ललितविस्तर शाेधग्रन्थ पितब्वज्या

ईलोहं प्रकाशन प्रा लिया लुखां च्वमि नरेशवीर शाक्यया झिंछगूगु सफू ललितविस्तर शोधग्रन्थ आनन्दकुटि विहार स्वयंभुइ बिमोचन जुल । भगवान बुद्धया जीवनी दुथ्याःगु ऐतिहासिक ग्रन्थ ‘ललितविस्तर’या शोध ग्रन्थया विमोचन विहार प्रमुख धम्ममूर्ति महास्थविर, भिक्षु पञ्ञामूर्ति, भिक्षु प्रियदस्सी, लोट्स रिसर्च सेन्टरया अध्यक्ष प्रा.डा. सुरेन्द्रमान बज्राचार्य, ईलोहं प्रकाशनया संरक्षक धर्मवीर शाक्य, सफूया दाता पद्यादेवी शाक्य व च्वमि नरेशवीर शाक्यंं मंकाकथं याःगु खः ।

ज्याझ्वलय् सफूया दाता पद्मादेवी शाक्यं लसकुसयाना दीगु खःसा ज्याझ्वलय् ब्वतिकाःपि सकसिंत सफू नं लःल्हाःगु खः ।
च्वमि नरेशवीर शाक्यं बुद्ध धर्मय् स्नातकोत्तर अध्ययनया झ्वलय् ‘ललितविस्तर एक तुलनात्मक अध्ययन’ विषय च्वया दिइगु शोध ग्रन्थयात हे थुगु सफूकथं पिथंगु खः । सफूया बिषय न्ववानादीसें नरेशवीर शाक्यं बौद्ध ग्रन्थत भारतया नालन्दा बिश्वविद्यालय् मिंनये धुंकाः नेपालय् जक ल्यनाच्वंगु खँ कुलादिसें थुगु हे ग्रन्थ विश्वय् हाकनं प्रचारय् हयेत नेपालय्लुयावःगु थुगु ग्रन्थया एतिहासिक महत्व दुुगु खँ नं कुलादिल ।

उलेज्या ज्याझ्वलय् अध्यक्ष बज्राचार्यं ललितविस्तर सफू सर्वास्तिवादीतय्गु सफू लिपाः वया महायानितय्सं नालाकाःगु खँ कुलादील ।
सभापति धम्ममूर्तिं बुद्ध धर्म सम्वन्धी हरेक सफुतिं बियाच्वनीगु ज्ञानयात छ्यले फयेकेमाःगु खँय् बः बियदियाः थुगु शोध ग्रन्थया महत्व विषय चर्चा याना बिज्यात । ज्याभ्mव कल्पना बज्राचार्यं न्ह्याकादीगु खः ।

ललितविस्तर छु खः?

ललितविस्तर छक्वलं हे च्वयतःगु ग्रन्थ मखु, न कि छम्ह हे मनुखं । थ्व ग्रन्थ छु इलय् सुनां च्वःगु खः धयागु खँ आः तक्क नं यकिन जुइ मफुनी । ललितविस्तरया आःया वर्तमान रूप गुगु खनेदयाच्वंगु दु, थ्व थी थी च्वमिपिन्सं थी थी इलय् छगू हे ग्रन्थय् तना तःगु ग्रन्थ खः ।

‘ललितविस्तर’ सिद्धार्थ गौतमं जगत उद्धार यायेत, सर्वसत्व प्राणी हितया निंतिं उपदेश बिइत थः च्वनाच्वनागु तुसिताभूवनं पृथ्वीलोकय् कुहाँ वयेत तुयुम्ह किसिया रूपय् मायादेवीया गर्वय् च्वंवंगु खँ निसें बोधिज्ञान लाना बिज्यागु व वनारसया मृदगावनय् न्हापांगु धर्मचक्र प्रवर्तन तक्कया खँ न्ह्याथनातःगु सुत्त ललितविस्तर सुत्त खः ।

थ्व ग्रन्थ न्हापा सर्वास्तिवादीतय्गु ग्रन्थ जुयाच्वंगु खः । लिपा थुकि महायानी अनुयायीतय्गु विचाः दुथ्याका बुद्धयात छम्ह अलौकिक मनूकथं न्ह्यब्वयेगु ज्यानं यानातःगु दु । बौद्ध विद्धान पि.एल भगतया धापूकथं वर्तमान इलय् दयाच्वंगु संस्कृत भाषाया ललितविस्तर स्वंगूगु शताब्दीपाखे च्वःगु अनुमान जुयाच्वंगु दु ।

ललितविस्तरयात नेपालय् नवधर्म ग्रन्थया छगू ग्रन्थया रूपय् नालतःगु दु । तिब्बतय् नं थुकियात महत्वपूर्ण थाय् बियातःगु दु । गुंगूगु शताब्दीपाखे थ्व ग्रन्थ तिब्बती भाषाय् अनुवाद जूगु खः । आः तक्क अनुवाद जूगु ललितविस्तर ग्रन्थतमध्ये तिब्बती भाषाय् अनुवाद यानातःगु ललितविस्तरयात उत्कृष्ट व मूल संस्कृत ग्रन्थनाप लिक्क लाःगु अनुमान यानातःगु दु ।