छगू फिल्म हे थःगु म्हसीका

न्ह्यखँ
छम्ह कलाकार जुइ धुंका उम्ह कलाकारं छगू मखु तःगु फिल्म म्हीति । अथे तःगु फिल्म म्हितुसां वयागु म्हसीका छगू हे फिल्मं बनेजुइ अले वहे फिल्मया कारणं वयागु म्हसीका दयाच्वनि । हलिउडया खँल्हायेगु खःसा अनया नांजाम्ह हिरोइन जुलिया रोबर्टं गुलि फिल्म गुलि धइगु ल्याःचाः हे मदु तर वयागु म्हसीका “प्रिटी वुमन” कथं कायम जुलसा मेम्ह हलिउड हिरोइन जुडी फस्टर “ट्याक्सी ड्राइभर” या कारणं म्हसील । मार्लन ब्राण्डो “द गडफादर”, सिल्भिस्टर स्टाएलोन “राएम्बो” अले ह्यारिसन फोर्ड “रेडर्स अफ द लस्ट आर्क” या म्हसीका जुया बिल । हलिउड बलिउडय् अजागु दसु यक्वः दु ।

बलिउडया चर्चा यायेबले अमजद खानयात “शोले” गब्बर धका आपासिनं म्हसीलसा कलिउड धका धयातःगु खस नेपाली फिल्मया खँ स्वयेगु खःसा सुनिल थापां नं यक्वः फिल्म म्हितल तर वयागु म्हसीका “चिनो” फिल्म हे जुया बिल । सुलेमान शंकरया म्हसीका “ईकु — ल जङ्गलमाएन” जुया बिल ।

नेवाः फिल्म
नेवाः फिल्मया खँल्हायेबले छगू फिल्म हे थःगु म्हसीका जूपिं कलाकार यक्वः दु । उलिजक मखसे व हे छगू फिल्म धुंका तनावंपिं कलाकार नं यक्वः दु । थ्व खँया चर्चा यायेगु झ्वलय् दकलय् न्ह्यःने लाःवइगु नां धइगु जय श्रेष्ठ व नबिना श्रेष्ठया नां खः । इपिं निम्हं “सिलु” फिल्मया हिरो हिरोइन खः । “सिलु” नेपालभाषाया न्हापांगु फिल्म खः ।

थथे न्हापांगु नेवाः फिल्मं थःगु पलाः न्ह्याकुपिं हिरो हिरोइनत मध्ये नबिना श्रेष्ठं लिपा वना छुं छुं खस नेपाली फिल्म म्हितलसा हिरो जय श्रेष्ठं यक्वः लिपा छगु मेगु नेवाः फिल्म “बाँला मयजु” म्हितल । खय्तला जय श्रेष्ठं नं नेपाली फिल्म म्हितेगुपाखे पलाः न्ह्याकुगुला खः तर उलि न्ह्याःवने धाःसा मफुत । थुकथं न्हापांगु नेवाः फिल्म “सिलु” या हिरोहिरोइन तयेगु म्हसीका वहे छगू फिल्मय् लिकुन ।
“सिलु” धुंका निगुृगुृ नेवाः फिल्म कथं “राजमति” पिदन । खयेतला थ्व निगुु फिल्मया दथुइ “चरित्र”, “चिपःनिपः”, “न्हिलान्हिला हुँ” व “निपाः ख्वाःपाः” नांयागु प्यंगु भिडियो फिल्म नं पिदंगु खः तर उगु फिल्मयात फिल्मया दर्जाय् हे मतल । “राजमति” फिल्मय् हिसिला महर्जनं मूभुमिका म्हितातःगु दुसाः मणिराज लवट व श्रीकृष्ण श्रेष्ठं वया मतिनामिं जुया म्हितातःगु दु ।

हिसिला महर्जन
“राजमति” वि.सं.२०५२ या फागुृन महिनाय् पिदंगु खः । व ल्याखँ थ्व फिल्म पिदंगु नं थ्यंमथ्यं स्वीदँ दइन । “राजमति” धुंका हिसिलां “चाण्डालिका” म्हितल अले “त्याग” नांयागु फिल्मया नापनापं “कीर्तिपुर— द लिजेण्ड अफ कीर्तिलक्ष्मी” नांयागु खस नेपाली फिल्म नं म्हितल तर वयात आःतक नं आपासिनं राजमति हे धका म्हसीका वयाः च्वंगु दु ।

मणिराज लवट व श्रीकृष्ण श्रेष्ठ
श्रीकृष्ण श्रेष्ठ छम्ह नेपाली फिल्मख्यःया लोकंह्वाम्ह हिरो खः । “राजमति” धुंका वं मेगु नेवाः फिल्म मम्हितू धाःसा मेम्ह हिरो मणिराज लवटं नं मेगु नेवाः फिल्म म्हितूगु मदुनि ।

राजेन्द्र खडगी
एक्शन कोरयिोग्राफरया रूपय् तसकं नांजाम्ह फाइट डाइरेक्टर राजेन्द्र खड्गीया नुगः अभिनयपाखे नं क्वसाः । राजेन्द्र खड्गीं “राजमति” फिल्मया एक्शन कोरियोग्राफिया नापनापं उके चिकंचा नांया पात्रया रूपय् नं अभिनय यात । खयतला राजेन्द्र खड्गीं मेमेगु छगू निगु नेवाः फिल्मय् नं अभिनय याःगु दु तर वयात आपासिनं “राजमति” फिल्मया चिकंचा धका हे म्हसिउ । थ्व हे म्हसीकाया लबः नयेत राजेन्द्र खड्गीं “चिकंचिया धेबा नये थाकु” नांयागु फिल्म हे दयेकेगु ग्वसाः ग्वःगु नं खः अले उकिया निंतिं संगीतकार भुपेन्द्र बज्राचार्यलिसे जाना म्ये नं रेकर्ड यात तर उगु फिल्म धाःसा आः तक दयेकुगु खने मदुनि ।

धिरेन शाक्य
धिरेन शाक्य नं नेपाःया फिल्मख्यःया नांजाम्ह हिरो खः । धिरेन शक्यं म्हितुगु नेवाः फिल्म धइगु “त्याग” खः । व धुंका धिरेन शाक्य “घोषक” नांयागु फिल्मय् बचाहाकःगु रोलय् खनेदयेक वल । थुलिबाहेक धिरेन शाक्यया मेगु नेवाः फिल्म खनेमदुनि ।

शिव श्रेष्ठ
शिव श्रेष्ठला नेपाःया फिल्मख्यलय् एक्शनस्टार धका नांजाम्ह हिरो खः । वयात नेवाः फिल्मय् म्हितकेगु आपासिनं यात तर सफल मजू । शिव श्रेष्ठं म्हितूगु छगू हे जक नेवाः फिल्म धइगु “कृषा गौतमी” खः । “कृषा गौतमी” या निर्माण इलय् शिव श्रेष्ठं याःगु असहयोगया कारणं वयागु रोल हे चिकिचा हाकः यायेमाल ।

सनम शाक्य
नेवाः फिल्मया ख्यलय् “पानबति” छगू तसकं बय्बय् जूगु फिल्म खः । थ्व फिल्मया हिरोइनया नां सनम शाक्य खः । सनम शाक्ययात “पानबति” फिल्मय् आपासिनं ययेकल । नेवाः फिल्म ख्यलय् न्हूम्ह हिरोइनया पलाः न्ह्यात धका उगु इलय् आपासिनं लसता नं प्वंकल तर वयागु पलाः व धुंका “वल वल फसिक्वाः” तक जक थ्यन अनं न्ह्यःने वनेमफुत । अले वयागु म्हसीका पानवति हे लिकुन । थथे छगू निगु फिल्म म्हितूसां छगू हे फिल्म थःगु म्हसीका जूपिं कलाकार यक्वः दु । गुलिखे कलाकारया यात्रा छगू निगु फिल्म सिबें अप्वः न्ह्यामवंगु दसु नं यक्वः दु ।

अनरेबल मेन्शन
“सर्गःमिला” फिल्म पिदंबले थ्व फिल्मया हिरोइन सुमिका बज्राचार्यया तारीफ मयाःपिं सुं मदु । “सर्गःमिला” धुंका सुमिकाया “हाकु सुपायँ” नांयागु छगू फिल्म पिदन अले अनं लिपा सुमिका तन । सुमिकाया “सर्गःमिला” फिल्मया हे हिरो राजेश महर्जनलिसे यःत्यः जुया वलिसे तिपु जीवन हन । सुुमिकाया थें हे राजेश महर्जनया नं “सर्गःमिला” धुंका छगू हे जक फिल्म “अंश” पिहाँ वल ।
थथे छगू निगू फिल्म म्हिता तनावंपिं हिरो हिरोइन मध्ये “मू मदुगु जिन्दगी” या हिरो आर एल महर्जन छम्ह नं खःसा “छ हे मदुसा” फिल्मया हिरो राजकुमार श्रेष्ठ छम्ह नं खः । “छ हे मदुसा” फिल्मया हिरोइन मीरा माली नं “थःम्हं म्हूगु गाः” छगू फिल्मय् नेगेटिभ रोल म्हितेधुंका तना वन ।
“थःम्हं म्हूगु गाः” फिल्मया हिरो किशोर शाही खः । किशोर शाहीया पलाः नं अभिनय ख्यलय् उलि न्ह्याना च्वंगु खनेमदु । खयतला वयागु छगू निगु फिल्म निर्माणया घोषणा नं जूगुृ खः उगु फिल्म धाःसा आः तक निर्माण जूगु खनेमदुनि ।
छगू फिल्म म्हिता बय्बय् जूम्ह छम्ह हिरोइन निकि महर्जन नं खः । निकीया “तिन तिकः महा बिकः”यात आपासिनं ययेकुगु नं खः । थ्व हे फिल्मपाखे निकीं पेजथ्री अवार्डय् बेस्ट डेब्युटाएण्ट अवार्ड नं त्याकल । व धुंका “हिसिमति” नांयागु छगू मेगुृ फिल्म नं म्हितल । अनं लिपा इहिपा याना तिपू जीवन हना च्वंम्ह निकि हाकनं आःतक फिल्मय् खनेमदुनि ।
“तिन तिकः महा बिकः” फिल्मय् निकि महर्जनलिसे हिरो जुया म्हितुम्ह योगेन ज्यापु नं वयां लिपा “हिसिमति” फिल्मय् हाकनं निकिया हे हिरो जुया खने दयेक ला वल तर वयागु नं अभिनय यात्रा वसिबें अप्वः न्ह्यःज्यांवंगु खनेमदुनि ।
थथे छगू निगु फिल्म धुंका तनावंपिं यक्वः दु । अजापिं मध्ये छम्ह “थः कतः कतः थः” या हिरोइन सचि राजोपाध्याय नं खःसा “मतिना सी मखु गुृबलें” या हिरोइन इन्जाः नेवाः अले “थःम्हं म्हूगु गाः” या हिरोइन रुबिना महर्जन व “व मिसा” फिल्मया हिरोइन विनिता महर्जन नं खः । अज्याःपिं कलाकार यक्वः दु । च्वयां साध्य हे मजू । थनला केवल छुं छुं दसु जक न्ह्यब्वयागु जुल ।