काठमाडौं मोडल स्कुल नेवाः कलाकारपिनिगु खानी खः । मू पाहाँ न्हूछे बहादुर डंगोलं ज्याझ्वः स्वयाः ब्यूगु प्रतिकृया थ्व हे खः । काठमाडौं मोडल स्कुलय् ३ निसें ८ यापिं नच्चापिं मस्तय्सं एकल वाद्य बादन धेधेंबल्लाकासाय् न्ह्यःब्वगु थः थःगु प्रस्तुतिं सकल लस्वकुमिपिन्त मन्त्रमुग्ध याना तःगु खः । येँया राष्ट्रिय नाचघरय् थुगु कासा जूगु खः ।
जुनियर व सिनियर यानां निगू पुचः दयेका धेंधेंबल्ला जूगु खः । मुक्कं २४म्ह ब्वनामिपिंसं ब्वतिकाःगु खः । थुगु कासाया मेगु विशेषता धैगु सुनं मस्तय्त स्कुलं विशेष ट्रेनिंग बियाः स्यंगु मखुसे मस्तय्सं थःम्हं हे बाद्य वादन थाये सयेका च्वंगु खः ।
स्कुलया ब्वनामिपिंसं बाँसुरी, पियानो, कीबोर्ड, मादल, धिमे व खिं थानाः क्यंगु खःसा मस्तय्त प्रवेश महर्जन, विधान श्रेष्ठ व कृतज्ञ महर्जन पिंसं थी थी बाजं संयोजन याना साथ ब्यूगु खः । युविन महर्जनं जुनियर पाखे हःपाः सिरपा त्याकादीगु खःसा सिनियर पाखे राेनिश महर्जनं हःपाः सिरपाः त्याकादीगु खः ।
जुनियर पाखे निर्भेश श्रेष्ठ न्हाप, सुप्रिमा नाय ल्यू व एलन राज डंगोल लियांल्यू लाःगु खःसा सिनियर पाखे सिमसन श्रेष्ठ न्हाप, रेमन श्रेष्ठ ल्यू व समन तण्डुकार लियांल्यू लाःगु खः । न्हाप, ल्यू व लियांल्यू लाःपिन्त ६द्व, ४द्व व २द्व नगद नं लःल्हाःगु खः ।
निर्णायकय् नरेश प्रजापति, सविन मुनिकार व अनिल महर्जन च्वनादीगु खः । ज्याझ्वलय् काठमाडौं युथ अर्केष्ट्रा पाखें नेवाः धूनया अर्केष्ट्रा नं न्ह्यब्वःगु खः । ज्याझ्वलय् स्क्ुलया निर्देशक राजेन्द्र महर्जन व प्रिन्पिल रविन महर्जनं ग्वाहलियाःपिन्त सुभाय्पौ नं लःल्हाःगु खः ।
