नेवाः फिल्म सोसाईटीया ग्वसालय् भिडियोग्राफी कार्यशाला क्वचाःल । नेवाः फिल्म साेसाइटीं यलया स्कूल अफ फिल्म मेकिङय् स्वन्हुयंक भिडियोग्राफी सम्वन्धि कार्यशालाया ग्वसाः ग्वःगु खः । समापन ज्याझ्वःलय् कार्यशालाय् विशेष यानाः ल्यायम्हतय्त नेपालभाषा ख्यलय् दुकायेगु लक्ष्य तइगु खँ कनादील । अथेहे वइगु श्रावण ६ गते नेवाः फिल्म सोसाइटीं कलाकार मुना ज्याझ्वः यायेत्यनागु व उगु हे ज्याझ्वलय् स्वंगू महत्त्वपूर्ण विषय घोषणा यायेत्यनागु जानकारी नं राजोपाध्यायं बियादिल ।
मंगलबाः जूगु कार्यशालाया समापन ज्याझ्वलय् आदिवासी जनजाति चलचित्र महासंघया नायः अमृत सुनुवारं सहभागीतयत दसिपौ लःल्हानादिल । ज्याझ्वलय् न्ववासें नायः सुनुवारं महासंघया हे पहलय् मातृभाषी संकिपाया निर्माण इजाजत कायेत चलचित्र विकास बोर्डय् छुं सहुलियत सुविधा कायेखंसां मातृभाषी संकिपाया नितिं सेन्सरलिसेंया प्रकृया अझं झन्झटं जाःगु धयादिल । मातृभाषी संकिपाया लागिं बिस्कं हे आदिवासी जनजाति चलचित्र सेन्सर बोर्ड गठन यायेत अथवा आःया सेन्सर बोर्डया संरचनाय् मातृभाषी संकिपाया लागिं बिस्कं ढाँचा दयेकेत थःपिन्सं माग यानावयागु सुनुवारं जानकारी बियादिल ।
सोसाईटीया निवर्तमान नायः लुःजः सिंहं कार्यशालाय् सयेकागु सीपयात छ्यलाः समुदाययात लबः बीत प्रशिक्षार्थीतयत इनाप यानादिल । असार १९ निसें २१ गतेतक्क जूगु कार्यशालाय् मुक्कं झिम्हेसित प्रशिक्षक बिशाल राजभण्डारीं प्रशिक्षण बियादीगु खः । ज्याझ्व नेवाः फिल्म साेसाइटीया काेषाध्यक्ष सुनीता श्रेष्ठं न्ह्याकादीगु खः ।
