पद्मरत्न तुलाधरया विचाः व अभियान न्ह्याकेत नीस्वनातःगु पद्मरत्न लुमन्ति गुथिया न्हापांगु तःमुँज्या क्वःचाःगु दु । न्हापांगु तःमुँज्याया लसताय् ख्वपय् ‘नेपाःया ह्यूपाः व पद्मरत्न अभियान’ विषयक सहलह मुँज्या नं जूगु खः । पद्मरत्न लुमन्ति गुथिया नायः डा. केशवमान शाक्यं त्वाःदेवाय् मत च्याकाः उलेज्या याःगु उगु मुँज्याय् ख्वपः लागाया वरिष्ठ भाषिकअधिकारकर्मी एवं साहित्यकार तिलक प्रकास कायस्थ, नरेन्द्रभक्त हाडा व त्रिरत्न शाक्यपिन्सं भाषिक, मानवअधिकारवादी, साहित्यकार, पत्रकार एवं पूर्व स्वास्थ्य व श्रममन्त्री पद्मरत्न तुलाधरया व्यक्तित्व विषय नुगः खँ तया दिइगु खः । गुथिया न्वकू मय्जु सुम्निमा तुलधारं लसकुस याना न्ह्याकूगु उगु ज्याझ्वः छ्याञ्जे नरेशवीर शाक्यं न्ह्याकूगु खः ।
पद्मरत्न लुमन्ति गुथिया न्हापांगु अधिवेशनं आःया स्वदँया कार्याकलया निंतिं न्हापायागु हे कार्यसमितियात पुनरचयन याःगु दु । तःमुँज्याया बन्द शेसनय् छ्याञ्जे नरेशवीर शाक्यं प्रगति विवरण व दांभरि सुरेश प्रधानं न्ह्यब्वःगु ल्याःचाःयात सर्वसम्मतं पारित याःगु दु ।
