सैंजुया उपस्थीति म्येय् बांलाक्क खनेदु । न्ह्यइपुगु व मनमोहक कोरियोग्राफि थुकी खनेदयाच्वंगु दु । ख्वप देय् लिसें मनमोहक कालिन्चोकया दृष्य थुगु म्येया मेगु बांलाःगु पक्ष खः ।
विश्लेष्ण
मतिनाय् केन्द्रीत थुगु म्येय् निम्ह मतिनामि नुगः हिलाबुला जुयाच्वंगु भाव न्ह्यब्वयातःगु दु । ख्वप देय्या बिस्का जात्रा पासापिं मुनां स्वः वनाच्वंगु खँयात न्ह्यइपुक्क व यइपुक्क न्ह्यब्वयातःगु दु । संगीत व लय् नितां हे कर्णप्रिय जू । छम्ह लँय् वयाच्वंम्ह मिसायात खनां गन वनेत्याना धकाः न्यंन्यं हे व्याहा यायेगु खँ तक्क नं न्ह्यथनां म्ये हालातःगु दु । म्येया परिवेश कथं दोपत्ताया सारी व लुँचुरी जक मखुसे लुँया धडी नं बिइ धैगु कथंया भाव लिसें मिसायात हेयेकाच्वंगु दु । तर मिसां धाःसा थःगु मचा स्वभाव मतंनिं, मतिनाया पूखुया सवाः काये मसःनि धकाः धयाच्वंगु दु । तर हाकनं थ्व च्वापुगुँइ च्वनां तपस्या याःसां प्राणेश्वरी लुइकेफइ मखु धकाः मिसाम्ह पात्रं लिसः नं बियाच्वंगु दु । थ्व ल्याखं म्येच्वमि थुकी अतःमतः कनाच्वंगु खंके फइ । म्येय् वर्णन यानातःम्ह मिसाया स्वभाव वा पह गथे धैगु प्रस्त जुयाच्वंगु खनेमदु । म्येया केन्द्र कथं गन वनेत्याःगु धकाः न्ह्यसः छुनाच्वंगुया लिसः बिस्काः जात्रा स्ववनेगु जुयाच्वं तर थुकीया हे त्वहलय् मिजंनं मिसायात थःगु जालय् क्यंकेत स्वयाच्वंगु हे म्येया भाव खः ।
आलोचना
थुगु म्येया भाव कथं छम्ह मिजंनं लँय् नापलाःम्ह छम्ह मिसायात गन वनेत्यना धकाः न्यंन्यं थःलिसे व्याहा यायेगु प्रलोभन बियाच्वंगु दु । मिसां नं थः पासापिंलिसें बिस्का जात्रा स्वः वने त्यना धकाः धाइ तर पासापिं धाःसा पासापिं थें मच्वंसे प्याखँ हुलेत कोरस थें जक तयातःगु खने दु । पासाया भुमिकायात कोरसय् सिमित यानातःगु वाः चायेके फइ ।
उकथं हे म्येया खँग्वलं थ्व छपू ट्रेडिश्नल म्ये कथं हे स्थापित जुयाच्वंगु दु । म्येग्वः व भावय् आधुनिक पह खने मदु । तिसा लिसें लुँयागु हे धडी न्ह्याकेगु भाव पुंलांगु ईयात संकेत यानाच्वं । तर थुकी म्हिताच्वंम्ह मिजंम्ह मू कलाकार धाःसा थौंकन्हेया फेशन कथं जुयाच्वंगु दु । म्येग्वः व संगीत लिसें वसःया संयोजनय् निर्देशक मय्जुं ध्यान मब्यूगु खनेदु ।
लोकेशन कथं नं म्येया शुरुवातय् हे पुनरनिर्माण यानाच्वंगु देगः ब्याकग्राउण्डय् प्याखँ हुलाच्वंगु दु । छायाँकारं थुगु निर्माण जुयाच्वंगु देगः वयेक छाय् कायेमाःगु धकाः न्ह्यसः तये छिं । गुकिंयानां थुगु म्येया टाइमलाइन थौंया हे ई धकाः क्यनाच्वंगु दु । तर म्येया भाव धाःसा पुलांगु पारम्परिक भाव ज्वनाच्वंगु दु ।
लिखँ
नेपालभाषाया म्यूजिक भिडियो थुलि तःजिक्क निर्माण जुइ धकाः बिचाः यक्वस्यां हे मयाःगु जुइ । म्येया सुटिंग स्केल तसकं हे तःधं । थुगु म्येयात तसकं हे तःजिक निर्माण यानातःगु भिडियो स्वयाः हे सिइ दइ । तर म्येया प्रचार धाःसा बांलाक्क जूगु खनेमदु । युट्युबय् थुगु म्येया भ्यू १६१ हजार पुले धुंकुगु दु ।
थुगु म्ये पिदने न्ह्यः कलाकार एवं निर्देशक आराध्या लक्ष्मी भमचा जुयाच्वंगु किपाः नं तसकं बय्बय् जूगु खः । सकस्यां हे कलाकार आराध्या लक्ष्मी सुटुक्क व्याहा यात ला धकाः तायेकुगु खः । तर थ्व ला छगू म्येया पब्लिसिटि स्टन्ट जक हे धकाः लिपा थुइकल । म्यूजिक भिडियोया प्रिमियर नं तःजिक हे जूगु खः । नेपालभाषा ख्यलय् पिदने न्ह्यः तःजिक प्रचार जुइगु याःसां पिदने धुंकाः नं छुं ई प्रचार प्रसार यायेमाःगु आवश्यकता दु ।
कलाकार, निर्देशक एवं कोरियोग्राफर आराध्या लक्ष्मी खड्गीं यक्व हे मेहनत यानातःगु खंके फइ । सकतां ज्याखँ छम्हेस्यां याइबलय् आपलं खँ संयोजन नं यायेमाःगु जुयाच्वनिं । तर न्ह्याक्व धाःसां छगू सेल्लाःगु म्ये पिथनेगु कुतः जूगु दु ।
