संगीना बैद्य नेपा:या तेक्वान्दोया कासामि ख: । वय्क: ओलम्पिक कासाय् ब्वति कायेधुंकूम्ह जुया: ओलम्पियन नं ख: । ओलम्पिकय् म्हितुपिंन्त ओलम्पियन् धका: सम्मान याइगु ख: । संगीना बैद्ययात न्ह्यागु उपाधी ब्युसां ल्व: । वय्क:यात तेक्वान्दोया लानि (Taekwondo Queen) कथं नाले बह: जू । वय्क: नेपा:या कोहिनूर हिरा ख:धका: नं धाये ज्यू ।
संगीनाया जन्म नुवाकोट जिल्लाया त्रिशुलिइ जूगु ख: । संगीना न्हय्म्ह त:केहेँ व छम्ह किजा दु । बाः अच्युतानन्द बैद्य व मां निर्मला बैद्यया म्ह्याय् संगीनाया लगाव मचांनिसे कासा ख्यलय् दूगु ख: ।
ब्वनाकुथिइ संगीना
संगीना त्रिभुवन त्रिशुली हाईस्कूलय् ब्वनादिगु ख: । ब्वनाकुथिइ संगीनां फुटबल, भलिबल व म्याराथोनय् मदिक्क हे ब्वतिकयाच्वनिं । संगीनाया लगाव कासाय् यक्व:जूगुलिं वय्क:या पढाइ तसकं बांलाः थिंक मजु । ठिकठाक जक हे जू । पढाइलय् पास धाःसा याउँक जु । वय्कलं धयादिइ — जि आख: ब्वनेगु खँय् उलि ता: मला:, उलि बांला: मजू तर, जिं पास चाहिं याना । छाय्धासा यदि जि फेल जुल धा:सा जिमि मांबा नं जित: म्हितके बिइ मखु । अथेजुया जिं कासानापं ब्वनेगुलि नं भचाभचा ध्यान बिया ।’
वय्कलं उगुइलय् जिल्लास्तरीय कासा व विद्यालयस्तर कासाय् ब्वनेकुथिया लागि स्वर्ण पदक नं त्याकाल । वय्कलं १ सय मिटर व २ सय मिटर म्याराथाेन कासा, हाइजम्प विधाय् स्वर्ण पदक नं त्याकादिइगु ख: । थुकिं वय्क: ब्वनेकुथि माष्टर व पासापिनिगु निंतिं यम्ह: ब्वनामि जुल । वय्कलं धया दिइ—फ्रस्ट, सेकेण्ड विद्यार्थीया नां लुमनि मखु, जिगु नां धा:सा सकसियां लुमं ।
संगीनायात म्याराथाेन लिसें भलिबलय् नं य:गु कासा ख: । वयकलं नुवाकोटया प्रतिनिधित्व याना राष्ट्रिय खेलकुदया लागि छनोट कासा म्हितादिगु दु । वय्क:या टिमं काभ्रेया बनेपा वना म्हितुगु ख: । अनं नं वयकलं बांलाक्क म्हितादिगुलिं छम्ह: दर्शकं न्यास: दां सिरपा ब्यूगु ख: । संगीनां व खँ लुमंका धयाः दिइ —जि म्हितूगु बांला धका: छम्ह दर्शकं जित न्यास: तका बियादिल । जि तसकं लय्ताया । जितः थुकिं कासा म्हितेत ह:पा: बिल ।
संगीनां छम्ह कासामिया रूपय् थःगु करियर सन् २००८ य् दिकादिल । अनं लिपा वय्कलं राष्ट्रिय खेलकुद परिषद् या प्रशिक्षक जुयाः ज्या: यानादिल । वय्क:या प्रशिक्षणय् निशा रावलं ब्राजिलया रियो सहरय् जुगू ओलम्पिक खेलकुदय् म्हितादिगु ख: । संगीनाया प्रशिक्षणय् निशां बांलागु प्रदर्शन नं यात । निशा झिंखुम्ह कासामि मध्यय् ७गू स्थानय् लात । थुकि छु स्पष्ट याः धा:सां संगीना कासामि गुलि बांला प्रशिक्षणय् नं उलि बांला जू । थौकन्हे वय्क: राष्ट्रिय खेलकुद परिषद् अन्तर्गत तालिम तथा प्रशिक्षण विभागया उपनिर्देशक जुया दिइ ।
ब्रुस लीया पाखें ह:पा:
संगीनां छन्हू सनिलय् आर्मीतय्गु ट्र्रेनिंग स्व: झाल । प्रेम गुरु धाम्ह प्रशिक्षकं आर्मीपिन्त ट्र्रेनिंग याकात:गु संगीनां न्हिन्हि स्व:वनेगु यानादिल । अन छन्हु छम्ह दाजुथाय् ब्रुस लीया प्याखँ स्वयेगु मौका चुलात । ब्रुस लीया फाइट खना वय्कलं संकल्प यानादिल कि आ मार्शल आर्ट म्हितेगु । संगीनां धयादि – छन्हु छम्ह दाजुथाय् ब्रुस लीया प्याँख स्व वना । प्याखँया नां शायद इन्टर द ड्रेगन जुइ मा:। व प्याखँ स्वयाबलय् जित मार्शल आर्टस् ला स्यनेमागु थें जुल । व प्याखनय् ब्रुस लीया फाइट याइगु शैली, मिखाया कन्ट्याक, अले नानचाकु चलेयाइगु कलां जित सालाकाल । जित अले भलिबल, एथ्लेटिक्स मखु थ्व मार्शल आर्टस् स्यनेगु मनय् वल । जिं मार्शल आर्टस्य स्यनेगु लक्ष्य तयाः ।
रंगशालाय् तेक्वान्दो म्हितेगु चूलात
संगीनां त्रिशुलीं एसएलसी पास याना कलेज ब्वनेत: येँ झायादिल । थन: न्हापा हे निम्ह ततापिं झायादिगुली संगीनायात येँय् च्वनेत छुं दु:ख मजुल । वयकलं कलेज भर्ना जुइ न्ह्यो तेक्वान्दोय् भर्ना जुयादिल । वय्कलं धया दिइ — जि कलेज भर्ना जुइ धका: दशरथ रंगशाला वनेगु याना । दशरथ रंगशालाया माहोलं सालाकाल । छन्हु रंगशाला चाहिलिगु इलय् तेक्वान्दोया ब्ल्याक बेल्टया सेरोमेनी स्वयाः । अन जित तेक्वान्दोय् जुइगु अनुशासन, इमिगु व्यवहार खना यक्व: प्रभावित यात । जिं थुइका कि जिगु लागि तेक्वान्दोया कासा फिट् जुइ । थन उबले कराँते, जुडो, उशु नं दु तर जित तेक्वान्दो हे यल ।
संगीनां अमिर श्रेष्ठ गुरुनापं तेक्वान्दो प्रशिक्षण कयादिगु ख: । वय्कलं भ्याली च्याम्पियनसिपय् स्वर्ण पदक त्याके धुंका: गुब्लें लिफ स्वये म्वाःल । वय्कलं लिपा राष्ट्रिय खेलकुदय् स्वर्ण पदक त्याकादिल । अथे हे दक्षिण एशियाली खेलकुदय् नं स्वर्ण पदक त्याका दिल । वयकलं एशियन च्याम्पियनसिपय् नं स्वर्ण पदक त्याकादिगु दु ।
ओलम्पिकया म्हगस पूवन
संगीनाया ओलम्पिकय् म्हितेगु म्हगस नं पूवंगु दु । वय्कलं २००४ एथेन्सय् जुगू ओलम्पिकय् म्हितादिगु ख: । ओलम्पिक म्हितेत छनौट चरणय् प्रतिस्पर्धा याना: वय्क: प्रतिस्पर्धा याना ओलम्पिक म्हितेत ल्यम्ह न्हापांम्ह नेपा:या कासामि ख: । लिपा दीपक विष्टं प्रतिस्पर्धा याना ओलम्पिकय् म्हितादिल ।
दुर्घटनां एसियन गेम्स मिस जुगू
संगीनां १९९६ य् एसियन च्याम्पियनसिपय् स्वर्ण पदक त्याके धुंकाः बैंककय् जुइगु एसियन गेम्सया लागि छनौट जुयादिल । तर, उबले वय्क:या मोटरसाइकल दुर्घटना जुयाः जव तुति त्वःधुल । अनं निला ति आरामय् च्वने माल थुकिं याना: एसियन गेम्स म्हिते मखन । वय्कलं स्वर्ण पदक त्याकि धका: सकसिनं आशा यागु ख: । वय्कलं धया दिल— जब जिगु तुति छपा दुर्घटनां फ्रेक्चर जुल, उबले जित यक्व: दु:ख जुल । जित एसियन गेम्सय् स्वर्ण पदक त्याकि धकाः फुकसिनं धागु ख: । तर, जिं म्हिते मखन । थ्व: जिगु निंतिं दुर्भाग्य जूल ।
