मातृभाषा पत्रकारीता व थौंया अवस्था विषय छगू गोष्ठी जूल। येँ महानगरपालिकाया उप–प्रमुख सुनिता डंगोलं ज्याझ्वः उलेज्या यानादीगु खः । उप–प्रमुख सुनिता डंगोलं मांभासं पत्रकारिताया यानाच्वंगु च्वछायेबहःजूगु व भाषा नापनापं लिपिया नं विकास यायेमाःगु खँय् बः बियादिल । गुलिखे मनूतयसं भाय् व लिपि बिस्कं धकाः थुइकेगु यानाच्वंगुलिं अथे मखुसे भाय् व लिपि नापनापं यंकेमाःगु धयादिल ।
ज्याझ्वलय् राकेश महर्जनं च्वयादीगु “आम सञ्चार व नेपालभाषाया पत्रकारिता” सफूनं बिमाेचन जूगु खः । पत्रकारिताया विषयया नेपालभाषाया स्नातक तहया पाठ्यक्रमय् दुथ्याःगु थुगु सफू उप–प्रमुख डंगोललिसें पाहाँपिं सकसिनं मंकाः कथं चिखिफ्यनादीगु खः ।
पत्रकार मनोजरत्न शाहीं छायाँङ्कन व निर्देशन यानादीगु विश्व सम्पदा धलखय् लाःगु “स्वयम्भु”या वृत्तचित्रया नं उप–प्रमुख डंगोलं सार्वजनिक यानादीगु खः ।
ज्याझ्वलय् नेपालभाषा, मैथिलि, लिम्बू, तामाङ, राजवंशी, मेचे, संस्कृत, शेर्पा, थारु आदिसहित झिंन्यागू भायया पत्रकारिताया अवस्थाबारे कार्यपत्र न्ह्यब्वःगु खः ।
व नेवाः पत्रकार राष्ट्रिय दबू, येँ कचां पिथंगु निगुलिं कृति खःसा नेवाः पत्रकार राष्ट्रिय दबू, येँ कचाया ग्वसालय् जूगु ज्याझ्वः ग्वसाः खलःया नायः अर्बिन्द्रनमान सिंहया सभापतित्वय् जूगु खःसा सुष्मा महर्जनं ज्याझ्व: न्ह्याकादीगु खः ।
