विश्वन्यंकं महामारीकथं न्यनाच्वंगु कोरोनाभाइरसया सुरुवात चीनया उहान शहरं जूगु खः । थ्व हे कारण विश्वया आपालं देशं चीनपाखे हे न्ह्यसः थनाच्वंगु दु । चीनं थुपिं फुक्क आरोपया खण्डन यानावयाच्वंगु दु । थ्व हे दथुइ कोरोनाभाइरसया विषयस अनुसन्धानय् सक्रिय छम्ह चीनी अनुसन्धानकर्तायात गोलीं कयेकाः हत्या यानाब्यूगु दु ।
पिट्सबर्ग मेडिकल सेन्टरय् ज्यायानाच्वंम्ह अनुसन्धानकर्ता डा. बिंग लिउं कोरोनाभाइरसया विषयस तःजिक अनुसन्धान यानाच्वंगु खः । बिंग लिउ थःगु उपलब्धि सार्वजनिक यायेगु तयारी यानाच्वंगु खः । तर, वं थःगु उपलब्धि सार्वजनिक याये मखंक हे वयात गोली कयेकाः हत्या यानाब्यूगु खः । थ्व नापं वं छु धायेत स्वःगु खः व वं याये धायेत्यंगु खँ सार्वजनिक जुइ मफयेवं थ्व विषयस आपालं न्ह्यसः ब्वलनावःगु दु ।
चिनीया मूलया मनू बिंग लिउयात गोलीं कयेका स्याना ब्यूम्ह मनुखं लिपा थःत हे गोलीं कयेकाः आत्महत्या याःगु दु । ३७ दँया बिंग लिउ याकःचा दुगु इलय् रस इलाकाया वयागु अपार्टमेन्टय् दुहाँ वनाः छम्ह मनुखं वयात गोलीं कयेकूगु खः । लिउया छ्यँनय्, गपतय् व म्हय् गोली लानाच्वंगु लूगु खः गुकिं याना व घटनास्थल मदुगु खः ।
रिपोर्टकथं गुगु इलय् आक्रमणकारी वयागु छेँ वःगु खः, उगु इलय् डाक्टरया कलाः छेँ मदु । युनिभर्सिटी अफ पिट्सबर्ग मेडिकल सेन्टरं रिसर्चर लिउया मदसगु खँय्् बिचाः हायेकूगु दु सा वंकोरोनाभाइरसया विषयय् तःधंगु हे मालेज्याया लिच्वः लिक्क थ्यंगु व याकनं हे थुकिया वासः मालेत न्ह्यचिले त्यंगु धाःगु खः ।
बिंग लिउ युनिभर्सिटी अफ पिट्सबर्ग मेडिकल सेन्टरया कर्मचारी खः । वयात गोलीं कयेकाः स्यानाब्यूम्ह नं छम्ह चिनिया हे खः । बिंगया हत्या यायेधुंकाः हाओ गू नांया उम्ह मनुखं नं थःत हे गोलिं कयेकाः आत्महत्या याःगु खः । हाओ गू बिंग लिउच्वंगु हे थासय् वनाः हत्या यानाब्यूगु खः ।
बिंग लिउ व हाओ गू थःथःवय् म्हस्यूपिं खः । इपिं निम्हं चीन मूलयापिं खः ।
पुलिस अधिकारीतय्गु दावीकथं थुगु हत्या व आत्महत्या प्रकरणय् कोविद – १९ अनुसन्धान सम्बन्धी छुंकथंया हे स्वापू मदु । थ्व हत्या व आत्महत्या प्रकारण त्रिकोण मतिनिाया लिच्वः खः धयागु दावी पुलिसया दु ।
थ्व हत्या आत्महत्या प्रकरणय् आः विश्व ब्यापिरूपय् न्यनाच्वंगु कोरोनाया उत्पत्ति विषय चर्चाय् वयाच्वंगु ‘षड्यन्त्र सिद्धान्त’या भूमिका दुगु दावी चीनया बुद्धिजीवितय्गु द । विश्वब्यापी महामारी रूपय् न्यनाच्वंगु कोरोना भाइरस कोभिद् १९ या उत्पन्न चीनया उहान सहरय् जूगु व थ्व थुगु हे लागां मेमेगु देशय् न्यनावंगु धकाः धयातःगु दु । थ्व आरोपयात चीन सरकारं खण्डन याना वयाच्वंगु दु । चीनया दावीकथं कोरोना भाइरसया उत्पादन अमेरिकां जूगु व थुगु भाइरस अमेरिकी खेलाडीतय्सं चीनय् हःगु धाःगु दु । कोरोना भाइरस कोविद – १९ या उत्पत्ति विषय चीन व अमेरिका दोषी जूगु आरोप निगुलिं देय्या राजनीतिज्ञ व विज्ञतय्सं छम्हं मेम्हेसित यानावयाच्वंगु दु । तर थुकिया पुष्टि निगुलिं देशं याये फयाच्वंगु मदु ।
पिट्सबर्ग मेडिकल सेन्टरय् ज्या यानाच्वन चीन मुलया अनुसन्धानकर्ता डा. बिंग लिउं कोरोनाभाइरसया विषयय तःधंगु मालेज्या यानाच्वंगु दावी सकसियां दु । व हे अनुसन्धान अन्र्तगत डा. बिंगं थ्व भाइरसया उत्पत्ति विषय महत्वपूर्ण तथ्य लुइकूगु व थुकि अमेरिकाया ल्हाः दुगु कारणं हे वयागु हत्या जूगु खः धयागु सिद्धान्त नं चर्चाय् दु ।
थ्व हत्या आत्महत्या काण्डय् डा. बिंग लिउया कोरोनाभाइरस सम्बन्धी अनुसन्धाननाप ‘सून्य स्वापू’ दुगु रोस पुलिसया दावी दु । रोस पुलिसं थ्व हत्या आत्महत्या त्रिकोणात्मक मतिनाया दावी याःगु दु । तर थुगु विषय रोस पुलिसं मेगु विवरण बीत अस्वीकार याःगु दु व बिंग लिउ व हाओ गू दथुया स्वापूयात कयाः नं जिम्मेवारीपूर्वक लिसः ब्यूगु मदु ।
थ्व घटनाया इलय् डा. बिंग लिउ छेँय् याकःचा हे दुगु खः अले वय्कःया कलाः छेँ पिने वनाच्वंगु खः । हाओ गू लिएया निवासय् वना हे गोलिं कयेकाः हत्या याःगु खः । हत्या लिपा हाओ गू छेँ नं पिहाँ वयाः २०० मिटर तापाक्क दिकातःगु मोटरय् च्वनाः थःत हे गोलिं कयेकाः आत्महत्या याःगु खः ।
