येँ महानगरपालिका १७ वडा स्थित छत्रपाटी निःशुल्क चिकित्सालयया न्हूगु अत्याधुनिक सुविधा सम्पन्न अस्पताल भवन निर्माणया निंतिं शिलान्यास याःगु दु । छत्रपाटी निःशुल्क चिकित्सालय अस्पतालय् ‘माउ बद्रि भवन’या नामं येँ महानगर मेयर विद्यासुन्दर शाक्य, उपमेयर हरिप्रभा खड्गी, श्रेष्ठ, १७ वडाया वडाध्यक्ष नविन मानन्धर व अस्पतालया अध्यक्ष डा. मनोजमान श्रेष्ठं मंकाः कथं भूमि पुजा यानादीगु खः। मंकाः कथं शिलान्यास याना दिगु खः। क्षेत्रपाटीइ १० आना १ दाम जग्गा करीब ३५ करोड तकाया लागतय् अस्पतालया न्हूगु भवन दयेकेत्यंगु खः।
ध्यबाया कारण सुं नं वासः याये मखंक च्वने म्वाले माः धकाः निस्वनातःगु छत्रपाटी निःशुल्क चिकित्सालय निंस्वंगु खः । अस्पतालय् आः २४ घौ हे इमर्जेन्सी, शल्यक्रिया, जनरल वार्ड, आइसीयू, भेन्टिलेटर, प्याथोलोजी ल्याबलिसें दक्वं कथंया सामान्य व विशेषज्ञ स्वास्थ्य सेवा न्ह्यानाच्वंगु दु।
न्हूगु अत्याधुनिक माउ बद्री भवन निर्माणया निंतिं येँ महानगरपालिकां नं ग्वहालि यागु दु । येँ महानगरपालिकां ५ करोड तका रकम ग्वहालि यानागु खँ मेयर विद्या सुन्दर शाक्यं कनादीगु खः । थ्व लिसें अस्पतालया आन्तरिक आय व दातापिंपाखें वइगु ग्वहालि धेबा छ्यलेगु अस्पतालया अध्यक्ष डा. मनोजमान श्रेष्ठं धयादिल। डा. मनोजमान श्रेष्ठं मेगु वालंनिसें न्हि सच्छि सिलिण्डर अक्सिजन उत्पादन क्षमताया प्लान्ट स्थापना यायेत्यनागु जानकारी नं बियादिल।
