नानीमैंया श्रेष्ठया निगूगु सफू समाजया किपा बिमोचन ज्याझ्वलय् डा. राजन लाल जोशी, नेपालभाषा केन्द्रीय विभागया प्रमुखं थःत हे मछिना वःगु खँ कुलादिल । थःपिं व्यस्तताया कारण सफू पिकायेगु पाखे निस्कृय थें जुयाच्वंगु तर ७४ वर्ष दुम्ह नानीमैंया श्रेष्ठं धाःसा थुगु उमेरय् नं निगूगु सफू पिकाःगुलिं वय्कःया जोश व जाँगरयात सम्मान यानादिल । थःगु नं कृति पिकायेत आपलं सफू ल्यं दनिगु खँ नं कुलादिल । थ्व सिबें न्ह्यः नानीमैंया श्रेष्ठया लुमन्तिया जः पिदंगु इलय्, छगू शौखया रुपय् सफू पिकाःगु जुइ धैगु डा. राजनलाल जोशीं आंकलन यानागु खँ कुलादील तर थुगु सफू छगू जीवन्त समाजया हे किपाः जुयाच्वंगु व सफूतिइ न्हापाया मूल्य मान्यता व समाजया वर्णन जुयाच्वंगुलिं थुगु सफू तसकं हे महत्वं जाःगु खँ कुलादिल । लिसें वय्कलं हाकनं मेगु सफूया तयारी यानाच्वंगुलिं भिंतुना देछानादिल । थ्व ल्याखं नानिमैंया श्रेष्ठ नेपालभाषा ख्यःयाम्ह छम्ह धात्थेंम्ह सेलेब्रेटी खः धकाः नं धयादील। डा. रास जोशीं छुं ई न्ह्यः न्ह्यलं ल्हाये मफूगु सत्य च्वःगु इलय् पुंलाःगु परिवेशया निंतिं आपलं हे ज्याथः जिथिपिं नापलाना यक्व हे मेहनत यानागु खँ लुमंकादिल तर थुगु सफूतिइ पुलांगु परिवेशया वर्णन यक्व हे दुगुलिं नेवाः संकिपा दयेकीपिन्त नं तसकं ज्या वइगु खँ कनादिल ।
सफूया बारे न्वावानादीसें ईलोहं प्रकाशनया प्रवन्धक एवं नःलि साहित्यिक लय्पौया सम्पादक नरेशवीर शाक्यं थुगु सफू साहित्यकारं कल्पना याना च्वयतःगु खँ मखुसे समाजया मूल्य व मान्यतायात गथे खः अथे न्ह्यब्वयातःगु सफूया रुपय् कनादिल । थुगु सफू च्वमिया बिचाः मखुसे नेवाः समाजया मूल्य मान्यताया हस्तानतरण जुयाच्वंगु खः धकाः धयादील । थौंया समाजय् वयाच्वंगु बिचलनयात मूल्यांकन यानां झीगु मूल्य मान्यता गुगु पति पाय्छी धकाः दानास्वयेत थुगु सफुतिं यक्व हे ग्वाहलि याइगु खँ कनादिल ।
उप प्राध्यापक राजित बहादुर श्रेष्ठं सफू ब्वनेबलय् झी अजिपिंसं मुलय् तयाः मस्तय्त बाखं कने थें कनातःगु अनुभव जुइगु खँ धयादिल । थुकी दुथ्यानाच्वंगु हरेक प्रसंगं ब्वमिपिंत झूमिं यंकाबीगु खँ वय्कलं कनादिल । छाय्धाःसां थुगु सफूतिइ नेवाःतय् इतिहास नं दु, नेवाः संस्कारया किचः नं दु व बिसंगती नं दु । थ्व फुक्कं छथाय् मुंकीबलय् नेवाः समाजया बनोटयात थुइकेत छपलाः न्ह्याकेत अःपुइ ।
ज्याझ्वलय् उप प्रा. राजित बहादुर श्रेष्ठं त्वाः देवाय् मतच्याकाः उलेज्या यानादीगु खःसा सफूया प्रकाशक कृष्णराम श्रेष्ठया सभापतित्वय् न्ह्याःगु खः । च्वमि नानीमैंया श्रेष्ठं सफू पिकायेत ग्वाहलि यापिन्त सुभाय् देछानादीगु खःसा जीवनया लिपांगु इलय् नेपालभाषाय् एम ए पुवंके धुंकाः थःके न्हूगु जोश जाँगर वःगु खँ नं कनादील । ज्याझ्वलय् रोजीना जोशीं लसकुश यानादीगु खः, मिनर्वा शर्मां न्ह्याकादीगु खः ।
