ईलोहं प्रकाशन थनिं २३ दँ न्ह्यः हे स्थापना जूगु खःसा ईलोहं प्रकाशनया लुखां पिदनानच्वंगु पेजथ्री बाःछिपौ नं १९ दँ पुले धुंकुगु दु । पेजथ्री बाःछिपौया मूल्य मान्यता धैगु हे नेवाः ख्यलय् पाना जुपिं ब्यक्तित्वपिंत सम्मान यायेमा व सम्मान बिइमाः धैगु खः । थ्व हे झ्वलय् पेजथ्री बाःछिपतिं नेवाः प्याखँ, नेवाः मनोरंजन ख्यः अले नेवाः संगीत ख्यया बुखँ व गतिविधि कःधाना बुखँ पिकयाच्वनागु खः । थुलिं जक झीगु मूल्य व मान्यता पुमवनि थें च्वनां नेपालभाषाया मनोरंजन ख्यः कःधानाः पेजथ्री पिपल्स च्वइस अवार्डया १४ वर्षया यात्राय् प्यंगू संस्करण पुवंके धुनागु दु । गुकि मनोरंजन ख्यःया कलाकार एवं प्राविधिक अले श्रष्टापिनिगु सम्मानय् ज्याझ्वःयाना वय् पिंत हःपा स्वरूप पेजथ्री अवार्ड लःल्हानाच्वना ।
पेजथ्री जक मखुसे ईलोहं प्रकाशनया लुखां पिदनिगु नःलि साहित्यिक लय्पाै पाखें थी थी साहित्यिक गतिविधि व साहित्यिक धेंधेंबल्लाकासा न्ह्याकाः थीथी साहित्यिक ब्यक्तित्वया विशेषांक नं पिकयाच्वंगु दु । उकथं नं ईलोहं मचा लय्पौ पाखें मस्तय्गु निंतिं थीथी कासा व सिरपाःया नं ग्वसाः ग्वयाच्वंगु दु । मुख्यत ईलोहं प्रकाशन थथे हे नेपालभाषा ख्यलय् श्रष्टापिन्त सम्मान याना वनेमाः धैगु मूल्य मान्यताय् न्ह्यानाच्वंगु प्रकाशन खः ।
पेजथ्री बाःछिपौ पाखें नं पेजथ्री पिपल्स च्वइस अवार्ड ११३०य् श्रष्टा रामशेखर नकःमियात लाइफटाइम एचिभमेन्ट अवार्ड, ११३३या संस्करणय् जगमोहन वामि, ११३७या संस्करणय् विष्णु जल्मी व ११४२या संस्करणय् मदनकृष्ण श्रेष्ठयात लाइफटाइम एचिभमेन्ट अवार्ड लःल्हानागु जुल। जनगायक एवं लोक गायक रामकृष्ण दुवालया हना ज्याझ्वः नं पेजथ्री बाःछिपौया थुगु हे मूल्य व मान्यतायात निरन्तरता बियाच्वंगु छगू कृयाकलाप खः। थुकथंया बिस्कं ज्याझ्वः थ्व न्हापांगु हे खःसा छम्ह श्रष्टायात सम्मान गुगु कथं बिइ धैगु चिन्तन व कृयाशिलता न्ह्याब्लें हे जुयाच्वनीं ।
रामकृष्ण दुवाल छम्ह जनगायक वा लोकगायक धाःसां वय्कः छम्ह आधुनिक नेपलभाषा मनारंजन ख्यःया संवाहक धायेत नं झीसं लिफः स्वये मज्यु छाय्धाःसां वय्कलं रचना यानादीगु सिरसाया हेकू म्ये नेपाभाषाया म्यूजिक भिडियो ख्यःया छगू कोषल्वहं खः । थुगु हे म्येया म्यूजिक भिडियो पिदने धुंकाः नेवाः म्येया म्यूजिक भिडियो दयेकेगु अथाहा संभावना खनेदया वःगु खः । थुगु म्येया भिडियो पिदने धुंकाः नेवाः म्येया छगू न्हूगु कालखण्ड न्ह्याःगु खः गन नेवाः म्येया भिसिडि बजारय् मियाः आय आर्जन याये फइ धैगु बिचाःयात तिबः जूवंगु दु ।
रामकृष्ण दुवालया सिरसाया हेकु म्येया लिधंसाय् रक भर्सन, टेक्नो भर्सन, हिपहप् भर्सन, रिमिक्स भर्सन लिसें थ्व मिसातय्सं हालेगु म्ये जूगुलिं मिजं भर्सन तकं पिदंगु दु । थुलि विविधतायात उत्प्रेरणा बिइफुम्ह छम्ह श्रष्टायात इलय् हे हनेखंगु लिसें वय्कःया मेमेगु ज्याखँयात नं गुगु कथं न्ह्याके यंके फइ धैगु चिन्तन नेपालभाषा ख्यलं याये माःगु दु ।
