न्ह्यःखँ
आपलं हे नेवाः प्याखँ निर्माणया अधिनय् लानाच्वंगु दु । छम्ह हे निर्देशकया नं तःगु हे प्याखँ निर्माणाधीन अवस्थाय् दु । आर्यम नकःमिया निर्देशनय् नं थी थी प्याखँ निर्माणाधीन जुयाच्वंगु दु । थुकी मध्य छगू प्याखँ सनाखतया प्रोमो पिदंगु दु । छुं ई न्ह्यः हे जक मदुम्ह साहित्यकार लक्ष्मण राजवंशीया स्मृतिग्रन्थ बिमोचनया ज्याझ्वलय् ‘सनाखत’या थी थी भासं प्रोमो क्यंगु खः छाय्की थुगु प्याखं लक्ष्मण राजवंशीया बाखंया लिधँसाय् निर्माण यानातःगु प्याखं खः । थुगु हे ज्याझ्वलय् प्याखँया कलाकार एवं प्राविधिक पिन्त नं दसिपौ व सम्मान लःल्हाःगु खः ।
Nepalbhasa Movie – ‘Sanakhat’ – World Premiere – Nepalbhasa
प्रोमो
प्रोमोया शुरुवातं हे छगू परिवारया बाखं धकाः छेँय् छखा क्यनातःगु दु। सनाखत प्याखँया मू कलाकार कथं ख्यालि जुजु मदनकृष्ण श्रेष्ठ मू भुमिकाय् दु । थुगु हे परिवारय् मदनकृष्ण श्रेष्ठ लिसें जहान नारायणदेवी प्रधान, राजेन्द्र मान शाक्य, किरण केन रंजित, सुनिता ठाकुर व मेमेपिं क्येनातःगु दु । सकस्यां हे मदनकृष्ण श्रेष्ठयात तसकं हे माया यानां बिचाः यानाच्वंगु क्यनातःगु दु । तसकं ख्यालिं जाःगु माहौल क्यनातःगु दु । न्ह्याम्हं हे लय्तायाच्वंगु क्यनातःगु दु । मदन कृष्णया हे समकालीन पासापिंलिसे च्वना पासा म्हिताच्वंगु नं दृष्य थुकी दु । मदनकृष्ण श्रेष्ठया पासा कथं थुकी जगमोहन वामि, गणेश साय्मि व भृगुराम श्रेष्ठ नं दु ।
तर हरेक न्ह्यइपु खँ लिपा म्हाइपुगु खँ नं दइ धाःथें बाखंया मेगु पक्षय् थें थुकी मदनकृष्ण श्रेष्ठया जीवनय् वयाच्वंगु ह्युपाः नं न्ह्यथना तःगु दु । परिवार फुक्कं अमेरिकाय् च्वनां थः याकः धैगु खँ क्यनातःगु दु सा थुकी हे मेगु ट्वीस्ट कथं छुं विभत्स धटना जू थें पुलिसया भुमिकाय् धिरेन शाक्यया इन्ट्री जूयाच्वंगु दु । थुलिं हे मू पात्र मदनकृष्ण श्रेष्ठं थःगु सनाखत थःम्हं यानाच्वना धैगु नारेशनं प्रोमो क्वचाइ ।
विश्लेषण
सनाखतया प्रोमो स्वयेधुंकाः थुगु प्याखँ छगू पारिवारिक ड्रामा लिसें छगू साइकोलोजिकल थ्रिलर थें नं खनेदु । प्रोमो पाखें छुं भचा बाखँ कनातःगु दुसां छगू कथंया सस्पेन्स लेभल नं तयाःतःगु दु । पारिवारिक वातावरण स्वइबलय् थुकी यक्व हे न्ह्यइपुगु व न्हिइकिगु खने दु सा थुकीया सस्पेन्स कथं सुयांगु मृत्यु जूगु थें पुलिसया अनुसन्धान क्यनातःगु दु तर सिइम्ह मनू सु धकाः क्यनातःगु मदु । थुकीं प्याखँ रोचक हे जुइगु खने दु ।
कलाकारय् मदनकृष्ण श्रेष्ठ रिफ्रेसिंग लिसें उर्जायुक्त खने दु । साथ बियाच्वंपिं कलाकारया बारे यक्व फुटेज मदुसां नारायण देवी श्रेष्ठ थःगु नियमित भुमिकाय् अर्थात बुरीम्ह कला, भातयात साथ बिइम्ह चरित्रया भुमिकाय् खनेदु । धिरेन शाक्य पुलिसया भुमिकाय् पत्याः यायेबह खनेदु। मेपिं कलाकारया फुटेज आपा मदुगुलिं छुं धायेथाय् मदुनि ।
प्याखनय् छुं कथंया म्ये दु मदु धैगु सिइ मदु । म्येया धून वा बोल थुकी तयातःगु मदुनि । प्रोमोय् नं सुत्रधारपाखें न्ह्यानाच्वंगु दु । प्याखँ मुक्कं हे मदनकृष्ण श्रेष्ठया जवंखवं हे क्वचाइ थें खनेदु । ताः ई लिपा मदनकृष्ण श्रृष्ठया छगू मू भुमिकाय् स्वये खनीगु खँय् सन्तुष्ट जुइगु थाय् खनेदु ।
आलोचना
प्रोमो स्वयाः हे आलोचना यायेगु थाय् मदु तर नं थुगु प्रोमो भचा डाय्नामिक दयेके फइगु अवस्था दुगु खः । प्याखँया दृष्य हे ताः हाकयेक मक्यंसे भचा फास्ट कटिंग याना थ्रिलिंग ब्व न्ह्यब्वयेफुसा अझं थुगु प्रोमोया सवाः वइगु खः ।
उकथं हे थुगु प्याखँ मदुम्ह साहित्यकार लक्षमण राजवंशीया बाखनय् आधारीत जुसां प्रोमोलय् गनंनं उल्लेख जुयाःच्वंगु खने मदु। शायद नां त्वःफ्युगु वा पुरा प्याखँ स्वयेगु इलय् खने दइ धकाः आश याये ।
लिखँ
ताः ई लिपा नेपालभाषाया संकिपाया प्रोमो स्वये खंगु दु । निर्देशक आर्यम नकःमिया थुगु प्याखँ आश याये बहजू । मल्टीस्टार कास्ट लिसें मनोरंजनात्मक प्याखँ कथं खने दु । थुगु प्याखनं सकल नेवाःतय्गु नुगः त्याकी धकाः भलसा कायेथाय् दु ।
