निर्मल रत्न शाक्य, थाैंया इलय् छम्ह जनप्रतिनिधी खःसां वय्कयाः लगाव संगीत क्षेत्रय् उतिकं हे दु धकाः इलय् ब्यलय् वय्कलं यानाच्वनिगु सांगीतिक गतिविधीं क्यनाच्वं । निर्मलरत्न शाक्य पेजथ्री पिपल्स च्वइस अवार्डय् नं निक्व तक्क उत्कृष्ट म्ये च्वमिया अवार्ड त्याके धुंकुगु खःसा लिपांगु पेजथ्री अवार्ड ११४२य् पेजथ्रीपाखें वय्कःया याेगदानयात सम्मान यासें वय्कःयात हंगु नं खः । वय्कयाः हे च्वसाय् दिवंगत प्रेमध्वज प्रधान व प्रतिमा राजभण्डारीया सलय् “छन्त छु जुल” म्युजिक भिडियोया प्रिमियर जूल । थुगु म्येया लय् नं निर्मलरत्न शाक्यं चिनातःगु खःसा, म्येया संगीत संयाेजन सुमन कपालिं यानातःगु खः। विश्वास बज्राचार्यं निर्देशन यानातःगु थुगु म्ये लुजः सिंहं छायाँकन यानादीगु खः । लोकंह्वाम्ह कलाकार कर्मा व शोभा महर्जनं थुकी अभिनय यानादीगु दु ।
ख्यालिजुजु मदनकृष्ण श्रेष्ठ मूपाहाँ कथं झायादीगु ज्याझ्वलय् म्येच्वमि व लय् चिनामि शाक्यया कलाकारिताया प्रशंसा यानादीगु खः । ज्याझ्वलय् विशेष अतिथी सिनेकःमि एवं साहित्य अन्वेषक प्रकाश सायमिं भिडियो दुने छ्यलातःगु प्रविधीया प्रसंशा यानादीगु खः। वरिष्ठ सिनेपत्रकार विजयरत्न असंबरें निर्देशन व कलाकारिता पक्षया तारिफ यानादीगु खः ।
ज्याझ्वलय् संगीतकार मनराजा नकःमि, म्येहालामि प्रतिमा राजभण्डारी व म्युजिक भिडियो निर्देशक विश्वास बज्राचार्य लगायत सभानायः निर्मलरत्न शाक्यं उगु म्येबारे थःथःगु नुगःखँ तयादीगु खः ।
