न्ह्यः खँ
नेपालभाषा मनोरंजन ख्यःया वरिष्ठ गायकपिंत न्हूगु पुस्तां गथे यानां सम्मान याये फइ ? थ्व खँया अनेकौं लँपु दइ । तर मगन इन्टरटेन्मेन्टं वरिष्ठ म्येहालामि जुजुकाजी रंजित लिसे छगू करार सम्झौता यानां आर मानन्धरं थनिं २५ बर्षति न्ह्यः हे च्वयातःगु छंगु म्हगः गुलि बांला.. बोलया म्येया भिजुअल तयार यानां युट्युबय् प्रिमियर यायेधुंकुगु दु । थौंया इलय् न्हूगु पुस्ता व पुलांगु पुस्ता स्वायेगु छगू माध्यम नं म्यूजिक भिडियो जुयाःच्वंगु दु ।
म्ये
थुगु म्येया च्वमि आर मानन्धर खः । आर मानन्धर नेपालभाषा ख्यःया छम्ह सेल्लाम्ह साहित्यकार कथं कायेगु याः । अक्सर वय्कलं च्वइगु कविताय् दार्शनिक पक्षयात इगित यानाच्वंगु दइ तर थुगु म्ये थौं सिबें २५ बर्ष ति न्ह्यःयागु जुगुलिं थुकि म्येच्वमि धाःसा छम्ह मिसाया सौन्दर्यया बयान यानाः च्वयातःगु दु । मिसाया म्हगः जक बांलाःगु मखुसे नुगः नं उतिकं हे बांलाः धकाः वर्णन यानां च्वयातःगु दु । म्येया शब्द शब्द म्वाकेत वरिष्ठ म्ये हालामि जुजुकाजी रंजितं अतिकं हे सरल रूपं सुमधुर सलं छाय्पियातःगु दु । म्येया संगीत निर्देशननं जुजुकाजी रंजितं यानातःगु दु । संगीत संयोजन राजेश हाडां यानातःगु दु । थुलि यइपुक्क संगीत संयोजन जुयाःच्वंगु दु कि थुगु म्ये न्हाय्पनय् हे नायाः वनाच्वंगु वाःचाइ ।
भिजुअल
ग्रामीण परिवेशयात कःघाना च्वयातःगु म्येय् छम्ह मिसाया सौन्दर्य वर्णन यानातःगु दृष्य थुगु म्येय् न्ह्यब्वयातःगु दु । छम्ह ज्यापू दाजुं छम्ह अतिकं बांलाःम्ह मिसाया यौवन खनां वैगु शारीरिक सौन्दर्यता जक मखु वैगु शील स्वभाव नं बांलाःगु व थः वैगु रूप खनां मोहित जुल धैगु भाव थुगु म्येया भिजुअलय् क्येनातःगु दु । थौं सिबें २५ बर्ष न्ह्यः हे च्वयातःगु थुगु म्येय् खःसां म्येयात पुलांगु हे ई वा २५ बर्ष न्ह्यःया हे ई कथं क्यनेत स्वयःगु दु । म्ये स्वतले हे मिखायात याउँसे च्वं । क्यामरा मुभमेन्ट सल्ल वं । भिडियो स्वतले गनं नं मिखायात ध्वः थें मजू । कर्णप्रिय संगीतं यानां म्येयात मन हे आनन्द वः । भिडियोया मू कलाकार राष्ट्रिका शाक्य धात्थें हे म्ये धयातःथे स्वर्गया परी व नुगः नं बांलाम्ह थें खनेदु । वय्कया हाउभाउ स्वयेबलय् थुगु म्ये वय्कया लागी हे दयेकातःगु थें च्वं । म्ये हालाच्वंम्ह मू पात्र सुदीप भजूं राष्ट्रिका शाक्यया वर्णन यायेगु कुतः यानाजूगु बांलाक्क हे खंके फइ ।
विश्लेषण
थुगु म्येया सांगीतिक पक्ष लिसें मेगु चर्चा यायेबहगु पक्ष धैगु थुकिया भिजुअल नं खः । मगन इन्टरटेन्मेन्टया लुखां पिदनाच्वंगु थुगु म्येया निर्देशक रजीन महर्जन खः । रजीन महर्जनया थ्व सिबें न्ह्यः व मनू सु मनू व जेम्स नांया निपू म्यूजिक भिडियो पिदने धुंकुगु दु । न्हापाया निपुं म्ये सिबें थुगु म्ये सांगीतिक रूपं लोकम्येया सवाः दुगु म्ये खः । थुगु म्येया शुरुवातय् हे नेवाः बस्तीया परिवेश क्येन कथं निम्ह मनूत फल्चाय् च्वनां म्हिताच्वनिं सा सुदीप भजूं अन थ्यंकः वइ अले व हे थासं राष्ट्रिका खनिं । वैगु सौन्दर्य खनां म्ये शुरु जुइ । निगु दशक न्ह्यःया छपू ट्रेडिशनल म्ये जूगु कारण, थुगु म्ये पुलांगु परिवेशया म्ये धकाः क्यनेगु निंतिं आपलं हे खँत दुथ्याःकातःगु दु । रेट्रो फेशन कथं मू नकिंया वसः, थौं कन्हे प्रचलनय् खने मदये धुंकुगु छतका वंगु नोट, रबरया पुलांगु छाँट वंगु लाकां इत्यादि । म्येया सवाः पुलांगु हे परिवेश धकाः क्यनेत कुतः जुयाःच्वंगु दु ।
म्येय् मू कलाकार राष्ट्रिकाया इन्ट्रो शट तसकं आकर्षक जू । राष्ट्रिकाया एन्ट्री हेँय् लिसें च्वलेचा छथाय् मुंकाः ब्वाँय् जूगु दृष्य वास्तवय् सुटिंग यायेत थाकुगु दृष्य खः । छाय्की छक्वलं थुपिं जीव जन्तुयात मुंकाः शट कायेगु अःपुगु खँ मखु । म्येया टाइमलाइन क्यने कथं मोहनीया ई नं क्यनातःगु दु । नलस्वां छ्यनय् छुनातःगुलिं मोहनीया ई धकाः धायेछिं । यक्व धैथे भिजुअल म्येग्वःयात केन्द्रीत यानां न्ह्याकाःतःगु दु ।
आलोचना
म्येया भावय् भौतिक व शारीरिक रूपं वणर्न जुयाच्वंथाय् हाकनं आध्यात्मिक रूपं नुगः बांलाः धकाः धयातःगु दु । च्वमि आर मानन्धरया निगु दशक न्ह्यःया थुगु म्ये थौं वयाः भिजुअल जुयाच्वंगु दु । थुगु म्येयात लोक म्ये कथं नं काय् मछिं । म्येया भाव कथं मिसाया सौन्दर्यया बयान यानातःगु व यौन मनोविज्ञानयात तिबः बिइकथंया शब्द चयन यानातःगुलिं थुगु म्येयात आधुनिक म्ये धकाः धायेछिं । ल्यासेसुलं मचायेक हे छंगु म्हय् थियाः हल, छंगु हिसिं जिगु नुगलय् ईंचां थें तियाः हल, न्ह्याब्लें खनाच्वनाम्ह छ, न्हूम्ह थें च्वना वल । नेपालभाषाया म्ये थथे तप्यंक छम्ह मिसाया सौन्दर्ययात कयाः वर्णन यायेगु मयाः । अकसर नेवाः म्येय् थी थी मेटाफोर कथं जक छ्यलाच्वंगु झीसं वाः चाः । शब्दया कारण थुगु म्ये पारिवारिक वातावरणय् न्यनेत भचा मछिं थें जुइ ।
भिडियोया कन्सेप्ट स्वयेगु खःसा निम्ह चरित्रया क्यारेक्टराइजेशन पुवंक जुयाच्वंगु खने मदु । म्येय् उल्लेख जुयाच्वंगु कथं निम्ह पात्र न्ह्याब्लें खनाच्वंपिं व स्वस्वं हे आः मिसा पात्रया यौवन जायाः वःलिसे न्हूम्ह थें च्वना वयेधुंकल धकाः मिसा पात्रया शारीरिक ह्यूपाःयात इंगित यानाच्वंगु दु । तर म्येया भिजुअलय् निम्ह पात्र नकतिनि हे नापलाःपिं थें जक खने दु । निम्ह दथुया स्वापू पुलां धकाः खंके थाकु । छखें मिसा पात्र मचां निसें तःधि जुम्ह थें खने दुसा मिजं पात्र धाःसा निम्ह दथुइ एज् ग्याप दुथें नं खने दयाच्वंगु दु । मिसाया यौवन स्वयाः म्ये हालाच्वनिगु इलय् भचा मेगु हे सन्देश वनी थें नं तायेफु ।
म्येय् मिसा चरित्रया सौन्दर्ययात कयाः परि थें च्वं धकाः उपमा छ्यलातःगु दु । बुँज्या याना जुसां छला स्वर्गयाम्ह परि थें च्वं धकाः धयातःगु दु। वास्वय् परी धैगु शब्द फारसी शब्द खः । फारसी बाखनय् परीयात कोहकाफ पहाडय् च्वनिपिं काल्पनिक मिस्त नं धाः लिसें ब्वय् पापू दुपिं अले आकाश मार्गय् ब्वयाजुइपिं मिस्त धकाः नं वर्णन याः । तर झीगु साहित्यय् थथे परीया परीकल्पना तसकं म्हो । म्येच्वमिया परिकल्पनाय् गैर नेवाः साहित्यया प्रभाव थुकी खंके फइ । भिजुअलया खँय् धाःसा छम्ह नेवाः परिवेशय् बुँज्या याना जुइम्ह मिसायात पपू दुम्ह परीया परीकल्पना निर्देशकं क्यनातःगु दु । भिजुअल कथं थुगु म्येय् पपूदुम्ह मिसा खनीबलय् भचा पाश्चात्य प्रभाव लानाच्वंगु नं खंके फइ ।
लिखँ
नेपालभाषा ख्यय् मगन इन्टरटेन्मेन्टं न्हू न्हूगु हे छाप तयेत कुतःयानाच्वंगु वाः चायेके फइ । थुगु म्येया दकलय् प्रशंसनीय पक्ष धैगु हे वरीष्ठ म्ये हालामि जुजुकाजी रंजीतया निगु दशक म्येयात मूर्त रूप बिइगु कुतः याःगु दु । म्ये सामाजिक संजालय् नं लोकंह्वानाच्वंगु दुसा बांलाःपिं म्येहालामि पिन्सं थःगु लोकंह्वाःगु म्ये थथे हे याना भिजुअल पिदनाच्वनिं धकाः आशा यायेगु यक्व हे थाय् दु । नेपालभाषा मनोरंजन ख्यः चकनाच्वंगु दु ।
