न्यू जेनिथ इङ्गलिश मोडल स्कुल २५दँ थ्यंगु लसताय् छगू तःजिगु ज्याझ्वः यायेगु जानकारी स्कुलका प्रिन्सिपल राजु महर्जनं पत्रकार सम्मेलन यानाः जानकारी बिया दिल। माघ २८ गते आइतवार प्रज्ञा प्रतिष्ठान कमलादिइ विशेष ज्याझ्वःया तयारी जुयाःच्वंगु कनादीगु दु । येँ मनपाया उपप्रमुख सुनिता डंगोल मू पाहाँ कथं झायादीगु नं जानकारी बियादीगु दु ।
स्कुलया थीथी ज्याझ्वः कथं ६०म्ह सिबें आपाः ब्वनामिपिंसं म्यूजिकल अर्केस्ट्रा, म्युजिकल तेक्वाण्डो, स्काउट पिरामिट व थी थी म्ये न्ह्यब्वयइगु कनादीगु दु । सानो सफलतामा धेरै रमाउने मान्छे (प्रिन्सपल महर्जनया सफू नं पिदनीगु, व थर्ड युनिभर्स अफ न्यू जेनिथ स्कुल म्यागजीन नं विमोचन जुइगु लिसें थुगु स्कुल ५दँ निसेँ २५दँ तक्क आवद्ध जुयाःच्वंपिं शिक्षक, शिक्षिका व कर्मचारीपिंत नं सम्मान याइगु जानकारी बियादीगु खः ।
वि.स. २०५६ सालय् प्राइमरी ब्लक अफ जेनिथ इंग्लिस सेकेण्डरी स्कुल बाफलया नामं नर्सरी निसें तगिं ५तक्क सञ्चलान यानां मुक्कं ७४म्ह ब्वनामि पाखें शुरु याःगु हाल वयाः ९५० म्ह ब्वनामिपिं दुगु व १२ तगिं तक्क सञ्चालन जुयाःच्वंगु दु ।
थुगु स्कुलया मेगु विशेषता धैगु स्कुलय् स्थानीय सरकारं स्थानीय बिषय कथं नेपालभाषा अध्यापन याये न्ह्यः निसें हे नेपालभाषाया कक्षा संचालन नं जुयाःच्वंगु स्क्ुल खः ।
