संकिपाया संसार गजब जुइ । गनं काल्पनिक खयाः नं फुक्कं हे सत्य जुयाच्वनिं गनं सत्य जुयाः नं घटना काल्पनिक जुयाच्वनिं । न्ह्यागु न्ह्याक्व हे धाःसां संकिपाया मू उद्देश्य धैगु हे मनोरंजन जुयाच्वनिं अले मनोरंजनया माध्यमं छुं कथंया चेतना, छुं कथंया सन्देश वा छुं कथंया तथ्य नं न्ह्यब्वयाच्वंगु दइ । कोरोनाभाइरसया कारण संसार न्यंक हे त्रासया वातावरण ब्वलनाच्वंगु दु । झीथाय् नं थज्योगु हे लकस ब्वलनाच्वंगु दु । तर कोरोनाभाइरस थन दुहांवःगु इलय् अनेकौं घटना नं जूगु दु ।
थज्योगु छगू घटनां झी दुने हे सदभावया समस्या ब्वलंकुगु खनेदत सा थुगु हे घटनायात नेपाःया थीथी संचार माध्यमं भारतीय संचारमाध्यमं थें लँपुलिनाः अतिरंजित यायेत नं स्वल । कोरोनाभाइरसया अतिरंजित थुगु सामान्य घटनां छखें छेँ थुवाः व बालंच्वपिनि दथुया स्वापूयात फायेत झीथाय्या मूलधारया पत्रकारीतां नं स्वःगु खने दु। किपूया छगू वडाय् जूगु थुगु घटनां वडा जक सिमित मजुसे छगू पक्षीय जक खँ मूलधारया संचारय् खने दत । अझ लिपा वनां थुगु ल्वापू न्हापा छेँ थुवाः व छेँ बालं च्वपिनि दथुइ जूगु खःसा लिपा वनां मूलधारया संचार माध्यम व स्वनिगःया नेवाःतय् दथुइ जूवन । अन्तय् थुगु घटनां कानूनी रुप कासें निगू पक्ष दथुइ आ उच्च निकाय्लय् उजूरी लानाच्वंगु दु ।
सामाजिक रुपं जूगु थुगु घटनायात आः वयाः इन्टरटेन्मेन्ट नेपाली टिभिया युट्युब च्यानलया माध्यमं सचेतना नामं १०गू मिनेटया छगू शर्टमूभी पिकाःगु दु । छम्ह प्वाथय् दुम्ह मिसा स्वनिगलय् बालं च्वनाच्वंगु दइ । लकडाउन शुरु जुइवं व गामय् लिहां वनी । तर अन गामय् नं कोरोना महामरी झन हे तच्वःगुलिं व मिसाया मांम्हेस्यां लिहां हुँ धकाः लितछ्वयाः हइ । व मिसा लकडाउनया इलय् लिहांवइ । छेँ थुवाःलं दुकाइ तर लिहां वयेवं कन्हे खुन्हु वैत मुसु वयाच्वंगु सकस्यां खनी । अले वडाअध्यक्षं थुगु खँ सिइका उम्ह मिसायात क्वारेन्टाइनय् च्वं धाइबलय् संचार माध्यमं धाःसा छम्ह प्वाथय् दुम्ह मिसायात छेँ थुवालं पितनाहल धकाः बुखँ पिदनी ।
लकडाउनया इलय् प्रविधि व कन्सेप्टया लबः कयाः कम्पोजिट शट (निम्ह वा निम्ह सिबें आपा कलाकार वा यक्व खँ समावेश) मयासे, मतःसे प्याखँ दयेकेगु प्रचलन दयावःगु दु । मनोरंजनया ल्याखँ थुगु प्रविधी न्ह्यइपुके ज्यू । बलिउडय् नं अमिताभ बच्चन, नेपालय् मदनकृष्ण हरिवंश अले नेवाःलय् नं सुरज ब्यंजनकार दुगु थज्योगु चीहाः प्याखँ दयेके धुंकुगु दु । थुगु हे श्रृंखलाय् निर्देशक प्रदीप खड्गीं सचेतना नं न्ह्यब्वःगु दु । थुगु चीहाः संकिपा नं अथे हे सुं नं कलाकार छेँ नं पिहांमवःसे थीथी लोकेशनयात नापं स्वानां छगू पूवंगु प्याखँ दयेकेगु कुतः याःगु दु । कलाकार कथं प्वाथय् दुम्ह मिसाया भुमिकाय् आराध्या लक्ष्मी खड्गी दु । छेँ थुवाःया भुमिकाय् सुशिल राजोपाध्याय दु । वडा अध्यक्षया भुमिकाय् रुपेन श्रेष्ठ थक्वामि दु । अले प्वाथय् दुम्ह मिसाया मांया भुमिकाय् सरस्वती मानन्धर दु ।
कलाकारया ल्याखँ सकल कलाकारया हाउभाउ बांला जू । बिना सहयोगी कलाकार छगू चरित्रयात पूवंकेत तसकं थाकु । सामान्य अवस्थाय् छगू हास्य प्याखँ वा मनोरंजनयात कःघाया थुकथंया एक्सपेरिमेन्टल प्याखँ दयेकीबलय् सकतां हे मेमेगु गल्ती वा मिलेमजूगु खँ वास्ता दयाच्वनिं मखु । तर जब छगू संवेदनशील बिषय बस्तुइ प्याखँ दयेकी, तब लिपा वनां थुकी दुगु सामान्य सिबें सामान्य खँयात नं असामान्य यायेगु कुतः जुयाच्वने फु। थुगु प्याखँया परिकल्पनाया राज महर्जन व निर्देशक प्रदीप खड्गी बधाइया पात्र खः छाय्धाःसां संकिपा ख्यलय् धाःसा छुं्र नं घटनायात कयाः तुरुन्त हे प्याखँ दयेकेगु प्रचलन झीसँ हये मफूनी । थुगु चीहाः संकिपापाखें मेमेपिं फिल्म मेकरयात नं आः छुं नं कथंया सामाजिक बेमेल वा सामाजिक मोड वइगु घटना प्याखँया बिषय बस्तु जुइगु खँय् यक्व हे प्रेरणा बिइगु खने दु ।
राज महर्जनया बाखँ व कन्सेप्ट कथं न्ह्यब्वयातःगु खःसां थुगु प्याखँ छगू मोडय् हयाः त्वतातःगु दु । प्याखँनं धाःसा झी नेवाःतय्त थुगु घटनां गुकथं चोट लाकाल धैगु बिषय कःघानातःगु मदु । संवेदनशील बिषय जूगुलिं थुगु प्याखँयात थुगु हे मोडय् जक त्वताःतःगु खनेदु । पिनं वःपिं न्ह्याम्हे जुसां क्वारेन्टाइनय् च्वना तिनि समाजय् भ्यलय् पुनेमाः धैगु महत्वपूर्ण सन्देश हे जक बियातःगु दु । तर थज्योगु सामान्य खँयात नं संचारमाध्यमं भाइरल यायेगु लँपु लिनां गुगु कथं भाइरल यानाच्वंगु दु धैगु खँ नं थुकी क्यनातःगु दु ।
थुगु प्याखँया कमजोर पक्ष धैगु हे कास्टिंग खनेदु । वास्तवय् थुगु घटना किपूलिइ छम्ह नेवाः छेँ थुवाः व गैर नेवाः बालं च्वंम्ह मिसा दथुइ जूगु घटना खः । तर प्याखँया शुरुवात दृष्य आए आए एच एम कलेज धकाः खंक न्ह्यथनातःगु दु । गुकींयाना थुगु धटना किपूया मखु यलया खः धैगु छाप वं । प्याखँया पात्र छनौट कथं छेँ थुवाः गैर नेवाः व बालं च्वंम्ह नेवाः थें खनेदु । मांम्ह इता वानाच्वंगु छगू दृष्यं इपिं नेवाः हे खनेदु । लिसें प्याखँया छगू पक्ष कथं थीथी लोकेशनय् बिना कलाकार नापंच्वना सुटिंग यानातःगु खःसां डेलिभरी त्यःम्ह मिसा याकःचा थः छेँ वनेगु दृष्य भचा पचे याये थाकु । लुखाय् थ्यंक थ्यंम्ह म्ह्याय्यात थः मां म्हेस्यां छक्व हे दना मवःसे खातां तुं हे लिहां हुँ धैगु खँ नं पचे याये थाकु । बरु थुगु दृष्ययात झ्यालं हे न्ववाइगु व लुखां हे लित छ्वइगु याःगु खःसा अझ स्वभाविक क्यने फैगु खः । तर थुगु प्याखँ छगू घटनाया लुमन्ति कथं ल्यना च्वनिगु खँय् शंका मदु ।
