व मनू सु मनू

इभेन्ट
नेपालभाषाया म्यूजिक भिडियोया प्रिमियर ज्याझ्वः, छगू बिस्कं स्वरुप कथं न्ह्यानाच्वंगु दु । नेपालभाषाया म्युजिक भिडियो नं संकिपाया प्रिमियर थें हे सिनेप्लेक्सय् प्रिमियर यायेगु प्रचलनया शुरुवात जुयावगु दु । नेपालभाषाया मनोरंजन इण्डस्ट्री कथं पलिस्था याना वनेगु निंतिं थुगु कथंया ज्याझ्वलं छगू मोड हइगु निश्चित दु । नेपालभाषाया म्यूजिक भिडियो गनं नं रेष्टुरेन्ट वा गनं छगू भवनय् छगू स्क्रीन तयाः क्यनेगु जक न्हापा न्हापा जुयाच्वंगु खः तर संकिपाया सहि थाय् धैगु सिनेमा हल हे खः धैगु मानसिकता आः बिस्कं हे विकास जुयाच्वंगु दु । मनोरंजन क्षत्रयानिंतिं थुगु बिचाःया विकास जुइगु तसकं हे सकारात्मक खँ खः । म्यूजिक भिडियो किर्तिपूर सिनेप्लेक्सय् प्रिमियर याःगु खः ।

टिजर व प्रचार प्रसार
व मनू सु मनूया टिजर सार्वजनिक जुसां निंसें हे छगू कौतुहलता सकलसिया मनय् ब्वलंगु खः कि थुगु म्येय् छुं कथंया विशेष खनेदु । टिजरय् दयेमाःगु खँ व मनू सु मनूया टिजरय् खने दु । अकसर यक्वस्यां टिजर व प्रोमो बारे ध्वाथुइके मफू तर थुगु म्येया टिजरय् धाःसा छगू टिजर कथं न्ह्यब्वयातःगु दु । मगन इन्टरटेन्मेन्टया टिजरय् गुलि क्यनेमाःगु खः उलि हे सिमित यानातःगु दु । टिजरया नामय् प्रोमो दयेकातःगु मदु । उकथं हे व मनू सु मनूया प्रचार प्रसारय् काउन्टडाउन कथं न्हिंया न्हिथं हे प्रचारय् वयाच्वंगु खः ।

व मनू सु मनू -चरित्र
व मनू सु मनू म्यूजिक भिडियो छम्ह सर्व साधारण मनूयात केन्द्रीत याना दयेकातःगु म्यूजिक भिडियो खः । किपूलिइ च्वना तसकं हे साधारण जीवन न्ह्याकाच्वंम्ह छम्ह सामान्य मनूया बिषयलय् निर्माण यानातःगु म्यूजिक भिडियो खः । किपुलिइ भरिया ज्या याना वयाच्वंम्ह व सकस्यां हे ‘बिजय’ वया नां धकाः म्हस्यु । व थः तसकं हे गरिब सां तसकं इमान्दारम्ह मनू कथं किपूलिइ परिचित जू । तर व सु खः गनं वःम्हं आदि इत्यादि खँ सुनां नं ध्वाथुक्क मस्यू । अय्नं सकलें वयागु इमान्दारीता खनां प्रभावित । वैत सुनां दया माया तइगु नं मयः । थः तसकं गरीब सां सुयाकें कायेगु सिबें नं थःके छुं दुसा व नं उसिं मचासे बिइ फुम्ह छम्ह मनू धकाः क्यनातःगु दु। उकिं व मनू सु मनू धकाः सकस्यां चर्चा याना जुइगु । बिजयया बारे यक्व हे बाबांलाःगु खँ समाजय् प्रचलित जुसां निर्देशक रजिन महर्जनं धाःसा थुगु म्यूजिक भिडियोस काल्पनिक खँ नं दुथ्याकातैगु खँ कनादीगु दु । कारण, बिजयया बारे सुनां नं बांलाक्क मस्यू । थुम्ह चरित्रया धात्थें हे च्वंक जीवन्त व सजीव अभिनय याःम्ह नेपालभाषाया कलाकार खः लक्ष्मीकुमार महर्जन। लक्ष्मीकुमार महर्जनया अभिनयलय् गनं ओभर एक्ंिटग मदु । अतिकं जीवन्त रुपं यानातःगु अभिनय् प्रसंशनीय जू । नेपालभाषा ख्यःया छम्ह सशक्त कलाकार खः धकाः छगू म्यूजिक भिडियोलं हे क्यने फइ धैगु धारणा नं विकास जुयावनीगु खनेदु। मू कलाकारयात सर्पोट यायेगु निंतिं मेपिं कलाकारपिं नं थःगु चरित्रय् दुने च्वना यक्व हे तिबः बियाच्वंगु थुगु म्यूजिक भिडियोलय् खंके फइ ।

मेमेगु पक्ष
म्युजिक भिडियोया मेमेगु पक्ष कथं प्याखँया सम्पादन सशक्त जु । अथे हे मेकअप नं तसकं हे जीवन्त जू । कलर करेक्शन बांलाः जु । मुलत कलर करेकशनय् स्कीन टोनयात ध्यानय् तयातःगु दु । अकसर कलर करेक्शनया नामय् कलाकारया ख्वाःया टोन हे स्यंक झः झः धायेकेगु प्रचलन दु, गुकियात थुकी नालातःगु मदु । थ्व बांलाःगु पक्ष खः।

निर्देशन
निर्देशक रजिन महर्जनं नेपालभाषा ख्यलय् पलाः न्ह्याकुगु यक्व मदुनी । तर वय्कलं गुलि नं थःगु कृति त दयेकादीगु दु उगु म्यूजिक भिडियो पाखें नेपालभाषा ख्यलय् आः छुं बांलागु वा नेक्स्ट बिग थिंग छुं वइन धैगु संकेत बियाच्वंगु दइ । वय्कःया न्हापांगु नेपालभाषाया चिहाः संकिपा म्यूजियम हे जुइमा वा खस भाय्या शर्ट फिल्म सदय जुइमा छुं नं छुं आः न्हूगु पह दुगु वा सशक्त रुपं न्ह्यानाच्वंगु वय्कया प्रावधिक ज्याखँ खनेदयाच्वनिं । व मनू सु मनूया प्रस्तुति करण नं तसकं हे शसक्त रुपं खने दु । नेपालभाषाया म्यूजिक भिडियो ख्यलय् रजिन महर्जन पाखें यक्व हे आशयाये बह जु । विशेषत चरित्र निर्माणय् यानातःगु महेनत व फ्रेमिंग त सामान्य नेपालभाषाया म्यूजिक भिडियो सिबें तसकं पाः । प्याखनय् सु चरित्रयात गुलि स्पेश बिइमाः धैगु खँ निर्देशक रजिन महर्जनया प्याखनय् खने दयाच्वनिं ।

आलोचना
म्यूजिक भिडियो संवाद पाखें न्ह्याकेगु प्रचलन आपा दु । थुकी संवाद मखुसां सुत्रधार (Narrator) पाखें न्ह्याकातःगु दु । म्युजिक भिडियोया परिकल्पनाय् संवाद बिनां भिडियो पाखें जक ब्वये फुसां नं थुकी छम्ह निर्देशकया परिकल्पना अझं सशक्त जुइ । तर थौंकन्हे नेवाः शर्ट मूभी घाःसां ५ मिनेटय म्ये छपू नं घाके माः धैगु मानसिकता ब्वलने धुंकल । थुकीयात ह्युपा धायेगु खः वा छु धायेगु खः बहस याये आवश्यक जू । म्यूजिक भिडियो खःसा संवादया आवश्यकता छाय् दु ? अले शर्ट मूभि दुसा उकी म्येया आवश्यकता छाय् थुकीयात छगू एकेदेमिक बहस आवश्यक जू ।

म्यूजिक भिडियोस बाखँ प्रस्त मजू । छम्ह नये मखंम्ह मनू, ज्या मयाःसे वेँय् थें जुयाच्वंगु न्ह्यब्वयातःगु दु । वैके ध्यबा मदुगु नं मखु । भौतिक वादपाखें तापाना च्वंम्ह थें चित्रण जुयाच्वंगु दु। बाखं चिलंच्व जःखः व भन्ते, चिभाः चैत्य क्यनातःगु कारण थ्व बुद्धधर्मया प्रभावित खनेदु तर वं भन्तेनं बिस्कुट ब्यूगु नं नयाः मवं । थःके दुगु ध्येबा नं वं मेपिन्त बिइ । भौतिकवाद पाखें तापाना वनेत, मोह माया पाखें तापाना वनेगु शिक्षा बुद्ध धर्मं बियाच्वंसा म्यूजिक भिडियोया चरित्र धाःसा थुपिं नितां खँ तापाना वंगु दु । मानसिक व शारिरीक रुपं विक्षिप्त जूपिं मनूतय् उदार यायेगु निंतिं बुद्ध धर्म खः धकाः झीसं स्यु तर म्युजिक भिडियोया बाखं थुगु दृष्टिं कनफ्लिक्ट खनेदु । शायद थुकी भन्तेया एंगल आवश्यक मजूगु जक खःला ?

संगीत
व मनू सु मनू म्ये हालादीम्ह राजेन्द्र डंगोलं हाःगु खःसा म्ये भुवन महर्जनं च्वयाः कम्पोज यानातःगु दु । म्येया संगीत संयोजन सुरेन्द्र श्रेष्ठं संयोजन यानातःगु दु । म्येया संगीत संयोजन फ्युजन कथं यानातःगु दु । म्ये ग्वलय् सामान्य विवरण जक न्ह्यब्वयातःगु दु । भचा शसक्त रुपं थुगु म्येया च्वसा न्ह्याकेफइगु अवस्था दुगु खः। संगीत कर्णप्रिय जू । म्येया भाव म्यूजिक भिडियोलं जीवन्त याना ब्यूगु दु ।

लिखँ
किपूया छम्ह सामान्य मनूया बिषय थुगु कथं म्यूजिक भिडियो हे निर्माण यायेगु छगू न्हूगु प्रयोग खः । अकसर म्यूजिक भिडियोलय् निम्ह मतिनामि वा छखें जक न्ह्यानाच्वंगु म्यूजिक भिडियो वा छुं च्वः प्वः मदूगु डान्स स्टेप तयाः नेपालभाषायाया म्यूजिक भिडियो निर्माण यनाच्वनिं तर ह्यूपा कथं आ मतिनाया योग वा बियोग सिबें नं छम्ह सामान्य मनूया चरित्रयात कयाः निर्माण जूगु म्यूजिक भिडियो कथं व मनू सु मनू पिदंगु दु । नेपालभाषाया म्यूजिक भिडियोस अझं नं आपलं हे विषयवस्तु दनिं धैगु खँ थुगु म्यूजिक भिडियों न्हयब्वयाच्वंगु दु ।