वरिष्ठ म्येहालामि जुजुकाजी रंजितया न्हूगु सोलो एल्बम मतिनाया गल्लि थौं रसियन हाउसय् बिमोचन जुल । जनकवि दुर्गालाल श्रेष्ठ मू पाहाँ कथं ब्वनातःगु ज्याझ्वलय् मूपाहां दुर्गालाल श्रेष्ठयात दोसल्ला न्ययेका सम्मान नं याःगु खः ।
ज्याझ्वलय् म्येचाःया बिषययात कयाः म्येचाःया संगीतकारपिं जुगल डंगोल व मनराजा नकःमिं नुगः खँ तयाःदीगु खः । म्येचाःया नां व म्येया बोल भारतया नांजाःम्ह दार्शनिक एवं कवि कवीरया वाणिं प्रभावित जूगु खँ वक्ता मल्ल के सुन्दरं जानकारी नं बियाःदीगु खः । म्येया बिषयलय् दुर्गालाल श्रेष्ठं नुगः खँ तयेगु झ्वलय् – द्यः धैपिं फोहर जुसां, खिउँ थाय् जुसां मतिना दुथाय् दइ धैगु भाव मतिनाया गल्लि म्येचाःया टाइटल ट्राय्कय् दुगु बारे खँ कनादिल ।
मेम्ह पाहाँ प्रकाश साय्मिं कवि दुर्गालाल श्रेष्ठया तारिफ यानादीसें हरिवंश राय् बच्चनया चिनाखँ अनुवाद जूगु सुलिं सफू या बिषय स्वाकाः वय्कया लेखन प्रेरणाया खँ न्ह्यथनादिल ।
जुजुकाजी रंजितया याकः सलय् थ्व न्हूगु म्येचाः खः । थौं ६८ बर्षय् हाकनं वय्कःया म्यचाः पिदंगु दु । वय्कलं २०२२ साल निसें हे दबुलिइ म्ये हालेगु शुरु याये धुंकुगु खः ।
ज्याझ्वलय् मुक्कं प्यपू म्ये जुजु काजी रंजितं हालादीगु खः । म्येचाःया हे म्ये हालेगु झ्वलय् वय्कःयात निशा देसार व रत्नशोभा महर्जनं नं साथ बियादीगु खः । लिसें वय्कलं छपू रसियन भाय्या म्ये नं हालादीगु खः ।
ज्याझ्वःलय् केशव राज राजभण्डारी पूर्व मुख्य सचीव एवं केसू गुथिया संस्थापक अध्यक्षं भिंतुना देछाना जीवनय् संगीतया महत्व दुगु खँया बिषय कुलादिल ।
नेपाल रुसिया फ्रण्डशीप एण्ड कल्चरल एसोशियशनया स्वराज शाक्यया सभापतित्वय् बिमाेचन ज्याझ्वः जूगु खः ।
थुगु हे म्येचाःया छन्त लुमंकाः बोलया म्येया प्रिमियर नं जूगु खः ।
म्येचाः जुजुकाजी रंजितया जहान काैशल्या रंजितया न्ह्यब्वया खःसा बिमाेचन ज्याझ्वनं वय्कःया कजिसुइ जूगु खः ।
