येँ महानगरपालिका वडा नं २७ या कार्यालय भवन शिलान्यास नगर प्रमुख विद्यासुन्दर शाक्य र उपप्रमुख हरिप्रभा खड्गीं मंकाः शिलान्यास यानादिल । महानगरपालिकाया ३ करोड ७९ लाख २७ हजार ७१८ लागतय् ज्याथाया छुस्याबहाः न्ह्योने थुगु भवन दयेकेत्यंगु खः ।
ज्याझ्वलय् मेयर शाक्यं येँ महानगर दुने दक्व धैथे वडा भवन दयेकेधुनागु व छुं शिलान्यास यानाच्वनागु खँ कनादीगु दु । न्हापाया हे निर्णय कथं येँ दुनेया फुक्कं हे वडा भवन दयेकेगु व कार्यान्वयन जुयाच्वंगु खँ कुलादिल । कोठा मगाःथाय् नं क्वथा थप यायेगु , भवनया निंतिं जग्गा मगाःसा जग्गा हे न्यायेगु व गुं गुं वडा भवन स्थानीय लिसे सहकार्य यानां नं निर्माण यानाच्वनागु खँ कनादील ।
‘आः निर्माण जुयाच्वंगु व संचालनय् वयाच्वंगु वडा भवन प्रविधि मैत्री, यात्रु मैत्री, प्रतिक्षालय्या नं उचित व्यवस्थापन जूगु व कर्मचारीया व्यहार व आचरणय् नं परिवर्तन वःगुलिं फुक्कं हे सेवाःग्राही लयताः ।’ नगर प्रमुख शाक्यं कनादील ।
ज्याझ्वःलय् उपप्रमुख हरिप्रभा खड्गी श्रेष्ठं धयादील – ‘जन्तां थःगु अमुल्य मत बियाः जिमित थनतक्क थ्यंकुगु खः । जिमिसं सकसिगु समस्या समाधान यायेगु हे ज्या खः ।’
भवन निर्माणया विषयलय् वडाध्यक्ष चिनियामान बज्राचार्यंं भ्याटसलिसें वडाकार्यया लागत अनुमान ३ करोड ७९ लाख २७ हजार तकाः याःगु व श्री ज्याथा युवा तथा सामाजिक विकास क्लब तथा स्थानीय क्लबतय्सं भवन निर्माणया लागि जग्गा उपलब्ध यानादीगुलिं सुभाय् देछाना दिल ।
भवनया डिजाइनर आर्किटेक्ट अमित बज्राचार्यया कथं भवन जमिन तल्ला सहित ६ तल्ला जुइ । सम्पदा मैत्री जुइक निर्माण जुइगु उगु भवनया भूमिगत तल्लाय् पार्किङ् जुइ । अपांग मैत्रीया निंतिं भवन निर्माणपश्चात लिफ्ट नं जडान जुइ । पाँचौँ तल्लाय् सभा कक्ष जुइ अले भवनया निर्माण अवधि ९ महिना जुइ अर्थात ०७९ पुस ३० गते तक्क सम्पन्न जुइ ।
