कलिउड धकाः धयातःगु नेपाःया फिल्म ख्यलय् आपालं नेवाः कलाकार दु । गुलिखे नेवाः कलाकार ला कलिउडया स्टारया रुपय् बय्बय् जुया च्वं । अज्यापिं स्टारतय्गु नांजक कायेगु खःसां चर्चा ताहाक जुइ । छगू इलय् तसकं बय्बय् जूम्ह हिरोइन् नम्रता श्रेष्ठ अले आः वया कलिउडया हिरो सलोन बस्नेतलिसे इहिपा जुइगु धका खँ पिहाँ वया च्वंम्ह हिरोइन करिश्मा श्रेष्ठ न्हून्हूगु नां खःसा थ्व ख्यलय् नेपाःया न्हापांम्ह एक्शन स्टार धकाः धयातःम्ह शिव श्रेष्ठ निसें कया थौंकन्हे सुपरस्टार धकाः धयातःम्ह अनमोल के.सी.या लिउ लाना च्वंम्ह हिरो आकाश श्रेष्ठ तकया धलखय् आपालं नेवाः कलाकारपिनिगु नां दुथ्याना च्वंगु खनेदइ । थन अज्यापिं स्टारतय्गु चर्चा यायेत्यनागु मखु । थन कलिउड धकाः धयातःगु नेपाःया फिल्मख्यलय् स्टारया दर्जा कयातःपिं अज्यापिं नेवाः कलाकारपिनिगु चर्चा जुइत्यंगु खः गुम्हेसिनं थःगु मांभाय् नेवाः भाय्या फिल्मय् नं म्हितल ।
थःगु मांभाय् नेवाः भाय्या फिल्म म्हितुपिं कलिउड स्टारतय्गु बारे च्वयेबलय् दकलय् न्हापा लाइगु नां श्रीकृष्ण श्रेष्ठया खः । नेपाःया फिल्मख्यलय् छम्ह रोम्यान्टिक हिरोया इमेज दुम्ह श्रीकृष्ण श्रेष्ठ थौं झी दथुइ मदये धुंकल तर वं त्वःता थकुगु रोमाण्टिक हिरोया छाप अझं फिल्म लभर्सतय्गु नुगलय् स्वच्चाना च्वंगु दनि । थथे छगू छाप त्वता अमर जुया वंम्ह हिरो श्रीकृष्ण श्रेष्ठं म्हितुगु छगुयां छगू नेवाः फिल्म “राजमति” खः । अले वहे फिल्म राजमतिया छाप नं आःतक्क नुगले स्वच्चाना च्वंगु दनि । थ्व फिल्म म्हितुगु इलय् श्रीकृष्ण नेपाःया नांजाम्ह हिरो खः । थ्वहे “राजमति” फिल्मय् म्हितुपिं मध्ये मदनकृष्ण श्रेष्ठ, हरिवंश आचार्य, सुभद्रा अधिकारी निसें कया राजेन्द्र खडगी तकं उगु ईया स्टार खः ।
नेपालय् मह जोडि धका तसकं नांजापिं मदनकृष्ण व हरिवंश मध्ये नं मदनकृष्ण श्रेष्ठ आः तक नं नेवाः फिल्मय् दिपामदिक्क पलाः छिना वया च्वंगु दनि । हरिवंश आचार्य धाःसा “राजमति” लिपा “चाण्डालिका” छगुलिइ जक खनेदत । मदनकृष्ण श्रेष्ठं “राजमति” धुंका “चाण्डालिका” , “तुयुमति” निसें कया आः “कर्म” तक्क खनेदत सा आः याकनं हे “बहिदार बाबु” व “सनाखत” नांयागु फिल्मय् खनेदयेक वयेत्यंगु दु । नेपालया फिल्म ख्यलय् फाइट डाइरेक्शनय् तसकं नांजाम्ह राजेन्द्र खड्गीं लिपा छगू निगु नेवाः फिल्म अंशय् नं फाइट डाइरेक्शन यागु दु तर मेगु ज्या मजुल । अथेहे तु एक्टिंगय् नं नुगः क्वसाम्ह राजेन्द्र खड्गीं “राजमति” फिल्मय् चिकंचा जुया मेन रोल म्हितुगु खःसा लिपा “चिंकंचिया ध्येबा नये थाकु” धका फिल्म दयेकेगु व फिल्मय् मेनरोल म्हितिगु धका नं बय्बय् जूगु खः तर थ्व ग्वसाः नं आः तक न्ह्यावंगु खने मदुनि ।
मदनकृष्ण श्रेष्ठं “कर्म” फिल्मय् ला मेन रोल हे म्हिता नेवाः फिल्म ख्यलय् थःगु पलाः क्वातुका क्यन । थ्वहे “कर्म” फिल्मया हिरोया नां नं कर्म हे खः । कर्म शाक्य नेपाःया फिल्मख्यःया छम्ह लोकंह्वाम्ह स्टार खः । “सानो संसार” नांयागु फिल्मय् नम्रता श्रेष्ठलिसे हिरो जुया म्हितुम्ह कर्म शाक्यया “लुट”, “लभ शाशा”, “अध्याय” व “लुकामारी” लगायतया आपालं फिल्म पिदने धुंकल । थुकथं नेपाःया फिल्म ख्यलय् क्वातुक्क पलाः न्ह्याका वया च्वंम्ह हिरो कर्म शाक्यं दकले न्हापा झिंन्यादँति न्ह्यः “पटाचारा” नांयागु फिल्म म्हितल । बुद्धकलिन बाखनय् दयेकुगु थ्व फिल्मया निर्देशक रामकृष्ण खड्गी खः ।
“कर्म” फिल्म नं निर्देशक रामकृष्ण खड्गीं हे दयेकुगु खःसा थ्व निगु फिल्मया दथुइ पिदंगु कर्म शाक्यं म्हितातःगु नेवाः फिल्म “कृषा गौतमी” या नं निर्देशक रामकृष्ण खड्गी हे खः । निर्देशक रामकृष्ण खड्गीयात नेवाः फिलमय् खस नेपाली फिल्मय् म्हिताच्वंपिं कलाकारतय्त नेवाः फिल्मय् दुथ्याकेगुलिइ नुगः क्वसाम्ह निर्देशक कथं कायेमा । वयागु हे “पटाचारा” फिल्मय् म्हिता कलिउडया लोकंह्वाम्ह हिरोइन मेलिना मानन्धरं नेवाः फिल्मख्यलय् पलाः न्ह्याकल । मखु धइगु खःसा मेलिनायात “राजमति” फिल्म म्हितेत इनाप याःबले मम्हितुगु खँ थन थाय् लुमंके बहजु ।
मेलिना मानन्धरं थ्वया लिपा “कृषा गौतमी”, “बाँला मयजु” व “धम्मवति” नं म्हितल । नेपाली फिल्मया नांजाम्ह क्यारेक्टर एक्टर मदनदास श्रेष्ठ नं “पटाचारा” फिल्मया लुखां हे नेवाः फिल्मपाखे दुहाँ वःम्ह कलाकार खः । रामकृष्ण खड्गीया हे “कृषा गौतमी” फिल्मय् छगू इलय् नेपाःया एक्शन स्टार कथं नांजाम्ह स्टार शिव श्रेष्ठ नं नेवाः फिल्मय् खनेदयेक वःगु खः । शिव श्रेष्ठ थ्व छगू फिल्म धुंका मेगु नेवाः फिल्म म्हीतुगु मदुनि ।
छगू धुंका मेगु नेवाः फिल्म म्हिता च्वंम्ह नेपाःया स्टार धइम्ह धिरेन शाक्य नं खः । छगू इलय् नांजाम्ह स्टार राजेश हमालयात तकं हाथ्या जूम्ह धिरेन शाक्यं हिसिला महर्जन व भिन्तुना जोशीलिसे “त्याग” नांयागु फिल्मय् हिरो जुया म्हितुगु खःसा थ्वहे फिल्मया मेम्ह हिरो विनोद श्रेष्ठ नं नेपाःया खस भाय्या फिल्मय् म्हिता च्वंम्ह हिरो खः । विनोद श्रेष्ठं थ्व लिपा “ब्याहा यायेम्हाः” व “पानबति” लगाएतया फिल्म नं म्हितल । अथेहेतुं धिरेन शाक्यया थ्व धुंकाः “घोषक” पिदने धुंकलसा आः याकनं हे पिदनेगु लँपुइ लाना च्वंगु “सनाखत” फिल्मय् धिरेन शाक्य खनेदइगु जूगु दु । खय्तला यक्वः हे न्हापा धिरेन शाक्यं “छंगु नामय्” नांयागु फिल्म म्हितिगु खँ क्वछिउगु खःसा थ्व फिल्मय् हिरोइनया रुपय् झरना बज्राचार्ययात कायेगु कुतः याःगु खः । झरना बज्राचार्यं “छंगु नामय्” मम्हितिगु जूबले वया थासय् नेपाःया फिल्म स्टार अनु शाहयात कायेगु क्वछिउगु खः तर थ्व “छंगु नामय्” फिल्म धाःसा बने हे मजुल ।
चम्सुरीया नामं नेपाःया स्टार कथं बय्बय् जूम्ह पल्पसा डंगोलं आपालं नेवाः फिल्म म्हितुगु दु । वहे पल्पसा डंगोलं निर्माण याःगु “सत्य धरोधर्म” नांयागु फिल्मय् कुन्जना घिमिरें छगू मेन रोल म्हितुगु दु । धुर्मुस सुृन्तली धका तसकं लोकंह्वाःगु जोडिया छम्ह कुन्जना घिमिरें थ्व “सत्य धरोधर्म” फिल्म म्हितुगु इलय् तक इपिं थथे धुर्मुस सुन्तली धका लोकं ह्वाये मलानिगु ई खः । लिपांगु इलय् पल्पसा डंगोलं व्याहा यानागु लच्छी मदुनी नांया प्याखँ घोषणा यानाः सुटिंग नं न्ह्याकुगु खः तर प्याखँ धाःसा पुमवंनी ।
नेवाः संकिपाः ख्यलय् मेगु ल्वमंके मज्युम्ह स्टार खः रवि डंगोल । रवि डंगोलं नेपालभाषाया संकिपा याँ मिखां नेवाः प्याखनय् पलाः तःगु खःसां थ्व सिबें यक्व हे न्ह्यः निसें रवि डंगोल टेलिसिरियलय् लोकं ह्वाये धुंकुगु खः । रवि डंगोलं थनं लिपा व मिसा, कुलांगार, प्याखँ निर्देशन यानाः म्हिता नं दिगु खःसा, थ्व ला ग्यानापु स्टाइल प्याखँ नं म्हीतुगु खः ।
छु छु नेवाः फिल्मय् नेपाःया सु सु स्टार म्हितल धइगु चर्चा यायेबले आपालं अज्यागु नां लुया वइतिनि । थन थुलि थासं गाइ नं मखु । उकिं छुं छुं नांयात दसु कथं जक न्ह्यब्वयेगु कुतः थ्व च्वसुलिइ जुउगु खः । थथे चर्चा याना यंकेबले लुमंसे वइगु छगू नां प्रेरणा शर्माया नां खः । प्रेरणा शर्मा “अंश” फिल्मय् छपू आइटम डान्सय् म्हितुगु दुसाः सुषमा कार्कीं “तिन तिकः महाबिकः” फिल्मय् आइटम डान्स याःगु दु । सुषमा कार्की धइम्ह नेपाःया फिल्मख्यलय् आइटम डान्सया निंतिं हे नांजाम्ह स्टार खःसा “लुट” फिल्मय् “उघ्रेको चोलि” आइटम डान्सया कारणं तसकं बय्बय् जूम्ह स्टार खः ।
थथे नेवाः फिल्म म्हितूपिं नेपाःया स्टारया बारे चर्चा यायेबले थुकिया अखतं न्ह्याकुपिं छुं छुं कलाकारया नां च्वयेबले दकले न्ह्यनेलाइगु नां “सिलु” या हिरो जय श्रेष्ठ व हिरोइन नबिना श्रेष्ठया नां खः । जय श्रेष्ठं लिपा वना “रक्षा”, नांयागु फिल्मया नापनापं “कलाकार” व “जीवन यात्रा” नांयागु नेपाली भिडियो फिल्मय् नं हिरो जुया म्हितलसा नबिना श्रेष्ठं “पिरती”, “पछ्यौरी” व “माया” नांयागु तधंगु फिल्मया नापनापं “रहस्यमय गुफा” लगाएतया छुं छुं भिडियो फिल्म म्हितल । अथेहेतुं नेवाः फिल्मख्यलय् तसकं लोकंह्वाःपिं हिरोइन मध्ये आशिष्मा नकःमिं “अन्तराल”, “अधकटी”, “मेला”, “बाटो मुनिको फूल” थेंजागु आपालं म्हितलसा भिन्तुना जोशीं नम्रता श्रेष्ठलिसे “मेघा” फिल्मय् सपोर्टिंग रोल व “भ्रम” फिल्मय् मेन रोल म्हितल । थुकथं नेपाःया फिल्मय् नेवाः स्टार व नेवाः फिल्मय् नेपाःया स्टारतय्गु यात्रा न्ह्याना च्वंगु खनेदु ।
