पेजथ्री बाःछिपौया न्हापांगु अंक २०६२ नेसं ११२६य् पिदंगु खः । थुगु हे यात्राया निरन्तरता कथं थौंया तिथिइ तक्क थ्यंगु इलय् पेजथ्रीया थ्यंल्याः ३५१ थ्यने धुंकल । थ्यंल्याःया ल्याखं थ्व छगू अंक हे जक खःसां नं थुलि यात्रा तक्क पेजथ्री पत्रिकापाखें छु छु माइल स्टोन पार याना वंगु दु धकाः स्वयेगु आवश्यक दु छाय्धाःसां यात्रा जक निरन्तर बिया वनेगु सिबें थुगु यात्रां गज्योगु मोड पार याना वन व गज्योगु उपलब्धी दत धकाः स्वये मा मखुसा यात्रा यात्राय् हे जक सिमित जुयाः च्वनिं ।
पेजथ्री पत्रिकाया मू आज्जु धैगु हे नेपालभाषाया मनोरंजन ख्यःयात गतिशील याना वनेगु खः । पत्रिका पाखें मनोरंजन क्षत्रया गतिविधीयात कःघानां जक मगाः नेपालभाषा मनोरंजन क्षेत्रयात गतिशिल यायेगु निंतिं पत्रिका थः हे सक्रिय जुयाः वनेमाः धकाः थी थी गतिविधिइ संलग्न जुयाच्वंगु पत्रिका खः । थुकीया दकलय् तःधंगु उपलब्धी धैगु हे नेपालभाषाया मनोरंजन ख्यःया इतिहासय् न्हापांखुशी म्ये, म्युजिक भिडियो व संकिपाया छक्वलं अवार्ड बिइगु ग्वसाः ग्वयाः पेजथ्री पिपल्स च्वइस अवार्ड ११३०या शुरुवात यानागु खः । थुगु हे अवार्डंया प्यंगूगु संस्करण आः न्ह्यानाच्वंगु दु सा पेजथ्री अवार्ड ११३०, ११३३, ११३७ याना मुक्कं स्वंगु संस्करण पू वनेधुंकुगु दु ।
अवार्ड जक मखुसे पेजथ्री पत्रिकाया हे संलग्नताय् स्वंगु शर्ट मूभी नं तयार जुइधुंकुगु दु । थुगु स्वंगु शर्टमूभी द मिथ(११३४), द मिथ जीरो (११३८) व इन्द्रायणी (११३९) तयार जूगु खःसा थुपिं स्वंगुलिं प्याखँ धेंधेंबल्ला याना सिरपा त्याकेत ताःलागु प्याखँ खः । द मिथ संकिपा मच्छिन्द्र क्लबं ग्वसाः ग्वःगु नेपालभाषाया संकिपा नखलय् न्हाप लाःगु ख । द मिथ ० नेपालभाषा चीहाः संकिपा कासा ११३८य् ब्वति कयाः ल्यू लाःगु खःसा इन्द्रायणी नेपालभाषा चीहाः संकिपा कासा ११३९य् लियांल्यू लाःगु संकिपा खः ।
उकथं हे नेपालभाषाया मनोरंजन ख्यलय् मेगु छगू महत्वपूर्ण ज्याझ्वः बुदिंया म्येकासा नं खः । पेजथ्रीया ग्वसालय् लोकलसय् दुगु सुरजवीर बज्राचार्यं हालातःगु बुदिंया भिंतुना म्ये कासाया कभर म्ये धेंधेंबल्ला कासा जूगु खः । थुगु कासाय् मुक्कं १२१ म्येहालामिपिनि ब्वति दुगु खः । थुगु कासाया उपलब्धी कथं न्याम्ह उत्कृष्ट कासामि दुथ्याकाः आर्टोम्युज स्टुडियो पाखें सिरपा नांया एल्बम हे पिकाःगु दु । हःपाःया ल्याखं थथे न्हूपिं म्येहालामिपिन्त म्ये हायेकाः म्येचाः हे पिकायेगु ज्याखँ नेपालभासा ख्यलय् म्हो हे जक जुइगु याः ।
पत्रिका प्रकाशनय् सिमित जुयां जक मगाः नेपालभाषाया मनोरंजन ख्यःयात गतिशिल याना यंके माः धैगु खँय् न्ह्याः वनाच्वंगु थुगु यात्राय् पेजथ्री स्वप्न सुन्दरी लिसे छझाः, पेजथ्री स्टाय्ण्ड अप कमेडि, पेजथ्री सेलेब्रेटी फुटसल ज्याझ्वः नं यायेधुंकुगु दु ।
गुलि नं गतिविधी जुयाच्वंगु दु व फुक्कं हे नेपालभासाया मनोरंजन क्षत्रय् समर्पित जुयाच्वंगु दु । थगु यात्रां निरन्तरता कयाच्वनिं धकाः विश्वास नं बियाच्वनासा सकलसिनं नेपालभासाया मनोरंजन ख्यःयात हःपाः नं बियाच्वनिं धकाः भलसा नं कयाच्वना ।
